Trosolwg o'r Cwrs
Mae’r cwrs hwn, sy’n croesawu graddedigion o bob maes pwnc, yn defnyddio ac yn crynhoi’r wybodaeth rydych chi wedi’i hennill o gefndir eich gradd mewn amgylchedd realiti rhithwir y gellir ei ddefnyddio mewn ffordd gyffrous a rhyngweithiol y gellir ymgolli ynddi at ddibenion masnachol, meddygol, ymchwil, addysg neu hyd yn oed adloniant, gan ehangu eich sgiliau deallusol o sail wybodaeth israddedig fwy cul i set sgiliau amlddisgyblaethol.
Mae'r cwrs hwn yn cynnig cyfle i chi wneud ail flwyddyn ychwanegol ar gyfer Prosiect neu Leoliad Gwaith ym myd diwydiant, gan roi profiad gwaith gwerthfawr i chi a'r cyfle i wella sgiliau technegol a rhyngbersonol.
Nod y rhaglen yw:
- Darparu trosolwg o dechnoleg a chymwysiadau XR
- Galluogi graddedigion i ddeall a chymhwyso technoleg realiti rhithwir yng nghyd-destun heriau cymdeithasol, economaidd a thechnegol ac arddel ymagwedd gyfannol ac amlddisgyblaethol at ddatrys problemau
- Diffinio a datblygu cymwysiadau effeithiol sy’n seiliedig ar gyfrifiaduron
- Galluogi graddedigion i adlewyrchu ar bwysigrwydd, cryfderau a gwendidau unigol, meddwl yn entrepreneuraidd ac yn arloesol ac i ddefnyddio technegau meddwl am syniadau a datrys problemau’n effeithiol
- Archwilio barn ddamcaniaethol ar ddylunio sy’n canolbwyntio ar y cyfryngau, marchnata, diwylliant a phobl drwy gydol y broses o lunio’r prosiect
- Ymgysylltu’n effeithiol â sefydliadau i ddatblygu cynlluniau prosiect
- Datblygu graddedigion sydd â dealltwriaeth sylfaenol o reoli prosiectau
Pam Realiti Rhithwir yn Abertawe?
Er bod y cwrs yn weddol newydd, yn ei flwyddyn gyntaf dyma'r unig gwrs i dderbyn dau grybwylliad anrhydeddus yng ngwobrau SALT Abertawe, un ar gyfer y cwrs gorau ac un ar gyfer y Defnydd Gorau o Ddysgu â Chymorth Technoleg.
Pecyn holl gynhwysfawr:
Wrth ddatblygu cymwysiadau realiti rhithwir, rhaid cael y cyfarpar cywir ar gyfer y gwaith. Mae'r cwrs hwn yn darparu pecyn hollgynhwysol o'r cyfarpar y mae ei angen, gan gynnwys eich gliniadur datblygu realiti rhithwir eich hun, gyda phenset a rheolyddion realiti rhithwir. Gallwch gadw'r cyfarpar hwn ar ôl cwblhau'r cwrs yn ddi-dâl, felly gallwch barhau i ddefnyddio eich sgiliau realiti rhithwir newydd yn eich gyrfa yn y dyfodol. Mae'r cyfarpar hwn yn galluogi myfyrwyr i ymgymryd â phob agwedd ar y cwrs, o ddysgu'r hanfodion i ddatblygu eu prosiect traethawd hir.
Mae'r cit yn cynnwys:
- Gliniadur sy'n cydweddu â Realiti Rhithwir
- Meta Quest 3 gyda chês cludo a chebl cysylltu
- Bag i gludo'r gliniadur a'r penset realiti rhithwir
- Monitor ychwanegol, a bysellfwrdd a llygoden allanol gyda hyb USB ar gyfer y cartref
Mae ein cyfleusterau a'n hadnoddau o'r radd flaenaf yn cynnwys:
- Meta Quest Pro a Meta Quest 3 ar gyfer datblygu realiti cymysg
- Gweithfannau realiti rhithwir dynodedig gan olrhain y corff, y llygaid a'r dwylo'n llawn ar gyfer cymwysiadau uwch yn ogystal â synwyryddion ar gyfer curiad y galon a monitro tonfeddi'r ymennydd
- Amrywiaeth o berifferolion sy'n cefnogi datblygiad realiti rhithwir gydag adborth cyffyrddiadol
- Amrywiaeth o setiau pen eraill i arbrofi gyda nhw a'u datblygu, gan gynnwys cynhyrchwyr Magic Leap, Pico, Pimax, Sony, Valve a Varjo
Eich Profiad Realiti Rhithwir
Pa fath o bethau y byddwch chi'n eu gwneud?
Bydd myfyrwyr yn dysgu sut i greu bydoedd rhithwir, gan greu ac adeiladu gwrthrychau 3D y gellir rhyngweithio â nhw. I greu 'profiad ymdrochi' gwell i ddefnyddwyr a gwneud i'r defnyddwyr deimlo eu bod nhw 'yno', addysgir dylunio seinweddau ymdrochi (parthau amgylchynol, cyfeiriadol, Foley, atsain etc) ac effeithiau goleuo realistig. Hefyd, trafodir creu a rheoli NPCs (cymeriadau nad ydynt yn chwarae), gan gynnwys defnyddio technegau deallusrwydd artiffisial i reoli eu hymddygiad. Caiff rheoli'r amgylchedd realiti rhithwir drwy ddefnyddio côd cyfrifiadur (C#) ei gyflwyno’n gynnar yn ogystal â thechnegau rheoli prosiectau safonol y diwydiant (Agile, Scrum, storfeydd GIT) y mae'r myfyriwr yn eu defnyddio drwy gydol y cwrs. Bydd myfyrwyr yn datblygu o greu bydoedd 'cartŵn' syml i adeiladu amgylcheddau realiti rhithwir llawer mwy realistig ac ymdrochol.
Caiff y sgiliau hyn eu mireinio ymhellach mewn tri phrosiect grŵp:
(i) Peiriant Emosiwn (wedi’i ddylunio i ysgogi emosiwn yn y defnyddiwr e.e. mae'r defnyddiwr yn profi anabledd corfforol neu efallai'n gorfod wynebu ffobia penodol).
(ii) Peiriant Hyfforddi (caiff cymhwysiad realiti rhithwir ei greu i hyfforddi'r defnyddiwr mewn tasg benodol e.e. hyfforddiant diogelwch tân a threfniadau gadael sylfaenol).
(iii) Peiriant Gwybodaeth (e.e. cymhwysiad "realiti estynedig" neu AR gan ddefnyddio cyfrifiadur llechen sy'n gosod gwybodaeth a data rhithwir ar ben peiriannau a chyfarpar go iawn gan alluogi'r defnyddiwr i holi a rheoli cyfarpar yn ddiwifr drwy'r ap).
Hefyd, ar wahân i'r cyrsiau datblygu realiti rhithwir arbenigol, mae modiwlau eraill yn trafod themâu megis marchnata, datblygu eich presenoldeb eich hun ar y we a’ch sgiliau cyflwyno/ysgrifennu. Bydd hyn yn sicrhau bod myfyrwyr yn fwy na rhaglennwyr yn unig.
Wedi hyn oll, dylai'r myfyriwr fod wedi'i baratoi'n dda ar gyfer ei brif brosiect unigol, a gynhelir dros yr haf, pan fydd yn gweithio ar brosiect realiti rhithwir gyda phartner allanol. Yn ystod y prosiect terfynol hwn (a thrwy gydol yr holl aseiniadau blaenorol), mae'r staff addysgu ar gael i roi help ac arweiniad a chynnig gwasanaeth dadfygio am ddim yn aml!
Cyfleoedd Cyflogaeth Realiti Rhithwir
Mae diffyg arbenigwyr realiti rhithwir sydd ag arbenigedd pwnc ar draws peirianneg, gwyddoniaeth, busnes a sectorau’r celfyddydau a’r dyniaethau, yn atal twf yn y diwydiant. Nod y rhaglen hon yw creu arbenigwyr sy’n gwybod sut i greu dyfeisiau realiti rhithwir ac sydd â’r profiad i bontio’r bwlch hwn.
Cyrchfannau Posib i Raddedigion
Mae diwydiannau sydd eisoes wedi mabwysiadu arferion realiti rhithwir (ac sy’n gyflogwyr ar gyfer y dyfodol yn y diwydiant hwn o ganlyniad i hyn) yn cynnwys:
- Diwydiannau gweithgynhyrchu
- Gofal iechyd/y GIG
- Dadansoddeg Ddata
- Dylunio gemau
- Treftadaeth y Celfyddydau
- Seicoleg
- Iechyd a Diogelwch
- Hyfforddiant
- Newyddiaduraeth
- Manwerthu
- Twristiaeth
- Eiddo tirol
- Pensaernïaeth
- Dysgu a Datblygu
- Recriwtio
- Addysg
- Chwaraeon – gan gynnwys Ymchwil Chwaraeon ac Adloniant Chwaraeon
- Celf a Dylunio
- Digwyddiadau a Chynadleddau
- Elusennau
- Maes milwrol
- Asiantaethau’r Gofod – gan gynnwys Hyfforddiant a Datblygu, Dadansoddeg Ddata
- Gorfodi’r gyfraith
