Presenoldeb Prifysgol Abertawe yn Eisteddfod Genedlaethol Cymru
Prifysgol Abertawe yn Eisteddfod Genedlaethol Wrecsam 2025
Mae Prifysgol Abertawe yn edrych ymlaen at Eisteddfod Genedlaethol Wrecsam gydag wythnos lawn o ddigwyddiadau difyr ar y maes. Bydd ein prif arlwy yn y Babell Lên fel arfer, ac yn cynnwys Darlith Goffa Hywel Teifi a chynhelir bob blwyddyn ar y dydd Iau. Dewch i’n gweld ar y maes rhwng Awst 2 – 9.
Ymhlith y digwyddiadau a drefnir gan y Brifysgol eleni, mae:
Fel yr Wyt | Mewn cydweithrediad â chyhoeddiadau Sebra, a dan gadeiryddiaeth Miriam Elin Jones, Adran y Gymraeg. Sgwrs yw hon am brofiadau menywod o fyw mewn cyrff mwy ac am eu cyfraniadau i’r gyfrol newydd Fel yr Wyt, gyda chyn fyfyrwraig Prifysgol Abertawe, Gwennan Evans, Rhian Meara o’r Adran Ddaearyddiaeth, a’r awduron Mari Gwenllian a Bethan Antur | Dydd Llun, 4 Awst am 11:45am
Cwmwl Awst 1945 | Ar achlysur 80 mlynedd ers bomio Hiroshima a Nagasaki byddwn yn clywed ymateb beirdd Cymru ddoe a heddiw. Bydd cyfraniadau creadigol gan feirdd cyfoes dan gadeiryddiaeth Mererid Hopwood gyda Hywel Griffiths, Jim Parc Nest, Robat Powell, Jo Heyde a Tecwyn Ifan. Mewn cydweithrediad ag Academi Heddwch Cymru a Barddas | Dydd Mawrth, 5 Awst am 11:45am
Darlith Goffa Hywel Teifi – Cyfleu Cymreictod i’r Byd: Profiadau personol o fyd pêl-droed, diwylliant a busnes | Traddodir gan Carol Bell, arbenigwraig fyd-eang yn y diwydiannau ynni a chyllid, ymddiriedolwr elusennau amrywiol a Chymrawd er Anrhydedd Prifysgol Abertawe | Dydd Iau, 7 Awst am 11:45am
Cofio Geraint H Jenkins | Sesiwn i gofio am un o haneswyr disgleiriaf Cymru ac ysgolhaig o fri gyda Robat Powell, Prys Morgan, Marion Löffler a John Meredith | Dydd Gwener, 8 Awst am 11:45am
Richard Burton – Llunio eilun | Daniel G. Williams yn sgwrsio â’r actorion Matthew Rhys, Sharon Morgan a Steffan Rhodri am wreiddiau a gyrfa’r seren fyd-eang gan ofyn sut y dylem ei gofio ym mlwyddyn ei ganmlwyddiant. Bydd cyfraniad Matthew Rhys ar y sgrin | Dydd Sadwrn, 9 Awst am 11:45am
Bydd ambell ddigwyddiad arall sy’n gysylltiedig â’r Brifysgol yn cael eu cynnal ar draws y maes. Ym Mhabell y Cymdeithasau ar ddydd Llun, 4 Awst am 2pm, bydd ‘Cynefin yn y Dosbarth: Hanes, Daearyddiaeth a Llenyddiaeth’ yng nghwmni Rhys Jones, Miriam Elin Jones a Gethin Matthews, dan gadeiryddiaeth Rhian Meara. Bydd y sesiwn yn trafod sut y gallwn ddefnyddio’r syniad o ‘gynefin’ i hybu syniadau’r dysgwyr am hunaniaeth a pherthyn, a’u cynorthwyo i ddatblygu eu dealltwriaeth am sut mae eu milltir sgwâr hwythau yn ymgysylltu â mannau eraill yng Nghymru a thu hwnt. Yna ar fore Gwener, 8 Awst am 10.30am, yn Cymdeithasau 2, mae Adran Glasurol Cymdeithas Cyn-fyfyrwyr Prifysgol Cymru yn cynnal digwyddiad i gofio ‘Euros Bowen, Clasurydd Wrecsam’ gyda’r Athro Emeritws Ceri Davies, Prifysgol Abertawe yn annerch.
Meddai Gwenno Ffrancon, Dirprwy Is-ganghellor Cynorthwyol ar gyfer y Gymraeg, ei Threftadaeth a'i Diwylliant a Chyfarwyddwr Academi Hywel Teifi:
“Yn ôl ei harfer, mae Prifysgol Abertawe yn cyflwyno cyfres o sgyrsiau difyr, amrywiol ac amserol ar gyfer rhaglen y Babell Lên yn Eisteddfod Wrecsam eleni. Mae’n addo bod yn wythnos o weithgaredd fydd yn cosi chwilfrydedd ein cynulleidfa, yn ennyn eu chwerthin a’u hedmygedd, ac yn arwain at ennyd o fyfyrio a chofio ar eu rhan. Fe fydd hi’n braf cael bod eto yng nghwmni caredigion prif lwyfan llenyddol Cymru ac edrychwn ymlaen yn fawr at groesawu pawb i’r Babell Lên.”