Sean Holm

Beth yw eich testun ymchwil?

Imiwnolegydd ydwyf, sy’n golygu fy mod yn astudio’r system imiwnedd. Yn benodol, rwy’n canolbwyntio ar ymatebion y system imiwnedd yn ystod beichiogrwydd ac ar fore oes.

Pam y gwnaethoch chi benderfynu astudio ar gyfer doethuriaeth?

Un o agweddau mwyaf pleserus fy astudiaethau israddedig oedd y cyfleoedd i ymchwilio'n annibynnol i bynciau a wnaeth fy arwain yn wreiddiol at ystyried gyrfa ym maes ymchwil yn y dyfodol. Rhwng yr ail flwyddyn a'r drydedd flwyddyn, gwnes i gwblhau lleoliad gwaith gyda grŵp labordy Thornton, lle gwnes i feithrin gwerthfawrogiad go iawn o ymchwil yn y labordy. Yn dilyn hynny, gwnes i brosiect fy nhraethawd hir gyda'r un grŵp. Roeddwn i wrth fy modd yn gweithio dan Dr Nick Jones, gan ymchwilio i fetabolaeth glwtamin mewn ymatebion cynnar celloedd T, a phenderfynais i fy mod i'n bendant am ddilyn gyrfa ym maes ymchwil.

Pam y penderfynoch chi astudio ym Mhrifysgol Abertawe?

Yn gyntaf, cefais i brofiad cadarnhaol iawn yn ystod fy astudiaethau israddedig yma.

Yn ail, roedd yn gyffrous bod yn rhan o'r grŵp roeddwn i'n gweithio gydag ef. Cafodd y gwaith a wnes i gyda’r grŵp yn ystod fy nhraethawd hir ei gyhoeddi fel rhan o bapur yn Nature Communications hyd yn oed.

Yn olaf, roedd y Fframwaith Rhagoriaeth Ymchwil wedi canmol Ysgol Feddygaeth Prifysgol Abertawe'n fawr, gan ei gwneud yn lle atyniadol i astudio ynddo.

Pa heriau rydych chi wedi’u hwynebu?

Mae ymchwil ôl-raddedig yn llawn heriau. Mae modd rhagweld rhai ohonyn nhw ond mae eraill yn gwbl anrhagweladwy. Serch hynny, mae gradd ymchwil yn y bôn yn radd mewn datrys problemau, felly mae'n rhaid disgwyl yr annisgwyl. Gall ymchwil fod yn faich trwm ar eich amser, felly mae cynnal cydbwysedd rhwng bywyd a gwaith yn gallu bod yn anodd. Fodd bynnag, yn ddiau, yr her fwyaf y gwnes i ei hwynebu oedd effaith COVID. O ganlyniad i'r heriau dilynol, cefais i fy ngorfodi i wneud llawer o newidiadau i'm hymagweddau, yn ogystal â'm hysgogi i dyfu a datblygu mewn meysydd newydd megis addysgu fy hun sut i godio.

Sut rydych chi wedi elwa o wneud doethuriaeth?

Rwyf wedi meithrin amrywiaeth eang o sgiliau drwy wneud doethuriaeth. Gan gynnwys…

• Llunio repertoire o dechnegau labordy.
• Gallu ysgrifennu a chyflwyno i gynulleidfaoedd amrywiol.
• Sut i feithrin rhwydweithiau a chydweithredu â phobl o bedwar ban byd.
• Rheoli amser a chynllunio prosiectau.

Po fwyaf o gyfleoedd rydych chi'n achub arnyn nhw ochr yn ochr â'ch astudiaethau, mwyaf y byddwch chi'n dysgu ac yn datblygu.

Sut bydd eich cymhwyster yn helpu eich gyrfa?

Mae doethuriaeth yn fan cychwyn ardderchog i lansio gyrfa yn y gwyddorau bywyd. Mae galw mawr gan gyflogwyr ym maes gwyddorau bywyd am y sgiliau labordy ac ysgrifennu sy'n cael eu magu yn ystod doethuriaeth ac maen nhw'n hollbwysig i yrfa academaidd. Ar ben hynny, mae'r amrywiaeth eang o sgiliau meddal rwyf wedi eu magu yn ystod fy noethuriaeth yn addas i amrywiaeth eang o swyddi.

Beth oedd yr uchafbwynt i chi?

Yn bendant, cefais i deimlad o gyffro bob tro y gwnes i ddarganfyddiad bach, datrys problem a oedd wedi peri penbleth i mi neu weld rhywbeth newydd a diddorol yn fy nghanlyniadau.
Ond yr uchafbwynt go iawn i mi oedd cymryd rhan mewn cynadleddau a chyflwyno fy ngwaith i grŵp o unigolion o'r un bryd a thrafod gorwelion yr ymchwil sydd i ddod.

Pa gyngor byddech chi'n ei roi i fyfyrwyr sy'n ystyried gwneud astudiaethau ôl-raddedig?

Byddwn yn argymell cymryd rhan mewn cynifer o bethau â phosib yn ystod eich astudiaethau. Ewch i gynadleddau; cyflwynwch thesis tair munud; cymerwch ran mewn addysgu a gwaith allgymorth.