Bod yn Actif

Mae Bod yn ACTIF yn cynnig amserlen wythnosol o sesiynau gweithgareddau hwyl a fforddiadwy i'ch helpu i ddechrau symud mwy ar y campws. Bydd yr amserlen yn amrywio gan ddibynnu ar y galw a'r tymhorau a bydd yn cynnwys gweithgareddau i'ch helpu i gymryd rhan a'ch helpu i gwrdd â phobl newydd.

Mae'r rhaglen Bod yn ACTIF yn unigryw i fyfyrwyr a staff Prifysgol Abertawe, ac mae sesiynau naill ai'n cael eu cyflwyno gan un o'r tîm Bod yn ACTIF neu hyfforddwr allanol neu ddarparwr gweithgareddau (gan ddibynnu ar y gweithgaredd).

Mae ein Hamserlen Graidd ar gael fel a ganlyn ar gyfer 2024-25:

Semester 1

• 30 Medi - 13 Rhagfyr

Semester 2

• 13 Ionawr - 6 Mehefin

Semester 3

• Bydd Bod yn ACTIF yn cyflwyno sesiynau gweithgaredd yn ystod semester 3, yn seiliedig ar alw.

Sylwer:

• Mae gweithgareddau'n dal i gael eu cynnal yn ystod wythnosau cymorth astudio.
• Nid yw gweithgareddau'n cael eu cynnal ar wyliau banc.
• Gall dyddiadau newid.

Prisiau Sesiynau

• Mae ein sesiynau craidd AM DDIM, ar wahân i'n sesiwn ioga sy'n costio £2.50 yn unig.
• Bydd cost uwch am weithgareddau a gynhelir gan hyfforddwyr a darparwyr allanol, ond bydd cymhorthdal sylweddol ar eu cyfer a byddant yn cynnwys trafnidiaeth, os yw'n berthnasol.

Gwnewch yn siŵr eich bod yn cwblhau'r cofrestriad Bod yn ACTIF cyn mynd i'n tudalen digwyddiadau i gadw lle mewn sesiwn.

Sesiynau Untro a Rhagflas

Mae Bod yn ACTIF yn darparu amrywiaeth o sesiynau untro a rhagflas lle gallwch roi cynnig ar rywbeth newydd. Rydym yn gweithio gyda chyfadrannau i gynnig amrywiaeth o sesiynau untro, felly cadwch lygad amdanom ni. Nid oes angen cadw lle i ymuno â'n sesiynau untro, dim ond cymryd rhan.

Digwyddiadau a Gwyliau

Mae Bod yn ACTIF yn cynnal digwyddiadau rheolaidd drwy gydol y flwyddyn, o hwyl Wythnos y Glas i Ddiwrnod Mabolgampau Hen Ffasiwn, Gwyliau Traeth, gwyliau criced a rownderi. Os ydych chi am i ni gynnal digwyddiad neu ŵyl ar gyfer eich cymdeithas,  grŵp o ffrindiau neu staff neu ddigwyddiad hwyl yn y gyfadran, cysylltwch â ni (ewch i'r adran Cysylltu â Ni).

Cadwch lygad ar ein tudalen Instagram i gael yr wybodaeth ddiweddaraf am ddigwyddiadau.

Mae Bod yn ACTIF yn cynnig cyfle i chi ddysgu sgiliau newydd neu ddatblygu hen sgiliau drwy raglen o sesiynau hyfforddi:

• Bydd y rhaglenni'n amrywio o ran hyd, o sesiwn untro i nifer o wythnosau.
• Yn addas ar gyfer ystod eang o lefelau gallu ac yn addas i ddechreuwyr.
• Dan arweiniad hyfforddwyr cymwys a phrofiadol.
• Amrywiaeth o gyrsiau i bawb, gan gynnwys:
• Couch to 5K
• Tenis
• Saethyddiaeth
• Syrffio
• Dringo
• Mae'r prisiau'n amrywio, gan ddibynnu ar y gweithgaredd.  Am ragor o wybodaeth ac i gadw lle, ewch draw i'n tudalen digwyddiadau ar wefan Undeb y Myfyrwyr.

Mae bod yn actif yn yr awyr agored yn wych i'ch meddwl, eich corff a'ch enaid. Nod ein rhaglen Bod yn ACTIF yw manteisio ar ein hamgylchedd naturiol anhygoel o amgylch Abertawe, Penrhyn Gŵyr ac yn ehangach yn ne Cymru drwy ddefnyddio ein traethau, ein llwybrau arfordirol, ein parciau gwledig a chenedlaethol, ein coetiroedd, ein cronfeydd dŵr a’n mynyddoedd.

Gan weithio gyda'n clybiau/cymdeithasau a darparwyr gweithgareddau awyr agored lleol, mae Bod yn ACTIF yn cynnig amrywiaeth o sesiynau awyr agored drwy gydol y flwyddyn gan gynnwys:

• Teithiau cerdded a sgyrsiau
• Grwpiau rhedeg cymdeithasol
• Nofio dŵr agored
• Caiacio
• Syrffio a phadlfyrddio wrth sefyll
• Dringo a bowldro
• Beicio mynydd
• Arforgampau
• Cerdded bryniau
• Cyfeiriannu
• Teithiau beic
• Llwybrau ffitrwydd

Yn 2023-24, gwnaethom gynnal teithiau cerdded i fyny Pen-y-Fan (mynydd uchaf de Cymru), beicio mynydd a chaiacio ym Mharc Gwledig Margam, syrffio ar draeth Caswell, teithiau cerdded yn ardal y Sgydau, Parc Gwledig Pen-bre, Cronfa Ddŵr Lliw a llawer o deithiau cerdded o amgylch Penrhyn Gŵyr.

Yn 2024-25, byddwn yn cynnal y rhain i gyd eto a mwy.  Ychwanegiad newydd fydd rhedeg ein Her 3 Chopa Cymru gyntaf.

Bob gwanwyn, rydym yn recriwtio myfyrwyr brwdfrydig, ymroddedig a llawn cymhelliant i ddod yn rhan o'n Tîm Actifyddion Bod yn ACTIF.  Mae ein Hactifyddion yn allweddol i lwyddiant yr hyn y mae Bod yn ACTIF yn ei ddarparu.

Gall rolau actifyddion fod yn generig neu'n benodol i chwaraeon/weithgaredd e.e. pêl-foli, rhedeg, pêl-droed, cerdded, a badminton.  Wrth i'r rhaglen Bod yn ACTIF dyfu, byddwn yn ehangu'r gweithgareddau a gynigiwn.  Disgwylir i Actifyddion ddarparu rhwng 2 a 4 awr o weithgareddau yr wythnos (yn ystod y tymor yn bennaf) a byddant yn cynnal gweithgareddau wythnosol wedi'u hamserlennu, gan helpu i recriwtio cyfranogwyr newydd drwy hyrwyddo'r  sesiynau Bod yn ACTIF a helpu i gyflwyno digwyddiadau hyrwyddo.  Mae ein Hactifyddion hefyd yn chwarae rhan hanfodol wrth helpu i gynnal ein tudalen Instagram; gan greu cynnwys a rhannu riliau a straeon i hyrwyddo ac arddangos Bod yn ACTIF.

I ymuno â'n tîm o Actifyddion, mae'n rhaid i chi:

• Fod yn fyfyriwr Prifysgol Abertawe (israddedig neu ôl-raddedig).
• Bod â diddordeb mewn ffyrdd actif o fyw a bod yn frwdfrydig dros ddatblygu a hyrwyddo chwaraeon a gweithgarwch corfforol i fyfyrwyr eraill.
• Meddu ar sgiliau cyfathrebu rhagorol, sgiliau rhyngbersonol a rheoli amser da, ynghyd â'r gallu i weithio fel rhan o dîm yn ogystal ag ar ein pen eich hun.
• Does dim angen i chi fod yn rhan o glwb chwaraeon - rydyn ni eisiau i fyfyrwyr sy'n mwynhau ac sy'n ymrwymedig i fod yn actif ac eisiau helpu eraill i fod yn fwy actif yn amlach.

Pam cymryd rhan:

• Gallwch ennill profiad a sgiliau ymarferol gwerthfawr y gallwch gyfeirio atynt wrth ymgeisio am swyddi.
• Gallwch ddangos i ddarpar gyflogwyr fod gennych rinweddau fel dibynadwyedd, cyfrifoldeb ac ymrwymiad.
• Gallwch wella eich hun a gwneud gwahaniaeth i fywydau pobl drwy gefnogi'r tîm Bod yn ACTIF i ddarparu chwaraeon/gweithgareddau sy'n diwallu anghenion myfyrwyr.
• Cyfleoedd â thâl.

Am ragor o wybodaeth, cysylltwch â ni drwy e-bostio getactive@abertawe.ac.uk neu lenwi ein ffurflen mynegi diddordeb.

Oes gennych chi gwestiynau am y rhaglen na allwch gael atebion iddynt ar-lein?

Cysylltwch â Thîm Bod yn ACTIF: getactive@swansea.ac.uk.

I gael yr wybodaeth ddiweddaraf am yr holl ddiweddariadau a digwyddiadau, dilynwch ni ar Instagram.