Cwblhaodd Dr Matthew Ware ei radd baglor a meistr yn Abertawe cyn ymrestru i wneud doethuriaeth gydweithredol mewn nanodechnoleg gyda Sefydliad Ymchwil Methodistaidd Houston yn Nhecsas, sef un o’r mentrau a ddeilliodd o Bartneriaeth Strategol Tecsas.
Ynghlwm wrth Bartneriaeth Strategol Tecsas Prifysgol Abertawe mae wyth o brifysgolion a sefydliadau iechyd blaenllaw ac mae wedi cael ei gosod ddwywaith ar restr fer Gwobrau Arweinyddiaeth a Rheolaeth cylchgrawn Times Higher Education (THELMA). Yr hyn sy’n nodweddu’r Bartneriaeth yw hyd a lled a dyfnder ei gweithgareddau ymchwil, addysgu a symudedd sy’n estyn ar draws pob un o Golegau academaidd y Brifysgol, gan gynnig manteision i’r staff a’r myfyrwyr fel ei gilydd.
Wedi iddo raddio, parhaodd Dr Ware i weithio yn Nhecsas, gan ymchwilio i driniaethau newydd ar gyfer canser pancreatig a chanser yr afu yng Ngholeg Meddygaeth Baylor. Arweiniodd ei ymchwil at ddau batent, gan gynnwys Dyfais CorleyWare, sef dyfais fewndriniaethol newydd sy’n trin y rhannau hynny o ganser nad oes modd i fflaim llawfeddyg eu gwaredu.
