Pam y mae'n bwysig

Rhodd yn eich ewyllys tuag at Gronfa'r Angen Mwyaf yw'r ffordd fwyaf gwerthfawr y gallwch gefnogi'r Brifysgol. Mae rhoddion fel hyn heb eu cyfyngu o ran natur, sy'n golygu y gall y Brifysgol eu cyfeirio at yr ardaloedd y mae arnynt yr angen mwyaf am gyllid ychwanegol. 

Mae rhoddion tuag at Gronfa'r Angen Mwyaf yn gwneud gwahaniaeth anferth ac maent wedi cefnogi amrywiaeth o brosiectau, gan gynnwys adfer iechyd y rhai hynny sy’n dioddef o Covid hir ac amrywio amddiffynfeydd morol Abertawe. Gallwch ddarllen mwy am y prosiectau gwych y mae Cronfa'r Angen Mwyaf yn eu cefnogi, a sut gallai eich rhodd helpu i wneud gwahaniaeth go iawn yn ein cymunedau lleol a byd-eang.

Efallai y byddwch yn cofio cymuned fywiog y myfyrwyr, sŵn y gwylanod, dawnsiau'r myfyrwyr, pensaernïaeth y 1960au a meithrin perthnasoedd hirhoedlog. Mae Abertawe bob amser wedi bod yn fan cychwyn pethau cyffrous, lle roedd gan fyfyrwyr orwelion mawr a diddordeb brwd yn y byd o'u cwmpas. Mae myfyrwyr o dros 140 o wledydd wedi gwneud y Brifysgol yn gartref iddynt, wedi cyfoethogi a llywio ein dinas, ein rhanbarth a'n cenedl. Mae'r Brifysgol wedi addysgu rhai o'r ffigurau mwyaf nodedig a dylanwadol ym mywyd academaidd a chyhoeddus Cymru, ynghyd ag arwyr chwaraeon ac eiconau diwylliannol. Mae ein pobl yn hyrwyddo newid, yn ymdrechu am ragoriaeth ac yn dangos trugaredd. Maent yn goresgyn adfyd, yn datrys problemau'r byd, yn mynd i'r afael â newid yn yr hinsawdd ac yn cyflawni ymchwil arloesol sy'n gwneud gwahaniaeth gwirioneddol i'r byd.

Ym Mhrifysgol Abertawe, rydym yn cydnabod bod myfyrwyr presennol yn wynebu caledi ariannol yn fwy nag erioed. Ein nod yw cynyddu'r cymorth sydd ar gael yn y maes hwn, gan leddfu pwysau ariannol sy'n tarddu o addysg amser llawn. Gallwch ddarllen mwy am y ffordd y gall eich rhodd helpu i newid bywydau myfyrwyr a gwneud gwahaniaeth i fywydau pobl sy'n gadael gofal, myfyrwyr sydd wedi'u dieithrio o'u teuluoedd ac eraill sy'n wynebu heriau annisgwyl. 

Gall rhodd yn eich ewyllys ddarparu cefnogaeth hollbwysig a chymorth ariannol mewn argyfwng i fyfyrwyr dawnus sydd ag anghenion ariannol annisgwyl heb fod ar fai am hynny. Gall eich cefnogaeth ein helpu i ganolbwyntio ar les ein pobl, gwella ansawdd eu bywyd a rhagoriaeth wrth addysgu, gan greu cymuned ddiogel a bywiog ar y campws – cartref oddi cartref lle gall ein myfyrwyr ffynnu.

Am y 100 mlynedd diwethaf, mae ein hymchwil wedi bod yn gwneud gwahaniaeth, gan gael effaith go iawn a chadarnhaol ar fywydau pobl ledled y byd. Mae'r Brifysgol yn mabwysiadu ymagwedd amlddisgyblaethol, o ymchwil i faterion byd-eang megis newid yn yr hinsawdd ac ynni adnewyddadwy, i ymchwil feddygol i glefyd y galon a chanser, a gallai eich cefnogaeth sicrhau bod yr ymchwil fyd-enwog hon yn parhau i drawsnewid bywydau.

Roedd y pandemig yn dangos pam mae cymunedau'n troi at brifysgolion am wybodaeth ac arbenigedd a pham y mae cynaliadwyedd a datblygiad strategol y Brifysgol mor hanfodol. Yng nghanol argyfwng Covid-19, daeth y Brifysgol o hyd i ffyrdd arloesol o wneud y defnydd gorau o'n cyfleusterau ac archwilio sut i leihau effeithiau corfforol y feirws. Gallwch ddarllen mwy am y ffordd y mae cefnogaeth gan roddwyr wedi hwyluso ymchwil eithriadol, gan gynnwys hwyluso ymchwil hollbwysig i ddod o hyd i driniaeth ddigidol am Covid.

Gall rhodd yn eich ewyllys sicrhau y gallwn barhau i bontio'r bwlch rhwng y cyffredin a'r anghyffredin.

A wyddech chi fod Cymru'n un o'r gwledydd cyntaf yn y byd i ymgorffori cynaliadwyedd yn ei deddfwriaeth? Y nod yw creu Cymru gynaliadwy a charbon isel – fel gwlad ac fel prifysgol rydym yn cydnabod yr heriau byd-eang rydym i gyd yn eu hwynebu.

Un o'r heriau mwyaf yw'r argyfwng amgylcheddol, a'r angen i ddiogelu ein planed. Mae ein hymchwilwyr yn mynd i'r afael â heriau byd-eang digynsail ein hoes drwy gydweithredu â phartneriaid ledled y byd i ddiogelu ein planed ar gyfer cenedlaethau'r dyfodol.

O gynnal y prosiect mwyaf yn y DU i adfer morwellt, i hedfan gyda chondoriaid yn yr Ariannin gyda SLAM (sef Labordy Symudedd Anifeiliaid Abertawe) i feithrin dealltwriaeth o ymrannu mynyddoedd iâ yn Antarctica a chreu adeiladau sy'n manteisio ar eu hynni eu hun ac yn ei storio. Gallwch ddarllen mwy am y ffordd y mae ein cymuned academaidd frwd yn gweithio i wrthsefyll effeithiau'r argyfwng hinsawdd at y dyfodol.

Gall rhodd yn eich ewyllys ein galluogi i barhau i ddod o hyd i ffyrdd o ddiogelu'r byd i genedlaethau'r dyfodol. 

Wrth i ni barhau i fyw bywydau hwy, mae cynnal iechyd da ac ansawdd bywyd yn cynnig heriau sylweddol i boblogaeth gynyddol oedrannus. Mae systemau iechyd yn y DU, a ledled y byd, dan straen enfawr. Mae hyn yn galw am ymagweddau amlddisgyblaethol ac arloesol ar draws amrywiaeth o blatfformau.

Mae ein hymchwil ym maes iechyd yn galluogi arloesi o ran dyfeisiau, gwasanaethau a diagnosisau er mwyn hyrwyddo iechyd a lles da mewn cymunedau ac i unigolion yn fyd-eang. Gallwch ddarllen mwy am y ffordd y mae ein hymchwilwyr yn targedu tiwmorau, yn symleiddio'r gwaith o ganfod canserau ac yn arloesi o ran diagnosisau, gweithdrefnau a dyfeisiau ym maes iechyd.  

Gall rhodd yn eich ewyllys ein helpu i barhau i gyflawni ymchwil sy'n arloesi ac yn gwella bywydau.