Sicrhau Ansawdd

Mae ymagwedd gytbwys, gymesur, sy'n seiliedig ar risg Prifysgol Abertawe at sicrhau a gwella ansawdd yn seiliedig ar Gôd Ansawdd ar gyfer Addysg Uwch yr Asiantaeth Sicrhau Ansawdd ac yn cyd-fynd yn llawn â Fframweithiau ar gyfer Cymwysterau Addysg Uwch Cyrff Dyfarnu Graddau y DU a Fframwaith Credydau a Chymwysterau Cymru.

Ym mis Mehefin 2022, cyhoeddodd yr Asiantaeth Sicrhau Ansawdd ar gyfer Addysg Uwch Astudiaeth achos: Rheoli Rhaglenni a Phortffolios ym Mhrifysgol Abertawe, fel enghraifft o ymagwedd lwyddiannus, ymatebol, sydd wedi'i chyfeirio gan ddata at reoli ei phortffolio academaidd. Mae'r Brifysgol hefyd wedi derbyn pum cymeradwyaeth gan y broses Adolygu Gwella Ansawdd ym mis Tachwedd 202 (adroddiad llawn a chynllun gweithredu: Adroddiad Canlyniadau, Rhagfyr 2020, Cynllun Gweithredu Adroddiad Adolygiad Gwella Ansawdd yr Asiantaeth Sicrhau Ansawdd 2020), a gafodd ei groesawu wrth ddilysu ymagwedd Prifysgol Abertawe at reoli ansawdd a safonau yn enwedig yn ystod y pandemig. Caiff rheoliadau a strwythur llywodraethu, ansawdd a safonau Prifysgol Abertawe eu rheoli drwy Bwyllgor Addysg y Brifysgol a'i is-bwyllgorau a byrddau cysylltiedig, gan gynnwys y Pwyllgor Rheoliadau, Ansawdd a Safonau, y Bwrdd Dilyniant a Dyfarniadau, y Bwrdd Partneriaethau Cydweithredol a’r Pwyllgor Cymeradwyo Rhaglenni.

Adolygiad Ansawdd

Mae'r Gwasanaethau Ansawdd Academaidd hefyd yn datblygu ac yn rheoli ystod o ganllawiau ac adnoddau ar gyfer myfyrwyr a staff, gan gynnwys:

Codau Ymarfer

Rheoliadau Academaidd

Polisïau

Llawlyfrau'r Brifysgol

Mesur Ansawdd: Gwneud y defnydd gorau o ddata

Er ei bod yn hanfodol peidio â cholli golwg ar y gwerth cynhenid mewn data ansoddol, sgyrsiau ac ymgysylltu uniongyrchol, rydym wedi ailadeiladu ein prosesau ansawdd fel eu bod yn cael eu goleuo gan ddata, ac wedi’u halinio â strategaeth a phroses cynllunio busnes y Brifysgol, gan gredu bod rhaid i sicrhau ansawdd fod yn rhan annatod o lwyddiant y Brifysgol fel busnes. Gan fod Prifysgolion bellach yn cael eu mesur a’u gosod mewn trefn restrol a hynny’n gyhoeddus, dyma ble’r ydym yn cymryd ciw ar gyfer y setiau data, i sicrhau bod rhaglenni a meysydd pwnc yn cael eu meincnodi yn erbyn grwpiau cystadleuwyr cenedlaethol. O ganlyniad, mae ein proses Adolygu Ansawdd integredig yn arbennig yn gwneud defnydd llawn o setiau data allweddol, a’r rheiny wedi’u halinio’n bennaf â’r Fframwaith Rhagoriaeth Ansawdd a data Tablau Cynghrair.

Mae’r dull hwn yn ein galluogi i wneud penderfyniadau a oleuir gan ddata ac sy’n seiliedig ar risgiau ynghylch ble i dargedu cymorth a gwelliant yn fwyaf effeithiol, i ddarparu’r profiad gorau posibl ar gyfer myfyrwyr, gan sicrhau ein bod yn gallu cyflawni’r broses fwyaf effeithlon ac uchaf ei heffaith sy’n bosibl.