Dod yn Gydymaith Meddyg

Sylwer bod y cwrs hwn yn cael ei adolygu ar hyn o bryd ac ni fydd modd cyflwyno ceisiadau ar gyfer blwyddyn academaidd 2026–27.

Beth yw Cydymaith Meddygol?

Mae Cydymaith Meddygol yn aelod o'r tîm gofal iechyd, a gaiff ei hyfforddi i ymarfer ym maes meddygaeth wrth gefnogi ymarfer clinigol y tîm meddygol dan gyfarwyddyd meddyg. Bydd Cydymaith Meddygol yn ymgymryd â llawer o dasgau, gan gynnwys archwilio, diagnosio a rheoli cleifion. Caiff Cydymaith Meddygol ei hyfforddi i feddu ar sgiliau a gwybodaeth cyffredinol, gan ei alluogi i weithio ar draws amrywiaeth o arbenigeddau mewn ysbytai neu feddygfeydd.

Mae ein cwrs Meistr mewn Astudiaethau Cydymaith Meddygol (MPAS) wedi derbyn cymeradwyaeth lawn y Cyngor Meddygol Cyffredinol (GMC) a dyma'r unig gwrs o'i fath yn ne Cymru, sy'n datblygu'r sgiliau a'r wybodaeth sydd eu hangen i lwyddo yn yr Arholiad Cenedlaethol ar gyfer Cymdeithion Meddygol a dechrau eich rôl gofal iechyd newydd.

Mae ein cyfradd lwyddo ragorol yn ein gwneud yn un o'r lleoedd gorau i astudio a hyfforddi i ddod yn Gydymaith Meddygol yn y DU, ac mae ein safle ymysg y 5 gorau ar gyfer Ansawdd Cyffredinol Ymchwil (REF2021) yn llywio ein haddysgu, gan eich paratoi i weithio yn y GIG.

Pam hyfforddi i fod yn Gydymaith Meddygol

Mae bod yn Gydymaith Meddygol yn ddewis gyrfa cyffrous. Mae'n ymwneud â llawer o waith caled, ac mae mynediad at raglenni Cydymaith Meddygol yn fwyfwy cystadleuol. Gellir cwblhau hyfforddiant Cydymaith Meddygol dros gyfnod o ddwy flynedd, ond mae'r addysg yn hynod ddwys o ystyried y cyfrifoldeb a roddir i rywun sydd wedi cymhwyso.

Nod Cymdeithion Meddygol yw bod yn hyblyg a meddu ar wybodaeth gyffredinol, sy'n golygu y gallwch ddewis y maes rydych yn gweithio ynddo. Gallech weithio ym maes meddygaeth frys am ychydig flynyddoedd cyn symud i lawfeddygaeth ac yna obstetreg a gynaecoleg. Gall Cymdeithion Meddygol feithrin sgiliau a chael rolau arbenigol megis: cynorthwyo mewn theatrau llawdriniaethau, cynnal rhestrau o lawdriniaethau mân mewn meddygfeydd, addysgu Cymdeithion Meddygol a meddygon iau, etc. Mae hyn oll yn dibynnu ar y maes y mae'r Cydymaith Meddygol yn gweithio ynddo, ei brofiad yn y maes hwnnw, ynghyd ag addysg, hyfforddiant a threfniadau llywodraethu priodol a chytundeb â'i oruchwyliwr. Mae'r rheolaeth hon dros eich datblygiad fel Cydymaith Meddygol a photensial y rôl yn gyffrous. Mae llawer o fythau a chamsyniadau ynghylch rôl y Cydymaith Meddygol, felly bydd siarad â Chydymaith Meddygol neu gysgodi Cydymaith Meddygol yn rhoi'r ddealltwriaeth orau i chi wrth benderfynu a yw'r rôl yn addas i chi.

Sut caiff Cymdeithion Meddygol eu hyfforddi a sut maent yn gweithio?

Caiff Cydymaith Meddygol ei addysgu drwy Raglen Meistr Astudiaethau Cydymaith Meddygol (MPAS) ryngosodol pedair blynedd i israddedigion neu raglen Meistr dwy flynedd ar ôl cwblhau gradd israddedig. Mae hyn yn golygu na fydd Cymdeithion Meddygol yn mynd i ysgol feddygaeth i fod yn feddygon. Ar ôl cymhwyso, mae Cymdeithion Meddygol yn diagnosio, yn archwilio ac yn rheoli cleifion mewn rôl yn eu rhinwedd eu hunain. Maent yn gwneud hyn dan oruchwyliaeth meddyg ymgynghorol neu feddyg teulu. Yn gyffredinol, nid yw Cymdeithion Meddygol yn gweithio ar batrwm cylch yn eu swyddi, gan gynnig parhad gofal a sefydlogrwydd i'r tîm meddygol. Felly, gallant gefnogi meddygon iau sy'n cael hyfforddiant arbenigol. Nid yw Cymdeithion Meddygol yn disodli meddygon, ond maent yno i atgyfnerthu'r gofal meddygol a ddarperir. Gall Cymdeithion Meddygol feithrin sgiliau arbenigol neu gael mwy o ymreolaeth drwy brofiad, ond disgwylir iddynt barhau i feddu ar wybodaeth gyffredinol hefyd.

Llwybr gyrfa a dilyniant Cydymaith Meddygol

Gall Cymdeithion Meddygol symud ymlaen yn eu gyrfaoedd mewn sawl ffordd: cynyddu cymhlethdod y mathau o gleifion a welir dros amser a thrwy brofiad; meddu ar yr hyblygrwydd i newid arbenigeddau neu'r meysydd y maent yn gweithio ynddynt; gweithio ar draws gofal sylfaenol ac eilaidd; gweithio yn y byd academaidd ac mewn ymarfer clinigol; gweithio mewn ymchwil glinigol; dysgu sgiliau newydd o ran triniaethau i gefnogi'r gwasanaeth y maent yn gweithio ynddo.

Ein Straeon Myfyrwyr

Rabhia Khan

"Mae sesiynau sgiliau clinigol ddydd Gwener yn gymaint o hwyl, rydyn ni'n dysgu popeth o sut i chwistrellu anesthesia (i orenau!) a thoriadau pwythau, i ddysgu prif nodweddion rhywun sy'n profi methiant y galon a'r archwiliad priodol i'w gymryd. Mae pawb yn y garfan mor gyfeillgar ac a bod yn onest mae'n swnio'n ystrydebol ond mae'n teimlo fel un teulu mawr, rydyn ni'n cynnal sesiynau adolygu rheolaidd i helpu ein gilydd. Mae'r lleoliad gwaith hefyd yn wych, mae'r bwrlwm o weithio mewn ysbyty neu feddygfa a gweld eich cleifion eich hun gyda'r oruchwyliaeth glinigol a'r cymorth yn gwneud i chi deimlo eich bod eisoes yn gymwysedig ac yn gweithio fel Cynorthwy-ydd Personol."

Darganfod mwy am Stori Rabhia

Faint yw cyflog Cydymaith Meddygol yn y DU?

Fel arfer, bydd Cydymaith Meddygol yn dechrau ar raddfa gyflog Band 7 (£38,890) ar hyn o bryd. Fodd bynnag, mae rhai interniaethau ar gyfer Cymdeithion Meddygol newydd gymhwyso'n dechrau ar fand 6 a gallant gynnwys patrymau cylch – ceir dolen i fandiau cyflog y GIG yma. Gall Cymdeithion Meddygol symud ymlaen i Fand 8 neu gynyddu eu cyflog ymhellach drwy brofiad; mae rolau rheoli, addysg ac ymchwil yn ogystal â chyfrifoldebau clinigol yn enghreifftiau o hyn.

A gaiff Cymdeithion Meddygol roi presgripsiynau?

Ni chaiff Cymdeithion Meddygol roi presgripsiynau am feddyginiaethau yn y DU ar hyn o bryd oherwydd y gyfraith. Caiff Cymdeithion Meddygol eu haddysgu a'u hyfforddi i argymell presgripsiynau a meddyginiaethau ar ôl iddynt asesu cleifion a diagnosio cyflwr sy'n nodi meddyginiaeth. Yna caiff presgripsiynau eu llofnodi neu eu hysgrifennu gan bresgripsiynydd. Mae cynlluniau i ymgynghori ymhellach ar roi hawliau rhagnodi i Gymdeithion Meddygol, gan anelu at ddiwygio'r gyfraith i'w galluogi i roi presgripsiynau. O ganlyniad i'r datblygiad parhaus hwn o ran rôl y Cydymaith Meddygol, dyma adeg gyffrous i ymuno â'r proffesiwn.

Pam dewis Astudiaethau Cydymaith Meddygol yn Abertawe?

Rydym yn rhaglen dan arweiniad Cymdeithion Meddygol a addysgir gan feddygon, cymdeithion meddygol, nyrsys ac ymarferwyr gofal iechyd profiadol eraill sy'n arbenigwyr yn eu meysydd penodol. Mae gennym gysylltiadau ardderchog â'r byrddau iechyd, y Cyngor Meddygol Cyffredinol ac Addysg a Gwella Iechyd Cymru, sy'n cefnogi'r rhaglen. Rydym yn rhaglen sefydledig ac rydym wedi cael canlyniadau ardderchog yn yr Arholiad Cyffredinol i Gymdeithion Meddygol. Rydym yn darparu cymorth bugeiliol ac academaidd ardderchog i'n myfyrwyr. Ar hyn o bryd, rydym yn rhaglen a ariennir i'r rhai hynny sy'n gymwys i dderbyn y cyllid.

Mae'r cymhwyster hwn yn benodol i'r DU, felly dim ond yn y DU y gallwch ymarfer ar hyn o bryd.

BETH YW CYNNWYS ASTUDIAETHAU CYDYMAITH MEDDYGOL?

Mae Astudiaethau Cydymaith Meddygol (MPAS) yn cynnwys llawer o'r pynciau ym maes meddygaeth ac yn canolbwyntio ar yr wybodaeth, y sgiliau, yr ymddygiadau a'r agweddau sy'n angenrheidiol er mwyn ymarfer fel Cydymaith Meddygol a chefnogi meddygon wrth ddarparu gofal iechyd i gleifion. Drwy gydol y rhaglen MPAS dwy flynedd, gallwch ddisgwyl treulio o leiaf 50% o'ch amser ar leoliadau clinigol ledled Cymru mewn meddygfeydd, meddygaeth gyffredinol ac amrywiaeth o feysydd arbenigol. Gall myfyrwyr hefyd ddisgwyl ymdrin ag amrywiaeth o bynciau, o sgiliau clinigol, cyfraith a moeseg gofal iechyd, ymarfer sy'n seiliedig ar ymchwil a thystiolaeth, iechyd y cyhoedd a sgiliau dysgu oes sy'n hollbwysig er mwyn parhau i ymarfer drwy gydol eich gyrfa.

Am Ddarganfod Mwy am Abertawe

Ydych chi’n cael eich ysbrydoli i hyfforddi ar gyfer gyrfa yn y GIG? Treuliwch yr amser i archwilio ein campws o gysur eich cartref eich hun gan ddefnyddio ein rhith-daith, siaradwch â rhai o'n myfyrwyr cyfredol am sut brofiad yw astudio yn Abertawe a sicrhewch eich bod chi'n cofrestru ar gyfer ein Diwrnod Agored nesaf lle gallwch, yn bersonol, brofi Abertawe, ein cymuned a'n cyrsiau.

Cadwch le nawr ar gyfer Diwrnod Agored

Mae Cydymaith Meddygol yn aelod o dîm clinigol perthynol, maent wedi'u hyfforddi fel Meddyg mewn gradd meistr ddwy flynedd ddwys, lle maent yn darparu parhad gofal, gan gefnogi Meddygon mewn ymarfer clinigol dan gyfarwyddyd Meddyg. Bydd Cydymaith Meddygol yn ymgymryd â thasgau tebyg i Feddyg gan gynnwys archwilio, diagnosis a rheoli cleifion. Bydd Cydymaith Meddygol yn dueddol o fod yn gyffredinolwr ac felly gallai dreulio ei yrfa ar draws amrywiaeth o arbenigeddau mewn ysbyty neu bractis cyffredinol.