Astudiaethau Almaeneg

Addysgir Ffrangeg, Almaeneg a Sbaeneg ar ein dwy raglen flaenllaw, y BA mewn Ieithoedd Modern  a'r BA mewn Ieithoedd Modern, Cyfieithu a Chyfieithu ar y Pryd, yn ogystal ag amrywiaeth o opsiynau Cydanrhydedd. Mae'r rhain yn cynnwys Rheol BSc (Anrh)i Busnes, Llenyddiaeth Saesneg, Hanes, Cysylltiadau Rhyngwladol, a'r rhaglen a gyflwynwyd yn ddiweddar, Anrhydedd Cyfunol, sy'n rhoi cyfle i chi ddewis o holl fodiwlau'r Ysgol Diwylliant a Chyfathrebu.

Wrth astudio Almaeneg yn Abertawe, byddwch yn ymuno â chymuned dan arweiniad tîm profiadol a brwdfrydig sy'n cynnwys yr Athro Julian Preece, Christiane Günther a Susanne Arenhövel. Gyda'i gilydd, maen nhw'n cynnig arbenigedd mewn llenyddiaeth, iaith, ffilm, cyfieithu a chyfathrebu rhyngddiwylliannol i greu amgylchedd dysgu cyfoethog a chefnogol. Byddwch chi'n archwilio'r iaith Almaeneg a chyfieithu ar bob lefel, ynghyd â modiwlau mewn llenyddiaeth gyfoes, llên alltudion, dwyieithrwydd a ffilm. Mae'r addysgu'n cael ei lywio gan ddealltwriaeth o ddiwylliant yr 20fed a'r 21ain ganrifoedd sy’n seiliedig ar ymchwil, a rhoddir sylw arbennig i awduron megis Günter Grass a Herta Müller.

Fel myfyriwr Almaeneg, byddwch yn elwa o addysgu arobryn, dosbarthiadau sgwrsio mewn grwpiau bach, ymarfer cyfieithu ar y pryd a digwyddiadau diwylliannol sy'n cysylltu dysgu yn yr ystafell ddosbarth â'r byd ehangach: byddwch yn gallu cyflwyno cais am hyd at £1,000 o Gronfa Goffa Hilda Hunt i astudio yn yr Almaen, Awstria neu'r rhanbarth o'r Swistir lle siaredir Almaeneg. Rydym hefyd yn cefnogi ceisiadau llwyddiannus i'r DAAD (y Gwasanaeth Cyfnewid Academaidd Almaeneg) am gyrsiau iaith Almaeneg mewn prifysgolion yn yr Almaen. Mae'r profiadau hyn yn cynnig cyfleoedd cyffrous i deithio, ymdrochi mewn diwylliannau a dysgu iaith - mae 27 o fyfyrwyr eisoes wedi cymryd rhan ers 2012!

Mae llawer o fyfyrwyr yn dewis treulio eu blwyddyn dramor yn yr Almaen neu Awstria, naill ai'n astudio yn un o'n sefydliadau partner neu'n gweithio fel cynorthwy-ydd iaith a ariennir gan y British Council mewn ysgolion yn yr Almaen neu Awstria. Yn ôl yng Nghymru, mae ein gwaith allgymorth gydag ysgolion yn rhoi cyfle i chi feithrin profiad gwerthfawr o addysgu a chyfathrebu.

Rydym hefyd yn cydweithredu'n agos â'r Goethe-Institut yn Llundain, y Llysgenhadaeth Almaeneg a'r DAAD, gan roi i chi fynediad hyd yn oed gwell at fywyd diwylliannol a phroffesiynol y byd Almaeneg.

Yn Abertawe, mae addysgu ac ymchwil yn mynd law yn llaw - p'un a ydych chi'n fyfyriwr israddedig neu ôl-raddedig, byddwch yn elwa'n uniongyrchol o'r ymchwil a gynhyrchir gan ein tîm Almaeneg. Mae eu cyhoeddiadau'n cwmpasu popeth, o addysgeg iaith arloesol i astudiaethau diwylliannol cyfoes.

• Ysbrydolwyd Julian Preece i ysgrifennu un o'i lyfrau ar ôl addysgu Die verlorene Ehre der Katharine Blum i fyfyrwyr y flwyddyn gyntaf.
• Roedd Christiane Günther yn gyd-awdur Wuschel auf der Erde, adnodd creadigol i hyrwyddo brwdfrydedd am Almaeneg ymhlith dysgwyr ifanc.
• Datblygodd Susanne Arenhövel y Pecyn Cymorth Almaeneg ar gyfer ysgolion cynradd yng Nghymru, gan ehangu mynediad at ddysgu iaith yn gynnar.

Ym mis Hydref 2025, rydym yn edrych ymlaen yn fawr at groesawu Dr Jack Arscott, ymchwilydd ôl-ddoethurol sy'n gweithio ar Elias Canetti and the British in a European Context: Exile, Reception, Appropriation - prosiect cydweithredol o bwys rhwng Abertawe a Ludwig-Maximilians-Universität Munich, a ariennir gan yr AHRC a'r DFG. Bydd Jack hefyd yn addysgu myfyrwyr ar y rhaglenni BA ac MA gan ddod ag arbenigedd ffres i'r ystafell ddosbarth. Yn 2024-25, bu myfyrwyr y flwyddyn olaf ac MA yn rhan uniongyrchol o gyfieithu darnau o ddyddiaduron Canetti a ysgrifennwyd ym Mhrydain, gan gyfrannu at eu cyhoeddi yn y dyfodol yn Saesneg.