Trosolwg o'r Cwrs
Gallwch deilwra eich astudiaethau ar draws llenyddiaeth a diwylliant, treftadaeth a hanes, y cyfryngau ac ieithoedd modern i archwilio dylanwad y dyniaethau ar y byd rydym ni'n byw ynddo. Mae ein gradd BA Anrhydedd Cyfun yn rhaglen radd heriol, wobrwyol a hyblyg a fydd yn eich galluogi chi i ganolbwyntio ar eich diddordebau unigol, eich cryfderau personol a’ch nodau gyrfa yn y tymor hir.
Bydd gennych un modiwl gorfodol bob blwyddyn a fydd yn gweithredu fel sylfaen i chi archwilio gwahanol ddisgyblaethau'r dyniaethau. Ategir y modiwl gorfodol gan eich dewis o ystod eang o fodiwlau dewisol, gan ymdrin â Diwylliant (Dewislen A), Y Gorffennol a'r Presennol (Dewislen B) ac Ieithoedd Modern (Dewislen C).
Dewislen A - Diwylliant
- Astudiaethau Americanaidd
- Iaith Saesneg, Ieithyddiaeth Gymhwysol, Addysgu Saesneg i Siaradwyr Ieithoedd Eraill (TESOL)
- Llenyddiaeth Saesneg
- Ysgrifennu Creadigol
- Cymraeg (Diwylliant)
- Ffilm a Diwylliant Gweledol
- Y Cyfryngau
- Ieithoedd Modern (Diwylliant)
Dewislen B - Y Gorffennol a'r Presennol
- Astudiaethau Americanaidd
- Hanes yr Henfyd
- Astudiaethau Clasurol (gan gynnwys opsiynau iaith Groeg a Lladin)
- Eifftoleg
- Astudiaethau Canoloesol
- Hanes
Dewislen C - Ieithoedd
- Cymraeg (Iaith)
- Ffrangeg (Iaith) **
- Sbaeneg (Iaith) **
** mae modiwlau iaith opsiynol ar gael i'w hastudio ar lefel dechreuwyr ac ar lefel uwch.
Bydd hefyd yn bosib astudio rhai modiwlau ar draws meysydd pwnc Cymraeg, Y Cyfryngau ac Ieithoedd Modern drwy gyfrwng y Gymraeg a gallai amrywiaeth o fwrsariaethau iaith Gymraeg fod ar gael.
Pam Astudio Anrhydedd Cyfun yn Abertawe?
Mae'r rhaglen ryngddisgyblaethol hon yr un mor unigryw â chi! Os oes gennych ddiddordeb yn y Dyniaethau, bydd yn eich galluogi chi i greu dy raglen radd bersonol eich hunain, drwy gyfuniad eang o fodiwlau a meysydd pwnc.
Y canlyniad yw cymysgedd o wybodaeth, gallu a phrofiad sy'n unigryw i bob myfyriwr.
Ar hyd y ffordd, bydd gennych chi’r cyfle i ymgolli mewn disgyblaethau amrywiol ac archwilio dylanwadau gwleidyddol, cymdeithasol, diwylliannol, economaidd ac ideolegol ar gymdeithasau'r gorffennol a'r presennol. At hynny, drwy ddewis modiwlau ar draws y celfyddydau a'r dyniaethau, byddwch chi’n gallu addasu ac ymateb yn hyblyg i ystod o amgylchiadau: gyda llygad craff am fanylion a gallu datblygedig i feddwl yn feirniadol, byddwch chi’n barod i weld y darlun ehangach - sgìl y mae galw mawr amdani ymhlith darpar gyflogwyr.
Lleolir y rhaglen hon yng Nghyfadran y Dyniaethau a'r Gwyddorau Cymdeithasol yn Abertawe sy'n gartref i addysgu o'r radd flaenaf:
- Mae Astudiaethau Americanaidd yn 1af yn y DU ar gyfer Rhagolygon Graddedigion (Complete University Guide 2025)
- Mae Saesneg yn yr 20 uchaf yn y DU am Foddhad Addysgu (Guardian University Guide 2025)
- Mae'r Cyfryngau yn 8fed yn y DU am Brofiad Myfyrwyr (Times Good University Guide 2025)
- Mae Ieithoedd Modern yn 1af am Foddhad Addysgu (Guardian University Guide 2025)
- Mae Astudiaethau Celtaidd yn 2il yn y DU yn gyffredinol (Times Good University Guide 2025)
Lleolir y cwrs hwn ar Gampws Singleton, sy'n edrych dros Fae Abertawe ac wedi'i amgylchynu gan erwau o barcdir. Byddwch chi hefyd yn agos i ddinas Abertawe - sef dinas fywiog, amlddiwylliannol, ddiogel a fforddiadwy. Mae ystod eang o opsiynau llety i fyfyrwyr sydd am fyw naill ai ar y campws neu oddi arno.
Byddwch chi’n elwa o gymuned academaidd a myfyrwyr gefnogol a chynhwysol.
Y tu allan i'ch astudiaethau, mae llawer o gyfleoedd i gymryd rhan mewn grwpiau chwaraeon a chymdeithasau gwahanol. Mae'r rhain yn cynnwys Cymdeithas yr Henfyd, y Gymdeithas Astudiaethau Americanaidd, y Gymdeithas Ysgrifennu Creadigol, y Gymdeithas Hanes, Cymdeithas y Cyfryngau a chaffis iaith wythnosol.
Eich Profiad Anrhydedd Cyfun
Bydd y rhaglen radd gyffrous ac amrywiol hon yn caniatáu i chi brofi ystod o bynciau, themâu a thestunau, gan roi i chi ddealltwriaeth eang o'r byd. Cewch eich addysgu gan amrywiaeth o ddarlithwyr, seminarau a gweithdai a byddwch chi hefyd yn elwa o siaradwyr gwadd, ymweliadau astudio a chyfleoedd am leoliadau gwaith.
Bob blwyddyn byddwch chi’n dilyn un modiwl gorfodol a fydd yn gweithredu fel angor rhwng eich dealltwriaeth o'r celfyddydau a'r dyniaethau. Ym Mlwyddyn Un, mae ein modiwl cyflwyniadol, 'Hanfodion y Dyniaethau', yn cynnwys ymweliadau â safleoedd diwylliannol yn Abertawe ac ymhellach i ffwrdd. Ym Mlwyddyn Dau byddwch chi’n cwblhau Prosiect Amlddisgyblaethol i ddatblygu dy sgiliau ymchwil a chyflwyno. Yn eich blwyddyn olaf, byddwch chi’n llunio Traethawd Estynedig neu Brosiect yn seiliedig ar eich diddordebau unigol.
Mae'r rhaglen radd hon ar gael fel rhaglen 3 blynedd.
Fel arall, gallwch chi ychwanegu blwyddyn at eich astudiaethau drwy ymgymryd â Blwyddyn Dramor neu Flwyddyn ym myd Diwydiant. Bydd yr opsiynau ychwanegol hyn yn eich galluogi chi i wella dy brofiad fel myfyriwr ymhellach drwy gynnig mewnweliadau diwylliannol unigryw i chi ynghyd â chyfleoedd sy'n seiliedig ar sgiliau.
Ar y campws cewch eich cefnogii drwy gydol eich astudiaethau gyda mynediad at ein hadnoddau a'n cyfleusterau o'r radd flaenaf. Mae'r rhain yn cynnwys ystafelloedd llyfrgell a chyfrifiaduron dynodedig, casgliadau Archif Richard Burton, ein hamgueddfa unigryw ar y campws, y Ganolfan Eifftaidd, Canolfan Celfyddydau Taliesin ac ardaloedd diwylliannol, stiwdios ffilmio a golygu â'r holl gyfarpar a labordai cyfieithu a chyfieithu ar y pryd.
Cyfleoedd Cyflogaeth Anrhydedd Cyfun
Mae'r rhaglen hon yn cynnig ystod eang o opsiynau gyrfa sy'n eich galluogi chi i ddilyn eich angerdd a llywio eich dyfodol.
Gyda gradd Anrhydedd Cyfun, byddwch yn datblygu eich set o sgiliau amlddisgyblaethol sy’n cynnwys sgiliau ymchwil, trefnu a meddwl yn agored rhagorol, yn ogystal â hyder wrth gyfleu gwybodaeth o amrywiaeth eang o bynciau a ffynonellau. Rydym yn disgwyl i’n graddedigion fod yn ystwyth, yn feddylwyr dadansoddol, yn fedrus wrth ymgymryd ag ymchwil ac i feddu ar set o sgiliau cadarn i ddatrys problemau, gan gynnwys y gallu i wneud penderfyniadau gwybodus. Bydd y rhaglen yn cynnwys amryw fathau o asesu a chewch eich annog i ddatblygu sgiliau gwaith tîm a chyfathrebu drwy seminarau, yn ogystal â sgiliau rheoli prosiectau ac ymchwil annibynnol fel rhan o'r modiwl traethawd hir/prosiect. Bydd y gallu eang hwn, ar y cyd ag ystwythder deallusol yn sicrhau y gallwch chi gystadlu'n llwyddiannus yn y farchnad waith os ydych am barhau â/neu ymgymryd â gyrfa ym maes:
- Astudiaethau pellach (Ôl-raddedig a Addysgir), ymchwil a byd academaidd, gan gynnwys unrhyw raglenni sy'n berthnasol i'r dyniaethau.
- Hyfforddiant proffesiynol pellach, a fydd yn dibynnu ar eu gallu i feddwl yn agored, bod yn hyblyg a bod ag ystwythder deallusol a sgiliau cyfathrebu a meddwl yn feirniadol.
- Sefydliadau rhyngwladol a rhanbarthol, gan gynnwys ysgolion, colegau, prifysgolion, llyfrgelloedd, amgueddfeydd, canolfannau ymchwil, cyrff anllywodraethol ac elusennau.
- Y sector cyhoeddus, er enghraifft, rolau mewn llywodraeth, cynghorau, mentrau cymdeithasol, cynghorau ymchwil.
- Y sector preifat, er enghraifft, swyddi ym meysydd ymarfer cyfreithiol, marchnata, recriwtio, hysbysebu, cysylltiadau cyhoeddus, cyhoeddi, adnoddau dynol, cyfathrebu, rheoli prosiectau, newyddiaduriaeth, golygu, ysgrifennu copi.
Hefyd bydd gennych chi fynediad at Academi Cyflogadwyedd Abertawe sy'n darparu cymorth cyflogadwyedd cynhwysfawr trwy gydol eich amser yn y Brifysgol a'r tu hwnt.
