Trosolwg o'r Cwrs
Mae gwleidyddiaeth yn golygu mwy na llywodraethau, mae'n ymwneud â phŵer, syniadau a newid. Mae ein gradd Gwleidyddiaeth israddedig yn sicrhau bod gennych chi'r offer i archwilio cwestiynau mawr: Pwy sy'n gwneud penderfyniadau? Sut mae cymdeithasau'n gweithio? Beth gallwch chi ei wneud er mwyn gwneud gwahaniaeth?
Mae gan wleidyddiaeth gysylltiad agos ag economeg, hanes, diwylliant a hunaniaeth (rhywedd, hil, dosbarth a dinasyddiaeth), yn ogystal â bod yn gysylltiedig â chwestiynau am werthoedd mewn cymdeithas. Drwy ein gradd BA (Anrh) mewn Gwleidyddiaeth, gallwch archwilio materion sy’n ymwneud â democrateiddio a dirywiad democrataidd, cydraddoldeb a hawliau dynol, arferion a gwerthoedd sy'n llywio cymdeithasau ac unigolion, yn ogystal â sut caiff polisïau cyhoeddus eu datblygu yng Nghymru, Prydain a thu hwnt.
Mae'r cyfle i ymgymryd ag interniaeth gydag Aelod o'r Senedd yn ystod ein modiwl Senedd Cymru, yn rhoi'r cyfle i ddysgu sut mae seneddau a seneddwyr yn gweithredu. Gallwch hefyd astudio'r modiwl Astudiaethau Seneddol Prydain, a gyflwynir yn rhannol gan staff arbenigol o Ddau Dŷ'r Senedd. Gall ein gradd BA (Anrh) mewn Gwleidyddiaeth arwain at amrywiaeth o bosibiliadau gyrfa cyffrous drwy eich helpu i ddatblygu sgiliau ymchwil a sgiliau dadansoddol, yn ogystal â gweithio'n gydweithredol tuag at nodau a rennir a sicrhau bod gennych chi'r priodoleddau graddedigion y mae cyflogwyr yn eu gwerthfawrogi.
Ymunwch â chymuned fywiog o feddylwyr ac ysgogwyr newid, archwiliwch faterion y byd go iawn, a datblygwch y sgiliau i ddylanwadu ar yfory. Os ydych chi'n credu bod y ffordd rydyn ni'n llywodraethu ein hun fel cymdeithas, sut rydym yn ymdrin â safbwyntiau amrywiol a sut y gallwn ymateb i heriau byd-eang yn bwysig, mae ein BA mewn Gwleidyddiaeth yn cynnig man cychwyn cyffrous ar gyfer eich taith deallusol a phroffesiynol.