Rydym yn falch o ddarparu profiad addysgol rhagorol, gan ddefnyddio'r dulliau dysgu ac addysgu mwyaf effeithiol, wedi'u teilwra'n ofalus i anghenion penodol eich cwrs. Ar wahân i nifer fach o gyrsiau ar-lein, mae'r rhan fwyaf o'n cyrsiau'n cynnwys addysgu wyneb yn wyneb ar y campws, gan alluogi ymgysylltiad llawn â'ch darlithwyr a'ch cyd-fyfyrwyr.
Mae sesiynau sgiliau ymarferol, seminarau gwaith labordy, a gweithdai yn bennaf yn cael eu cynnal wyneb yn wyneb ar y campws, gan ganiatáu gweithio mewn grŵp ac arddangosiadau. Rydym hefyd yn gweithredu labordai rhithwir ac Amgylcheddau Dysgu Efelychol a fydd yn hwyluso mwy o fynediad at gyfleoedd hyfforddi yn y dyfodol. Fodd bynnag, mae ein dulliau addysgu hefyd yn cynnwys defnyddio rhywfaint o ddysgu ar-lein i gefnogi a gwella addysgu wyneb yn wyneb traddodiadol.
Gall dysgu ar-lein ddigwydd ‘yn fyw’ gan ddefnyddio meddalwedd fel Zoom, sy'n eich galluogi i ryngweithio â'r darlithydd a myfyrwyr eraill ac i ofyn cwestiynau. Mae recordiadau darlithoedd hefyd yn caniatáu mwy o hyblygrwydd i ailedrych ar ddeunydd, i adolygu at asesiadau ac i wella dysgu y tu allan i'r ystafell ddosbarth. Mae gan rai modiwlau adnoddau ychwanegol ar Canvas, megis fideos, sleidiau a chwisiau sy'n galluogi astudiaeth hyblyg bellach.
Rydym yn defnyddio amrywiaeth o ddulliau addysgu drwy gydol y cwrs gradd Bydwreigiaeth. Byddwch yn cael budd o ddull dysgu hyblyg a chyfunol sy'n cynnwys darlithoedd, gweithdai, grwpiau trafod, cyflwyniadau, trafodaethau, gweminarau, tasgau dysgu grŵp ac unigol a sesiynau drwy gyfrwng y Gymraeg.
Caiff 50% o'r cwrs ei addysgu yn y brifysgol, a bydd hyn yn digwydd ddeuddydd yr wythnos fel arfer.
Rydym yn defnyddio amrywiaeth o ddulliau i asesu eich dysgu ym mhob modiwl bydwreigiaeth gan gynnwys traethodau gwaith cwrs, arholiadau ysgrifenedig, arholiadau cyfrifo cyffuriau, arholiadau cwestiynau amlddewis, arholiadau ymarferol OSCE, portffolio ymarfer a chyflwyniadau ar ffurf poster.
