Trosolwg o'r Cwrs
Bydd ein BSc mewn Peirianneg Adsefydlu yn rhoi'r hyfforddiant arbenigol sydd ei angen arnoch i ddechrau gyrfa werth chweil a medrus iawn yn y proffesiwn gofal iechyd fel peiriannydd adsefydlu.
Cewch ddysgu am gymhwyso egwyddorion peirianneg i ddatblygu datrysiadau a dyfeisiau technolegol i gynorthwyo unigolion ag anableddau a chyflyrau tymor hir.
Byddwch yn cyfuno gwaith academaidd manwl â sgiliau clinigol a thechnolegol ymarferol mewn ystod o leoliadau gofal iechyd arbenigol.
Dros y tair blynedd byddwch yn dysgu am ddylunio, adeiladu a phrofi ystod o dechnolegau cynorthwyol, gan gynnwys cadeiriau olwyn, aelodau artiffisial, cymhorthion robotig a seti arbenigol. Gan ddefnyddio systemau mapio gwasgedd, goniometrau, inclinomedr, rheolwyr ffon reoli a rhaglenwyr, byddwch yn dysgu adeiladu dyfeisiau safonol wedi'u gwneud yn arbennig, yn ogystal â dysgu am eu pwysigrwydd tuag at chwyldroi gofal ac annibyniaeth cleifion.
Mae peirianneg adsefydlu yn faes cyffrous, heriol sy'n esblygu'n barhaus ac sy'n gofyn am lefel uchel o gyfrifoldeb a sgil dechnegol. Fel peiriannydd adsefydlu, byddwch yn gweithio fel rhan o dîm adsefydlu gan gynnwys prosthetyddion ac orthotyddion, ffisiotherapyddion, therapyddion galwedigaethol, yn ogystal â chleifion a chlinigau mewn gwasanaethau acíwt a chymunedol.
Wrth i'ch gyrfa ddatblygu, cewch gyfleoedd gwych ar gyfer ymarfer uwch ac astudio ymhellach i lefel Meistr a doethurol.
