1. Hafan
  2. Israddedig
  3. Cyrsiau Israddedig
  4. Cyrsiau Israddedig Iechyd a Gofal Cymdeithasol
  5. Osteopatheg, Most

Osteopatheg, Most

Darganfyddwch Abertawe yn ein Diwrnod Agored nesaf

Cadwch le heddiw
Osteo

Trosolwg o'r Cwrs

Bydd y radd gychwynnol pedair blynedd hon mewn osteopatheg yn rhoi i chi’r wybodaeth, y sgiliau a’r profiad sydd eu hangen arnoch i ddod yn osteopath cofrestredig, sy'n gymwysedig i roi diagnosis a thrin ystod eang o faterion iechyd drwy therapi tylino, ymarferion sydd wedi'u teilwra, adsefydlu a chyngor.  

Byddwch yn meithrin dealltwriaeth drylwyr o anatomeg, ffisioleg, patholeg a seicoleg poen, ynghyd â thechnegau archwilio clinigol ardderchog, gan gyfuno gwaith academaidd manwl â sgiliau clinigol ymarferol eang. 

Pam Osteopathi ym Mhrifysgol Abertawe?

Mae'r rhaglen hon wedi cael ei chymeradwyo gan y Cyngor Osteopathig Cyffredinol, gan eich galluogi chi i gofrestru i gyflwyno cais i ymarfer ar ôl graddio. 

Mae gennym enw da rhagorol, ac rydym yn y safle 1af yn y DU am Broffesiynau Iechyd (Guardian University Guide, 2026). 

Mae cyfleusterau o'r radd flaenaf yr Ysgol Iechyd a Gofal Cymdeithasol yn cynnwys Clinig Osteopatheg amlddisgyblaethol yn yr Academi Iechyd a Llesiant arobryn a gynhelir gan aelodau staff cysylltiol sy'n osteopathiaid cymwysedig wrth eu gwaith. Mae hyn yn rhoi amgylchedd diogel, sy'n cael ei oruchwylio i chi feithrin eich sgiliau a'ch hyder wrth i chi roi eich gwybodaeth ddamcaniaethol ar waith. 

Byddwch hefyd yn astudio modiwlau datblygu busnes os ydych chi'n bwriadu agor eich practis eich hun. 

Eich Profiad ym Maes Osteopatheg

Byddwch chi'n dysgu mewn mannau addysgu pwrpasol ar draws ein Campws Singleton. Byddwch yn cael llawer o'ch sesiynau dysgu ymarferol ac ar sail sgiliau yn Adeilad Glyndŵr ac Adeilad Grove, sy'n gartref i ystafelloedd ymarfer a adeiladwyd yn bwrpasol sy’n cynnwys phlinthau triniaeth, modelau anatomegol a chyfarpar archwiliad clinigol. Byddwch hefyd yn treulio amser yn labordy anatomegol yr Ysgol Feddygaeth i wella eich dealltwriaeth o strwythur a gweithrediad. 

Byddwch yn cwblhau eich lleoliad gwaith clinigol yn yr Academi Iechyd a Llesiant , ein clinig hygyrch ar y safle ym Mharc Singleton. Dyma lle byddwch chi'n gweithio gyda chleifion go iawn mewn lleoliad cefnogol, dan oruchwyliaeth. Yn eich blwyddyn gyntaf, byddwch yn dechrau gan arsylwi ar waith y clinig cyn cael mwy o gyfrifoldeb yn raddol. Ar draws y rhaglen pedair blynedd, byddwch yn cwblhau o leiaf 1,000 awr o ymarfer clinigol, wedi’i ategu gan sesiynau clinig sydd wedi'u hamserlennu. Byddwch yn cael eich rhoi mewn grŵp clinig cyn dechrau pob blwyddyn academaidd. 

Caiff sgiliau ymarferol osteopatheg eu haddysgu mewn gofod ymarfer mawr, llawn offer, sydd â mynediad at gyfarpar TG a byrddau gwyn, gan gefnogi sesiynau a addysgir a dysgu annibynnol. Mae ystafell ymneilltuo cyfagos yn rhoi lle i chi ymarfer technegau, myfyrio ar adborth ac astudio gyda'ch cyd-fyfyrwyr. 

Byddwch yn cael eich addysgu gan ddarlithwyr ar draws y Brifysgol mewn meysydd fel moeseg feddygol a'r gyfraith, seicoleg iechyd, cyfraith busnes a marchnata. Mae siaradwyr gwadd hefyd yn cyfrannu gwybodaeth arbenigol, gan ehangu eich dealltwriaeth o ymarfer proffesiynol a datblygu eich sgiliau trosglwyddadwy. 

Yn yr Academi Iechyd a Llesiant, mae tiwtoriaid clinigol yn rheoli'r clinig osteopatheg ac yn darparu goruchwyliaeth a mentora agos trwy gydol eich lleoliad gwaith. Maen nhw'n goruchwylio’r holl ofal i gleifion ac yn sicrhau bod eich ymarfer yn bodloni’r Safonau Ymarfer Osteopatheg, gan eich helpu i dyfu'n ymarferydd hyderus, galluog. 

Gyrfaoedd Osteopathi

Ar ôl i chi raddio o'r cwrs Meistr mewn Osteopatheg (M.Ost), byddwch yn camu i'r proffesiwn â sgiliau trosglwyddadwy cryf sy'n eich paratoi ar gyfer ystod eang o lwybrau gyrfa. Trwy gydol eich hyfforddiant, byddwch yn datblygu'r hyder i weithio ochr yn ochr â gweithwyr iechyd proffesiynol eraill, gan ennill profiad mewn amgylcheddau rhyngbroffesiynol ac aml-asiantaeth sy'n adlewyrchu ymarfer clinigol modern. 

Byddwch yn meithrin sgiliau cyfathrebu a rhyngbersonol ardderchog, gan eich helpu i weithio'n effeithiol gyda chleifion, teuluoedd, gofalwyr a chydweithwyr. Mae ymarfer myfyriol yn rhan bwysig o'ch dysgu, gan gefnogi eich datblygiad fel ymarferydd diogel ac addasadwy sy'n ymrwymedig i ddatblygiad proffesiynol parhaus. 

Mae'r sgiliau hyn yn agor drysau i ystod o lwybrau gyrfa. Mae llawer o'n graddedigion yn mynd ymlaen i fod yn osteopathiaid  hunangyflogedig, gan weithio fel cymdeithion mewn clinigau sefydledig neu sefydlu eu practis eu hunain. Mae eraill yn dewis gweithio mewn lleoliadau gofal iechyd amlddisgyblaethol, lle mae osteopathiaid yn cyfrannu at wasanaethau lles ac adsefydlu ehangach. Mae nifer llai o raddedigion yn dilyn gyrfaoedd mewn meysydd megis ymchwil, addysgu, y GIG, neu rolau sy'n cefnogi datblygiad ac arloesi mewn gwasanaethau. 

Os oes gennych feddylfryd entrepreneuraidd, mae'r M.Ost yn rhoi sylfaen gref i chi greu a thyfu gwasanaethau iechyd a lles newydd. Gyda’i ffocws ar feddwl yn feirniadol, hyblygrwydd a gofal sy'n canolbwyntio ar y claf, mae'r rhaglen yn rhoi'r sgiliau i chi fodloni gofynion datblygol gofal iechyd a llunio gyrfa wobrwyol sy’n gwneud gwahaniaeth. 

Modiwlau

Rydym wrthi'n adolygu ein cwricwlwm i wella eich profiad dysgu ac ymgorffori sgiliau a fydd o fudd i'ch gyrfa yn y dyfodol. Mae hyn yn golygu y gall rhai modiwlau newid.

Gofynion Mynediad

Bydd y Brifysgol yn ystyried ceisiadau gan fyfyrwyr sy'n cynnig ystod eang o gymwysterau.

Ymgeisio

Darganfyddwch eich prifysgol

Ewch ar rithdaith

Two students walking around campus

Prosbectws Israddedig

Prosbectws Israddedig

Astudio trwy'r Gymraeg

welsh medium

Sgwrsiwch â Myfyriwr Cyfredol

Dau fyfyriwr wrth gyfrifiadur
Cynigion wedi'u gwarantu*
Ymwadiad Rhaglen

Osteopatheg, Most