Sut i wneud cais

Rhaid gwneud pob cais ar gyfer gradd israddedig llawn-amser drwy UCAS, Gwasanaeth Derbyn y Prifysgolion a'r Colegau. Dylech hefyd ddefnyddio UCAS os hoffech drosglwyddo o un brifysgol i brifysgol arall.

Nodwch fod UCAS yn codi ffi o £28.50 i wneud cais i hyd at bump dewis prifysgol. Mae'r ffi yn cael ei hepgor i fyfyrwyr sydd wedi cael prydau ysgol am ddim ar ryw adeg yn ystod y chwe blynedd diwethaf (yn ystod eich addysg uwchradd). Ceir rhagor o wybodaeth ar wefan UCAS.

Llenwi'ch ffurflen UCAS

Cofiwch

• Gwnewch gais ar-lein yn www.ucas.ac.uk
• Ein henw sefydliad a'n cod UCAS yw SWAN S93
• Gellir gadael cod y campws yn wag oni bai eich bod yn gwneud cais am gyrsiau Nyrsio a leolir ym Mharc Dewi Sant, Caerfyrddin (B740 & B760) lle gallwch roi 'T'.
• Y dyddiad cau ar gyfer cyrsiau sy'n dechrau yn 2025 yw 29 Ionawr 2025 am 6pm. Rydym yn falch o ystyried ceisiadau ar ôl y dyddiad hwn ar gyfer y rhan fwyaf o raglenni.

Cael Cymorth

Gall y ffynonellau canlynol eich helpu gyda’r proses o wneud cais:

• Eich ysgol neu goleg
• Os ydych yn fyfyriwr rhyngwladol gallwch gael cymorth gan eich Swyddfa Cyngor Prydeinig leol
• Sut i wneud cais  (UCAS)
• UCAS (ar gyfer ymgeiswyr hŷn yn ogystal â'r rhai sy'n gadael yr ysgol a'r coleg)
• Cynghorwyr gyrfaoedd
• Tiwtoriaid Derbyn

Gall myfyrwyr rhyngwladol gyflwyno cais uniongyrchol i ni am ddim.

Dewch o hyd i wybodaeth am ofynion mynediad, ewch i dudalen eich gwlad lle gallwch hefyd ddysgu mwy am ffioedd dysgu a symud i Abertawe.

Ceir manylion pellach ar ein tudalennau Ryngwladol.

Ceir disgrifiadau manwl o’r cyrsiau ar y tudalennau cyrsiau. Gallwch weld a lawrlwytho copi o'n prosbectws digidol ar ein tudalen we prosbectws israddedig, ac oddi yno gallwch hefyd ofyn am gopi print o'r prosbectws gael ei anfon atoch yn y post.

Ceir gwybodaeth ynglŷn â gofynion mynediad ar y tudalennau cyrsiau

Os nad yw’ch cymwysterau wedi’u rhestru, cysylltwch â’r Swyddfa Derbyniadau i gael mwy o wybodaeth.

Rydym yn hapus i ystyried ceisiadau i ohirio mynediad ar gyfer y rhan fwyaf o raglenni israddedig. Mae rhai eithriadau’n berthnasol, yn enwedig y cyrsiau mwy cystadleuol, megis Meddygaeth i Raddedigion.

Ar gyfer pob cwrs arall, mae croeso i chi wneud cais trwy UCAS am gwrs sy’n dechrau’r flwyddyn ganlynol, neu gallwch wneud cais am fynediad gohiriedig yn ystod y cylch ymgeisio.

Mae’r Brifysgol yn croesawu ceisiadau gan bobl o bob oed, a bydd y ceisiadau’n cael eu hystyried yn ôl eu teilyngdod unigol. Os cynigir lle i ymgeisydd a fydd yn iau na 18 oed adeg ei dderbyn, bydd gweithdrefnau deddfwriaethol penodol yn angenrheidiol er mwyn cyflawni dyletswydd gofal y Brifysgol dros fyfyrwyr.

Nid oes terfyn oed uchaf ar gyfer ceisiadau, er mae gan y Brifysgol gyfrifoldeb i sicrhau bod y buddsoddiad a wneir gan arian cyhoeddus mewn perthynas â hyfforddiant y GIG ar gyfer rhaglenni penodol, yn cael ei wireddu o ran hyd gwasanaeth yn y gwasanaeth iechyd.

Rydym yn croesawu ymgeiswyr efallai nad ydynt wedi dod yn uniongyrchol o’r ysgol neu’r coleg, sy’n dymuno dychwelyd i addysg yn ystod camau gwahanol eu bywydau.

Efallai y bydd gofyn i chi ddarparu gwybodaeth ychwanegol ar ffurf trawsgrifiadau, geirdaon academaidd (os nad ydynt eisoes wedi cael eu darparu) neu wybodaeth am gymwysterau eraill sydd gennych. Wrth ddarparu’r wybodaeth hon, mae’n rhaid cynnwys eich Rhif Adnabod Personol UCAS a’r cwrs/cyrsiau rydych wedi gwneud cais amdanynt.

Os ydych yn dymuno anfon mwy o wybodaeth am newid mewn amgylchiadau, newid i gymwysterau academaidd, neu fanylion ynglŷn ag amgylchiadau eithriadol a all effeithio ar eich cais, gofynnwn i chi gynnwys eich Rhif Adnabod Personol a manylion y cwrs hefyd.

Bydd ceisiadau ar gyfer mynediad i’r ail flwyddyn yn cael eu hystyried ar sail achosion unigol ar gyfer y rhan fwyaf o raglenni, os oes llefydd ar gael.

Os hoffet ti gyflwyno cais am fynediad yn yr ail flwyddyn, mae'n bwysig dy fod yn darparu cymaint o wybodaeth â phosib i ni. Fel arfer, os wyt ti'n trosglwyddo o brifysgol arall, bydd angen i ni weld manylion am yr holl fodiwlau rwyt ti'n eu hastudio yn dy brifysgol bresennol. Fel hyn, gallwn sicrhau y byddi di'n gallu symud yn ddi-drafferth i'n hail flwyddyn.

Ni allwn ystyried ceisiadau i drosglwyddo i drydedd flwyddyn unrhyw raglen.

Os oes gennych anabledd, cyflwr meddygol, neu anhawster dysgu penodol, efallai y byddwn yn gofyn i Swyddog Anabledd neu Gyfarwyddwr Iechyd Galwedigaethol y Brifysgol i gyfweld â chi er mwyn i ni fod yn siwr y gallwn roi’r cymorth sydd ei angen arnoch trwy gydol eich astudiaethau.

Beth am gofnod troseddol? Gofynnir i fyfyrwyr ddatgelu euogfarnau’n unol â’n Polisi Euogfarnau Troseddol. Gofynnir i fyfyrwyr nad ydynt yn astudio ar gyrsiau wedi’u rheoleiddio sy’n cynnwys gweithio gyda phlant a/neu oedolion agored i niwed ddarparu manylion neu euogfarnau perthnasol sydd heb eu disbyddu yn unig. Ni fyddwn yn gofyn am yr wybodaeth hon nes bod cynnig wedi’i wneud

Rydym yn cynnal nifer o Ddiwrnodau Agored bob blwyddyn ac rydym ni'n annog pawb i ymweld.

Os nad ydych yn gallu ymweld â’r Brifysgol ar un o’r diwrnodau penodol, mae croeso i chi ymweld â’r Brifysgol yn annibynnol ar unrhyw adeg, gan nad yw mynediad i’r Brifysgol yn gyfyngedig. Mae pecyn taith hunandywysedig ar gael, ebostiwch y swyddfa Recriwtio Myfyrwyr i wneud cais am becyn.

Mae’r ffïoedd a godir ar gyfer astudio ym Mhrifysgol Abertawe yn perthyn i un o ddau gategori yn gyffredinol: 

• Cartref
• Rhyngwladol

Dim ond categorïau penodol o fyfyrwyr a fydd yn talu’r ffïoedd Cartref. Mae statws ffioedd yn dibynnu ar sawl ffactor, gan gynnwys cenedligrwydd, statws mewnfudo a hanes preswylio.

Ar ei ben ei hun, nid yw byw yn y DU am dair blynedd yn golygu y byddwch chi’n gymwys am ffioedd ‘cartref’.

I wybod a ydych chi’n dod dan y categorïau hyn, ewch i wefan UKCISA sy’n cynnwys cyngor ac arweiniad arbenigol ar bynciau allweddol sy’n gysylltiedig ag addysg ryngwladol.

Os ydych chi’n parhau i fod yn ansicr am y categori ffioedd sy’n berthnasol i chi, efallai y byddwch chi am gysylltu â ni er mwyn i ni allu eich cefnogi i ganfod eich statws ffioedd.

Mae Prifysgol Abertawe yn cynnig amrywiaeth o Ysgoloriaethau ar gyfer cyflawniadau academaidd a chwaraeon, yn ogystal ag ysgoloriaethau i astudio trwy gyfrwng y Gymraeg ac ysgoloriaethau adrannol.

Os yw'ch cais yn aflwyddiannus, fe allech chi gysylltu â ni, a byddwn yn ceisio rhoi adborth i chi a allai fod o gymorth wrth wneud ceisiadau yn y dyfodol.

Os ydych chi'n anhapus ynglŷn â sut y cafodd eich cais ei drin, fe allech chi wneud cwyn swyddogol. Darllenwch y Polisi Cwynion ac Apeliadau- Complaints and Appeals Policy Welsh yma.

Os ydych yn anghytuno â phenderfyniad a wnaed ar eich cais, fe allech chi apelio. Darllenwch y Polisi Cwynion ac Apeliadau- Complaints and Appeals Policy Welsh am ragor o wybodaeth.