Ein Gwasanaethau Llyfrgell Cynhwysol

Mae'r llyfrgell yn cefnogi'r brifysgol yn ei hamcan i wireddu potensial yr holl fyfyrwyr a staff beth bynnag fo'u nodwedd warchodedig (oedran, rhyw, hil, ailbennu rhywedd, anabledd, cyfeiriadedd rhywiol, priodas neu bartneriaeth sifil, beichiogrwydd a mamolaeth, crefydd a chred).

Gall yr holl fyfyrwyr ddefnyddio ein gwasanaeth Cais a Chasglu. Gallai hyn fod yn arbennig o ddefnyddiol i ddiwallu anghenion y rhai sy'n ddysgwyr rhan-amser, yn byw ymhell o'r campws, yn dysgu wrth weithio, ar leoliad gwaith, yn anabl neu y mae ganddynt gyfrifoldebau gofalu.

Technoleg gynorthwyol

Mae offerynnau cynhyrchiant ar gael ar bob cyfrifiadur campws

A classroom with desks and PCs. All the PCs are switched on and showing the login screen.

Canllawiau i Lyfrgell Parc Singleton a Llyfrgell y Bae

Mewn cydweithrediad ag Ymarferwyr Cyflwr Sbectrwm Awtistig Prifysgol Abertawe, mae Gwasanaethau Gwybodaeth a Systemau wedi creu Canllaw Hygyrch i Llyfrgell Parc Singleton ac un ar gyfer Llyfrgell y Bae. Mae'r canllawiau wedi'u hysgrifennu ar gyfer unrhyw un sydd efallai yn poeni am ddod i'r llyfrgell. Mae hefyd yn amlygu agweddau ar yr adeiladau a allai fod yn her i fyfyrwyr ar y sbectrwm awtistig.

Mae canllaw Llyfrgell Parc Singleton ar gael yma ar ffurf PDF.

Mae canllaw Llyfrgell y Bae ar gael yma ar ffurf PDF.

Desgiau ag uchder addasadwy

Mae rhai desgiau y gellir addasu eu huchder ar gael yn Llyfrgell y Bae a Llyfrgell Parc Singleton. Gallwch addasu uchder y desgiau'n electronig i greu man astudio mwy cyffyrddus a hygyrch. Mae gan ddefnyddwyr anabl flaenoriaeth i'r desgiau hyn. Gofynnwch wrth y ddesg fenthyca lle mae'r desgiau hyn.

Hyfforddiant Sgiliau Ymchwil Pwnc-Benodol

Gallwch gael cymorth gan y llyfrgell ar ddefnyddio e-adnoddau a sgiliau ymchwil ar gyfer eich pwnc. Mae Hafan eich Canllaw i'r Llyfrgell yn cynnwys gwybodaeth am ddosbarthiadau Sgiliau Llyfrgell a dolenni i drefnu apwyntiad os oes angen cymorth un-i-un arnoch. Cysylltwch â Llyfrgelloedd a Chasgliadau os oes angen cymorth arnoch wrth ddod o hyd i'ch Canllaw i’r Llyfrgell.

Adnewyddu awtomatig

Caiff y rhan fwyaf o eitemau eu hadnewyddu'n awtomatig ar eich cyfer, oni bai bod rhywun arall wedi gwneud cais amdanynt. Ewch i'n tudalen benthyca, adnewyddu a chadw eitemau am wybodaeth lawn.

Sylwer, ni chaiff eitemau benthyciad byr, benthyciadau 24 awr, traethodau ymchwil, benthyciadau o liniaduron, neu unrhyw eitemau sydd wedi'u fenthyg gan fenthycwyr allanol eu hadnewyddu yn awtomatig. Gall eithriadau eraill hefyd fod yn berthnasol.

Gliniaduron

Mae gliniaduron ar gael yn Llyfrgelloedd y Bae a Singleton y gall unrhyw fyfyriwr eu benthyg am gyfnod benthyca pythefnos o hyd, gan ddibynnu ar argaeledd. Gweler ein tudalen we am ragor o wybodaeth am Loceri Gliniaduron am ragor o wybodaeth am fenthyca gliniadur. Sylwer, ni ellir adnewyddu benthyciadau gliniaduron.

E-lyfrau

Mae gennym nifer o gasgliadau e-lyfrau ar gael ym Mhrifysgol Abertawe. Mae ein holl e-lyfrau’n ymddangos yn iFind, catalog y llyfrgell.

Mae gennym ganllaw ar gael sy’n egluro sut i ganfod a chael mynediad at yr e-lyfrau drwy iFind. Yn ogystal mae’r canllaw hefyd yn edrych ar nodweddion ein tri phrif ddarparwr e-lyfrau – VLE Books, EBSCO eBooks a ProQuest Ebook Central.

Mae e-lyfrau’n cynnig mynediad oddi ar y campws cyfleus i fyfyrwyr sydd ddim yn gallu ymweld â’r llyfrgell yn rheolaidd. Gellir arbed neu argraffu nifer cyfyngedig o dudalennau o bob e-lyfr (cyfyngiadau oherwydd deddfwriaeth hawlfraint). Mae ein prif lwyfannau e-lyfrau yn cynnig y gallu i chwilio o fewn testun y llyfr a gwneud nodiadau ar gyfer y dyfodol.

Casgliad Lles

Mae gennym gasgliad arbennig o lyfrau bibliotherapi wedi'u dethol gan y Gwasanaeth Lles. Mae'r llyfrau'n cynnig hunangymorth arbenigol ar amrywiaeth eang o broblemau. Mae'r Casgliad Lles ar gael i bob myfyriwr ac aelod o staff. Gallwch ddod o hyd i'r llyfrau yn yr Ardal Astudio ar Lefel 1 - Gorllewin yn Llyfrgell Parc Singleton ac yn y Gornel Les gerllaw'r pod astudio grŵp yn Llyfrgell y Bae. Hefyd, mae fersiynau e-lyfr ar gael i rai ohonynt.

Mae rhestr lawn o deitlau'r Casgliad Lles ar gael ar-lein. Gallwch:

bori yn ôl categori
gwirio lleoliad y llyfr ac os yw ar gael drwy glicio ar y teitl
defnyddio'r dull Gwneud Cais i gasglu llyfr o lyfrgell wahanol ym Mhrifysgol Abertawe
darllen e-lyfr drwy glicio ar y ddolen i weld y Testun Llawn

Yn ogystal â'r Casgliad Lles, mae detholiad o deitlau ffuglen. Gall darllen er pleser fod yn ffordd effeithiol o leddfu straen. Am rhagor o wybodaeth am fuddion darllen er pleser, gweler ein tudalennau Darllen yn well.

Gwasanaethau Llyfrgell i fyfyrwyr gydag Anghenion Penodol

Gwasanaethau i fyfyrwyr gydag anableddau, cyflwr meddygol neu unrhyw anghenion eraill

Ein nod yw sicrhau bod ein gwasanaethau llyfrgell yn gynhwysol i bawb, ond sylweddolwn fod rhai myfyrwyr yn elwa o gyfleusterau penodol y gallwn eu cynnig yn ôl yr angen. Gellir cynnig y gwasanaethau a’r cyfleusterau a fanylir arnynt isod i fyfyrwyr sydd ag anghenion neilltuol a adnabuwyd yn dilyn asesiad gan y Gwasanaeth Lles ac Anabledd. Cysylltwch â'r Gwasanaeth Lles ac Anabledd os credwch y gallech chi elwa o un o’r opsiynau isod.

Fformatau gwahanol

Os oes gennych anabledd print (gwybyddol neu gorfforol), efallai bod gennych hawl i gael mynediad at lyfrau, nodiadau darlithoedd a deunyddiau eraill mewn fformat gwahanol. Er enghraifft, efallai y rhoir copi PDF o lyfr i chi os oes gennych anabledd sy'n eich atal rhag trin copi print, neu os oes gennych anhawster dysgu penodol sy'n golygu y byddech yn elwa o allu ddefnyddio meddalwedd darllen sgrin gyda'r testun. Darperir fformatau gwahanol gan y Ganolfan Drawsgrifio, ond y Gwasanaeth Lles ac Anabledd sy'n awdurdodi'r gwasanaeth. Cysylltwch â'r Gwasanaeth Lles ac Anabledd os credwch y byddech yn elwa o'r gwasanaeth hwn.

Mae gan bob cyfrifiadur mynediad agored ar gampws amrediad o offer technoleg gynorthwyol, gan gynnwys meddalwedd testun-i-lais, efallai bydd o gymorth hefyd.

Cyfarpar arbenigol i'w benthyca

Gallwch fenthyg y cyfarpar canlynol o'r Ddesg Wybodaeth yn y Llyfrgell. Os nad yw’r darn o gyfarpar y mae ei angen arnoch ar gael yn y llyfrgell ar eich campws chi, gall staff drefnu iddo gael ei drosglwyddo i chi.

Recordwyr Llais Digidol
Dolenni clyw is-goch
Benthyciadau gliniaduron am gyfnod estynedig

Bydd angen eich cerdyn adnabod y brifysgol a ffurflen wedi’i chwblhau gan y Gwasanaeth Lles ac Anabledd arnoch i fenthyg unrhyw ddarnau o gyfarpar o'r rhestr uchod, a bydd yn rhaid i chi gwblhau Cytundeb Benthyg Cyfarpar.

Defnyddio ystafelloedd adnoddau nam ar y golwg

Mae man astudio benodedig ar gael ar Lefel 3 Llyfrgell Parc Singleton lle gall myfyrwyr â nam ar eu golwg a'u cynorthwywyr weithio. Mae gan yr ystafell cyfarpar arbenigol ar gyfer myfyrwyr penodol, a rhaid bod cardiau adnabod y myfyrwyr wedi'u rhaglenni i alluogi mynediad i'r ystafell. Os oes gennych chi angen wedi nodi i gael mynediad i'r ystafell, bydd staff yn y Ganolfan Trawsgrifio yn trefnu i roi mynediad ar eich cerdyn.

Yn Llyfrgell y Bae, mae man astudio benodedig ar gyfer myfyrwyr â nam ar eu golwg yn gefn y brif neuadd astudio, ar y chwith.

Loceri

Mae loceri ar gael i fyfyrwyr sydd wedi nodi angen yn eu hasesiad. Mae loceri wedi'u leoli ger y ciosgau hunan-fenthyca yn agos i'r Ddesg Croeso yn Llyfrgell Parc Singleton, a ger y fynedfa i Adain y De yn Llyfrgell y Bae. Ewch i'r Ddesg Wybodaeth yn Llyfrgell Parc Singleton neu Lyfrgell y Bae gyda'r ffurflen o'r Gwasanaeth Lles ac Anabledd er mwyn neilltuo locer ar eich cyfer.

Aelodaeth o'r Llyfrgell i gynorthwywyr

Gall cynorthwywyr gael cyfleusterau benthyca eu hunain yn y Llyfrgell. Ewch i'r Ddesg Wybodaeth yn Llyfrgell Parc Singleton neu Lyfrgell y Bae i drefnu hyn.