Peirianneg Strwythurol, MSc

Nodyn ar gyfer ymgeiswyr rhyngwladol ac Ewropeaidd: gellir dod o hyd i fanylion ynghylch sut mae eich cymhwyster yn cymharu â’r gofynion mynediad academaidd sydd wedi'u cyhoeddi ar ein tudalen Gofynion Mynediad Gwledydd Penodol.

Fel arfer, gofynion mynediad y cwrs MSc Peirianneg Strwythurol yw gradd anrhydedd dosbarth cyntaf neu ail ddosbarth mewn Peirianneg Sifil neu Beirianneg Strwythurol, neu ddisgyblaeth beirianneg neu wyddonol berthnasol debyg.

Rydym yn croesawu ceisiadau gan ddarpar fyfyrwyr o bob cwr o'r byd ac yn chwilio am dystiolaeth o astudiaethau blaenorol sy'n cyfateb i'r gofynion mynediad a nodwyd uchod. Mae'r Swyddfa Derbyn Ôl-raddedig yn fwy na pharod i roi cyngor i chi ar b'un a yw eich cymwysterau yn bodloni gofynion mynediad y cwrs yr hoffech ei astudio. Anfonwch neges e-bost i admissions@swansea.ac.uk i gael rhagor o wybodaeth.

Os nad Saesneg yw eich iaith gyntaf bydd angen marc llwyddo derbyniol mewn cymhwyster Saesneg cymeradwy arnoch er mwyn gwneud yn siŵr y byddwch yn gallu manteisio i'r eithaf ar eich astudiaethau yn Abertawe. Rydym yn ystyried amrywiaeth eang o gymwysterau, gan gynnwys Prawf Saesneg Prifysgol Abertawe, prawf IELTS y British Council (gyda sgôr o 6.5 a 5.5 o leiaf ym mhob elfen). Ceir rhestr lawn o brofion Saesneg derbyniol yn:
https://www.swansea.ac.uk/admissions/english-language-requirements

Mae'r rhaglenni MSc arfaethedig yn dilyn y llwybr traddodiadol o fodiwlau a gaiff eu haddysgu drwy ddarlithoedd a phrosiect ymchwil unigol.

Yn gyffredinol, caiff modiwlau a addysgir eu cyflwyno drwy ddarlithoedd, seminarau ar bynciau penodol, gweithdai, tiwtorialau a thrafodaethau grŵp. Bydd digon o gyfleoedd i fyfyrwyr wneud gwaith hunanastudio dan arweiniad drwy ddefnyddio dulliau datrys problemau ffurfiannol, yn unigol ac mewn grwpiau. Caiff darlithwyr gwadd eu gwahodd i siarad â'r myfyrwyr hefyd. Gall darlithwyr ddefnyddio dulliau dysgu cyfunol, dysgu wyneb-i-waered a/neu recordio darlithoedd.

Mae'r prosiectau ymchwil a gynigir gan aelodau staff sy'n arbenigo mewn Peirianneg Strwythurol yn rhoi cyfle i'r myfyrwyr ddewis pwnc sy'n eu diddori. Caiff pob myfyriwr ei oruchwylio'n unigol gan oruchwylydd academaidd yn ystod y prosiect ymchwil, a gaiff ei asesu drwy draethawd ymchwil. Mae'r gwaith ymchwil yn cynnwys adolygiad o lenyddiaeth, gwaith labordy, arolygu, ymweliad safle a dadansoddiad cyfrifiadurol.

Rhywfaint o ddarpariaeth

Darperir rhai elfennau o'r cwrs ôl-raddedig hwn trwy gyfrwng y Gymraeg ond nid oes digon o ddarpariaeth eto i gyrraedd 40 credyd ym mhob blwyddyn. Gall Cyfarwyddwr Rhaglen amlinellu union natur y ddarpariaeth cyfrwng Cymraeg.

Mae Academi Hywel Teifi yma i'th gefnogi trwy gydol dy amser ym Mhrifysgol Abertawe. Rydym yn cynnig:

• Mynediad at ysgoloriaethau a bwrsariaethau ar gyfer astudio trwy gyfrwng y Gymraeg.
• Mynediad at ap Arwain er mwyn derbyn y diweddaraf am ein cyrsiau a'n modiwlau cyfrwng Cymraeg. Gelli lawrlwytho'r ap am ddim drwy'r App Store a Google Play.
• Cyfweliad trwy gyfrwng y Gymraeg wrth wneud cais am le.
• Gohebiaeth bersonol yn Gymraeg, yn Saesneg neu'n ddwyieithog.
• Cyfle i lunio a chyflwyno gwaith cwrs neu sefyll arholiadau trwy gyfrwng y Gymraeg (hyd yn oed os wyt ti wedi dewis astudio yn Saesneg), a bydd dy waith yn cael ei asesu yn Gymraeg.
• Tiwtor Personol Cymraeg ei iaith.
• Cefnogaeth un i un i wella dy sgiliau Cymraeg academaidd.
• Cyfle i ennill cymhwyster ychwanegol sy'n dystiolaeth o dy allu Cymraeg i gyflogwyr y dyfodol.
• Aelodaeth o Gangen Prifysgol Abertawe o'r Coleg Cymraeg Cenedlaethol.

Cer i'r dudalen Mae Gen i Hawl am wybodaeth bellach am hawliau iaith Gymraeg myfyrwyr.

Bydd parhau i astudio trwy'r Gymraeg yn:

• ddatblygiad naturiol i ti os wyt ti wedi astudio trwy'r Gymraeg ar lefel israddedig.
• ffordd o sicrhau dy gyfle i gael yr addysg orau.
• ffordd o dderbyn lefel uchel o gefnogaeth wrth i'r grwpiau astudio fod yn llai.
• ychwanegiad gwerthfawr i dy CV a dy ddatblygiad gyrfaol.

Caiff y cwrs MSc mewn Peirianneg Strwythurol ym Mhrifysgol Abertawe ei achredu gan Gyd-fwrdd Cymedrolwyr  (JBM), sy'n cynnwys Sefydliad y Peirianwyr Sifil (ICE), Sefydliad y Peirianwyr Strwythurol (IStructE), Sefydliad Siartredig Priffyrdd a Thrafnidiaeth (CIHT), Sefydliad y Peirianwyr Priffyrdd (IHE). a’r Permanent Way Institution (PWI). Caiff y cwrs ei achredu ar ran y Cyngor Peirianneg er mwyn rhannol fodloni'r gofyniad addysgol ar gyfer Dysgu Pellach i gael eich cofrestru'n Beiriannydd Siartredig gan y Cyngor Peirianneg.

Mae achrediad yn nod sicrwydd bod y radd yn cyrraedd y safonau a nodir gan y Cyngor Peirianneg yn y ddogfen, UK Standard for Professional Engineering Competence (UK-SPEC). Bydd astudio ar gyfer y radd achrededig hon yn rhoi rhywfaint o'r wybodaeth, y ddealltwriaeth a'r sgiliau sylfaenol sydd eu hangen arnoch i fod yn Beiriannydd Siartredig. Mae'n well gan rai cyflogwyr recriwtio unigolion o raddau achrededig, ac mae gradd achrededig yn debygol o gael ei chydnabod gan wledydd eraill sydd wedi llofnodi cytundebau rhyngwladol.

Ewch i www.jbm.org.uk i gael rhagor o wybodaeth.

Cewch eich addysgu gan ddarlithwyr o’r radd flaenaf sy’n ymchwilwyr brwd. Mae eu meysydd arbenigedd ymchwil yn cynnwys Ynni a'r Amgylchedd, Peirianneg Gyfrifiadol, Solidau, Strwythurau a Systemau Cypledig, Deunyddiau ac Ymarfer Cynaliadwy a Pheirianneg Trafnidiaeth.

Gweler yr holl staff Peirianneg Sifil yma.

 

Mae ffioedd dysgu ar gyfer blynyddoedd o astudiaeth ar ôl eich blwyddyn gyntaf yn amodol ar gynnydd o 3%.

Gallwch ddod o hyd i ragor o wybodaeth am ffioedd a sut i dalu ar ein tudalen ffioedd dysgu.

Efallai y byddwch yn gymwys i gael arian i helpu i gefnogi eich astudiaethau. I gael gwybod am ysgoloriaethau, bwrsariaethau a chyfleoedd cyllido eraill sydd ar gael, ewch i dudalen ysgoloriaethau a bwrsariaethau'r Brifysgol.

Myfyrwyr cyfredol: Gallwch ddod o hyd i ragor o wybodaeth am ffioedd a sut i dalu ar ein tudalen ffioedd dysgu.

Mae’n bosib eich bod yn gymwys i gael cymorth ariannol tuag at eich astudiaethau.

Os ydych yn fyfyriwr y DU neu'r UE sy’n dechrau ar radd Meistr ym Mhrifysgol Abertawe, efallai y byddwch yn gymwys i gyflwyno cais am arian gan y Llywodraeth i helpu tuag at gostau eich astudiaethau. I gael mwy o wybodaeth, ewch i'n tudalen benthyciadau Ôl-raddedig.

I gael gwybod am ysgoloriaethau, bwrsariaethau a chyfleoedd eraill am gymorth ariannol sydd ar gael, ewch i dudalen ysgoloriaethau a bwrsariaethau'r Brifysgol.

Mae ysgoloriaethau a bwrsariaethau hael ar gael gan Academi Hywel Teifi, Prifysgol Abertawe a’r Coleg Cymraeg Cenedlaethol ar gyfer myfyrwyr sy'n dymuno astudio trwy gyfrwng y Gymraeg neu'n ddwyieithog. I ddysgu mwy am y cyfleoedd sydd ar gael i chi, ewch i dudalen Ysgoloriaethau a Bwrsariaethau Academi Hywel Teifi

Bydd mynediad i'ch dyfais ddigidol eich hun/y pecyn TG priodol yn hanfodol yn ystod eich amser yn astudio ym Mhrifysgol Abertawe. Bydd mynediad at wifi yn eich llety hefyd yn hanfodol i'ch galluogi i ymgysylltu'n llawn â'ch rhaglen. Gweler ein tudalennau gwe pwrpasol i gael arweiniad pellach ar ddyfeisiau addas i'w prynu, ac i gael canllaw llawn ar sefydlu'ch dyfais.

Efallai y byddwch chi'n wynebu costau ychwanegol tra byddwch chi yn y brifysgol, gan gynnwys (ond heb fod yn gyfyngedig i):

• Teithio i'r campws ac oddi yno
• Costau argraffu, llungopïo, rhwymo, deunydd ysgrifennu ac offer (e.e. ffyn USB)
• Prynu llyfrau neu werslyfrau
• Gwisgoedd ar gyfer seremonïau graddio

Ffioedd y cwrs ail flwyddyn yw £3600 i fyfyrwyr rhyngwladol a £1800 i fyfyrwyr Cartref.

Mae Academi Cyflogadwyedd Abertawe'n cefnogi myfyrwyr Prifysgol Abertawe ar bob cam yn eu taith yrfaol.

Mae ein gwasanaethau cymorth gyrfaoedd yn cynnwys:

• Gweithdai cyflogadwyedd, sgyrsiau gan gyflogwyr, digwyddiadau pwrpasol a ffeiriau gyrfaoedd
• Cyngor ac arweiniad unigol gan Ymgynghorwyr Gyrfaoedd proffesiynol
• Cymorth i chwilio am swyddi, interniaethau, lleoliadau gwaith a chyfleoedd gwirfoddoli
• Mynediad i adnoddau gwybodaeth am amrywiaeth eang o bynciau rheoli gyrfa
• Cyllid i gefnogi cyfleoedd interniaeth i fyfyrwyr a digwyddiadau Cymdeithasau/Clybiau Myfyrwyr

Rydym hefyd yn darparu cymorth a chyngor i gyn-fyfyrwyr Prifysgol Abertawe am hyd at bum mlynedd ar ôl iddynt raddio.

Yn ogystal â chymorth pwnc penodol gan staff addysgu'r coleg a'ch tiwtor personol, mae'r Ganolfan Llwyddiant Academaidd yn darparu cyrsiau, gweithdai a chymorth un-i-un mewn meysydd fel:

• Ysgrifennu academaidd
• Mathemateg ac ystadegau
• Meddwl critigol
• Rheoli amser
• Sgiliau digidol
• Sgiliau cyflwyno
• Cymryd nodiadau
• Technegau adolygu, dysgu ar gof ac arholiadau
• Sgiliau Saesneg (os nad Saesneg yw eich iaith gyntaf)

Yn ogystal, os oes gennych Anhawster Dysgu Penodol (ADP/SpLD), anabledd, cyflwr iechyd meddwl neu gyflwr meddygol, mae gan y Ganolfan Llwyddiant Academaidd Diwtoriaid Arbenigol i gefnogi'ch dysgu. Bydd y tiwtoriaid yn gweithio ochr yn ochr â'r Swyddfa Anabledd a'r Gwasanaeth Lles i gefnogi eich holl anghenion a gofynion tra byddwch yn astudio ym Mhrifysgol Abertawe.

MSc gyda Diwydiant bydd angen i ymgeiswyr gyflwyno datganiad personol sy’n ateb y ddau gwestiwn canlynol:

 Cwestiwn 1: Beth y gallaf ei gynnig i’r lleoliad diwydiannol?

 Cwestiwn 2: Beth rwyf yn gobeithio ei ennill o’r profiad diwydiannol?

Mae’n rhaid i’ch cais gynnwys yr wybodaeth ganlynol: 

1. Trawsgrifiad Academaidd (gan gynnwys strwythur y graddau)
2. Tystiolaeth o wobrau/anrhydeddau academaidd rydych wedi eu hennill am ragori’n academaidd
3. Datganiad personol sy’n ateb y ddau gwestiwn a nodir uchod
4. CV
5. Tystiolaeth o lwyddiannau o ran chwaraeon, profiad gwirfoddol, cymwysterau proffesiynol
6. Hefyd noder y bydd llythyrau cefnogol yn rhan o’r broses ddewis, a’chcyfrifoldeb chi fydd sicrhau y bydd eich canolwyr enwebedig yn cyflwyno geirdaon erbyn y dyddiad cau.

I gael rhagor o gyngor, ewch i’n tudalennau sut i wneud cais ar gyfer astudio ôl-radd.

Argymhellwn eich bod chi'n cyflwyno eich cais am le ar ein cyrsiau mor fuan â phosibl cyn ein dyddiadau cau ar gyfer cyflwyno cais. Bydd cyrsiau'n cau yn gynharach na'r dyddiadau cau a restrir os caiff yr holl leoedd eu llenwi. Mae rhagor o wybodaeth ar gael ar ein tudalen we Dyddiadau cau ar gyfer cyflwyno cais.