Cynradd gyda SAC, PGCert

Mae'n ofynnol bod ymgeiswyr ar gyfer y TGAU Cynradd wedi cyflawni'r canlynol cyn eu derbyn i'r rhaglen:

• Gradd anrhydedd gydag o leiaf 2:2 mewn pwnc perthnasol, neu bwnc cysylltiedig gydag o leiaf 50% o gynnwys pwnc perthnasol
• Gradd C TGAU yn Saesneg/Gymraeg (bydd rhaid i fyfyrwyr sy'n cyflwyno cais ar gyfer y rhaglen Gymraeg feddu ar TGAU yn y Gymraeg)
• Gradd C TGAU mewn Mathemateg
• Gradd C TGAU mewn Gwyddoniaeth

Mae’r radd C mewn Saesneg/Cymraeg, Gwyddoniaeth a Mathemateg ar lefel TGAU yn ofyniad a bennwyd gan Lywodraeth Cymru. 

Bydd pob cyfweliad yn cael ei gynnal yn rhithiol (gan ddefnyddio Microsoft Teams) gydag arbenigwr cynradd TAR trwy gyfrwng Saesneg neu Gymraeg fel y dymunir. Bydd y fformat yn cynnwys cyfweliad byr a thrafodaeth broffesiynol.

Bydd yr holl fyfyrwyr TAR yn cwblhau archwiliad Cymhwysedd Digidol wrth gofrestru a bydd hyfforddiant cymhwysedd digidol yn rhan o'u rhaglen astudio TAR.

Rhaid i'r holl ymgeiswyr fodloni gofynion Safonau Iechyd Addysg (Cymru) gan gadarnhau eu gallu corfforol ac iechyd er mwyn addysgu (Gweler yr adran Costau Ychwanegol).

Bydd yn rhaid i'r holl ymgeiswyr gael gwiriad manwl gan y GDG. Ni ddylai ymgeiswyr fod wedi cael eu heithrio rhag addysgu neu weithio gyda phlant nac wedi'u cofrestru gyda'r GDG fel person sy'n anaddas i weithio gyda phlant neu bobl ifanc (Gweler yr adran Costau Ychwanegol).

Ymgeiswyr Rhyngwladol

Nid yw cwblhau’r rhaglen TAR yn y Deyrnas Unedig yn rhoi statws ‘Caniatâd i Aros’ i weithio fel athro/athrawes yn y Deyrnas Unedig. Dylai ymgeiswyr ymgyfarwyddo  â rheoliadau a gofynion Gwasanaeth Fisa a Mewnfudo’r Deyrnas Unedig sy’n berthnasol ar gyfer astudio ac ôl-astudio yn y Deyrnas Unedig.

Bydd llwyddo i gwblhau rhaglen Addysg Gychwynnol i Athrawon Partneriaeth Ysgolion Prifysgol Abertawe’n arwain at (i) ddyfarnu Tystysgrif Addysg i Raddedigion (TAR) ac (ii) argymhelliad ar gyfer Statws Athro Cymwysedig a chofrestriad gyda Chyngor  Gweithlu Addysg Cymru. Dylai ymgeiswyr ymgynghori â’r gwasanaeth addysg neu’r adran lywodraeth berthnasol er mwyn holi a fydd cwblhau cwrs TAR mewn prifysgol yn y Deyrnas Unedig yn caniatáu iddynt addysgu yn eu gwlad gartref neu mewn  gwlad arall y tu allan i’r Deyrnas Unedig.

Fel arfer gofynnir i ymgeiswyr feddu ar sgôr gyffredinol prawf IELTS (neu gyfwerth) o 7.0 ac isafswm sgôr o 6.5 ym mhob elfen (ysgrifennu, darllen, siarad a gwrando).

Cyflwynir y rhaglen yn llawn amser gan Bartneriaeth Ysgolion Prifysgol Abertawe, sy'n cynnwys Prifysgol Abertawe, ysgolion Arweiniol a Rhwydwaith wedi'u lleoli ledled De Cymru ac Academi Hywel Teifi. 

Mae'r model cyflwyno yn rhoi cyfle i fyfyrwyr TAR cynradd gael profiad eang o'r cyfnod cynradd cyn cynnig un o dri opsiwn arbenigol iddynt, sef Cyfnod Sylfaen, Cyfnod Allweddol 2 neu Bob Oed. Y rhesymeg dros y dull hwn yw cydnabod y dirwedd addysgol sy'n newid yng Nghymru a chyflwyno mwy o ysgolion Pob Oed ledled Cymru.

Bydd athrawon dan hyfforddiant yn cael eu hyfforddi fel ymarferwyr cynradd yn anad dim, gyda'r cyfle i ddatblygu dealltwriaeth cwricwlwm ac addysgeg dyfnach o fewn yr ystod oedran a chyfnod o'u dewis.

Bydd sesiynau dysgu yn rhyngweithiol i annog cyfranogiad myfyrwyr, ymgysylltu gweithredol, a rhyngweithio a chydweithio rhwng cymheiriaid lle bo hynny'n briodol. Bydd y darlithoedd a'r tiwtorialau wedi'u cynllunio i ddarparu ar gyfer ystod amrywiol o ddysgwyr, gan gydnabod yr ystod o brofiadau y bydd myfyrwyr ôl-raddedig yn eu cynnig i'r rhaglen. Bydd hyn yn cael ei adlewyrchu trwy ddyluniad a chynnwys y sesiynau addysgu, yn ogystal â'r deunyddiau dysgu. Bydd dulliau dysgu ac addysgu yn cynnwys dulliau dysgu carfan gyfan, grwpiau bach ac unigolion gan gynnwys dysgu cydweithredol ac ymchwil sy'n agos at ymarfer. Bydd pob modiwl yn darparu cyfleoedd i ymchwilio, ymarfer, trafod a chymhwyso gwybodaeth a sgiliau. Er enghraifft, bydd athrawon dan hyfforddiant yn archwilio senarios fel adrodd i rieni trwy weithgareddau trafod grŵp ar sail problemau.

Mae'r rhaglen yn seiliedig ar ymchwil a bydd yn defnyddio amrywiaeth o fformatau dysgu sy'n hyrwyddo dysgu cynhwysol a chydweithredol.

O leiaf 40 credyd

Mae'n bosib astudio o leiaf 40 credyd o'r cwrs ôl-raddedig hwn drwy gyfrwng y Gymraeg. Mae nifer o adrannau'r Brifysgol yn datblygu ac yn cynnig modiwlau cyfrwng Cymraeg neu fodiwlau dwyieithog fel rhan o'u cyrsiau felly bydd angen i ti drafod y posibiliadau gyda'r Cyfarwyddwr Rhaglen perthnasol. Gelli astudio modiwl/modiwlau trwy gyfrwng y Gymraeg lle bo'r cyfle neu gyflwyno dy draethawd estynedig yn y Gymraeg gydag arweiniad gan arbenigwr pwnc trwy gyfrwng y Gymraeg.

Mae Academi Hywel Teifi yma i'th gefnogi trwy gydol dy amser ym Mhrifysgol Abertawe. Rydym yn cynnig:

• Mynediad at ysgoloriaethau a bwrsariaethau hael ar gyfer astudio trwy gyfrwng y Gymraeg.
• Mynediad at fodiwlau a addysgir yn gyfan gwbl neu'n rhannol yn Gymraeg.
• Mynediad at ap Arwain er mwyn derbyn y diweddaraf am ein cyrsiau a'n modiwlau cyfrwng Cymraeg. Gelli di lawrlwytho'r ap am ddim drwy'r App Store a Google Play.
• Cyfweliad trwy gyfrwng y Gymraeg wrth wneud cais am le.
• Gohebiaeth bersonol yn Gymraeg, yn Saesneg neu'n ddwyieithog.
• Yr opsiwn i lunio a chyflwyno gwaith cwrs neu sefyll arholiadau trwy gyfrwng y Gymraeg (hyd yn oed os wyt ti wedi dewis astudio yn Saesneg), a bydd dy waith yn cael ei asesu yn Gymraeg.
• Tiwtor Personol Cymraeg ei iaith.
• Cefnogaeth un i un i wella dy sgiliau Cymraeg academaidd.
• Cyfle i ennill cymhwyster ychwanegol sy'n dystiolaeth o dy allu Cymraeg i gyflogwyr y dyfodol.
• Aelodaeth o Gangen Prifysgol Abertawe o'r Coleg Cymraeg Cenedlaethol.

Cer i'r dudalen Mae Gen i Hawl am wybodaeth bellach am hawliau myfyrwyr.

Bydd parhau i astudio trwy'r Gymraeg yn:

• ddatblygiad naturiol i ti os wyt ti wedi astudio trwy'r Gymraeg ar lefel israddedig.
• ffordd o sicrhau dy gyfle i gael yr addysg orau.
• ffordd o dderbyn lefel uchel o gefnogaeth wrth i'r grwpiau astudio fod yn llai.
• ychwanegiad gwerthfawr i dy CV a dy ddatblygiad gyrfaol.

Addysgir ein graddau gan arbenigwyr sydd â gwybodaeth helaeth iawn i’w rhannu â’n myfyrwyr.

Mae rhagor o wybodaeth am ein harbenigedd academaidd ar ein tudalennau staff.

Mae ffioedd dysgu ar gyfer blynyddoedd o astudiaeth ar ôl eich blwyddyn gyntaf yn amodol ar gynnydd o 3%.

Gallwch ddod o hyd i ragor o wybodaeth am ffioedd a sut i dalu ar ein tudalen ffioedd dysgu.

Efallai y byddwch yn gymwys i gael arian i helpu i gefnogi eich astudiaethau. I gael gwybod am ysgoloriaethau, bwrsariaethau a chyfleoedd cyllido eraill sydd ar gael, ewch i dudalen ysgoloriaethau a bwrsariaethau'r Brifysgol.

Myfyrwyr cyfredol: Gallwch ddod o hyd i ragor o wybodaeth am ffioedd a sut i dalu ar ein tudalen ffioedd dysgu.

Mae’n bosib eich bod yn gymwys i gael cymorth ariannol tuag at eich astudiaethau.

Os ydych yn fyfyriwr y DU neu'r UE sy’n dechrau ar radd Meistr ym Mhrifysgol Abertawe, efallai y byddwch yn gymwys i gyflwyno cais am arian gan y Llywodraeth i helpu tuag at gostau eich astudiaethau. I gael mwy o wybodaeth, ewch i'n tudalen benthyciadau Ôl-raddedig.

I gael gwybod am ysgoloriaethau, bwrsariaethau a chyfleoedd eraill am gymorth ariannol sydd ar gael, ewch i dudalen ysgoloriaethau a bwrsariaethau'r Brifysgol.

Mae ysgoloriaethau a bwrsariaethau hael ar gael gan Academi Hywel Teifi, Prifysgol Abertawe a’r Coleg Cymraeg Cenedlaethol ar gyfer myfyrwyr sy'n dymuno astudio trwy gyfrwng y Gymraeg neu'n ddwyieithog. I ddysgu mwy am y cyfleoedd sydd ar gael i chi, ewch i dudalen Ysgoloriaethau a Bwrsariaethau Academi Hywel Teifi

Darllenwch y dudalen ganlynol am wybodaeth am Gynlluniau Cymhelliad Llywodraeth Cymru: Tystysgrif Addysg i Raddedigion (TAR)

Bydd mynediad i'ch dyfais ddigidol eich hun/y pecyn TG priodol yn hanfodol yn ystod eich amser yn astudio ym Mhrifysgol Abertawe. Bydd mynediad at wifi yn eich llety hefyd yn hanfodol i'ch galluogi i ymgysylltu'n llawn â'ch rhaglen. Gweler ein tudalennau gwe pwrpasol i gael arweiniad pellach ar ddyfeisiau addas i'w prynu, ac i gael canllaw llawn ar sefydlu'ch dyfais.

Efallai y byddwch chi'n wynebu costau ychwanegol tra byddwch chi yn y brifysgol, gan gynnwys (ond heb fod yn gyfyngedig i):

• Teithio i'r campws ac oddi yno
• Costau argraffu, llungopïo, rhwymo, deunydd ysgrifennu ac offer (e.e. ffyn USB)
• Prynu llyfrau neu werslyfrau
• Gwisgoedd ar gyfer seremonïau graddio

• Teithio i ysgolion ac oddi yno
• Os cewch gynnig lle, bydd angen gwiriad manwl gan y Gwasanaeth Datgelu a Gwahardd arnoch, neu wiriad cyfwerth a gymeradwywyd. Gweler ein tudalen Arweiniad ar Gyflwyno Cais am DBS i gael rhagor o fanylion.
• Os byddwn ni’n cynnig lle i chi, bydd hefyd angen i chi gwblhau holiadur iechyd sy’n rhan o broses profi cymhwyster i ymarfer fel athro/athrawes. Mae’r holiadur yn gofyn am fewnbwn gan eich Meddyg Teulu ac efallai y byddant yn codi ffi am y gwasanaeth hwn. 

Mae Academi Cyflogadwyedd Abertawe'n cefnogi myfyrwyr Prifysgol Abertawe ar bob cam yn eu taith yrfaol.

Mae ein gwasanaethau cymorth gyrfaoedd yn cynnwys:

• Gweithdai cyflogadwyedd, sgyrsiau gan gyflogwyr, digwyddiadau pwrpasol a ffeiriau gyrfaoedd
• Cyngor ac arweiniad unigol gan Ymgynghorwyr Gyrfaoedd proffesiynol
• Cymorth i chwilio am swyddi, interniaethau, lleoliadau gwaith a chyfleoedd gwirfoddoli
• Mynediad i adnoddau gwybodaeth am amrywiaeth eang o bynciau rheoli gyrfa
• Cyllid i gefnogi cyfleoedd interniaeth i fyfyrwyr a digwyddiadau Cymdeithasau/Clybiau Myfyrwyr

Rydym hefyd yn darparu cymorth a chyngor i gyn-fyfyrwyr Prifysgol Abertawe am hyd at bum mlynedd ar ôl iddynt raddio.

Gan mai rhaglen hyfforddiant proffesiynol yw hon sy’n arwain at argymhelliad ar gyfer SAC, disgwylir y bydd yr athrawon dan hyfforddiant sy’n cwblhau’r rhaglen yn cael eu cyflogi fel athrawon proffesiynol. Llywodraeth Cymru sy’n pennu nifer y lleoedd sydd ar gael ar gyfer athrawon dan hyfforddiant wedi’u hariannu a phenderfynir ar y nifer hwn ar sail dadansoddiad o anghenion y gweithlu yng Nghymru.

Bydd yr holl athrawon dan hyfforddiant yn derbyn Adroddiad Cyrhaeddiad Addysg Uwch (HEAR) yn manylu ar eu gweithgareddau academaidd ac allgyrsiol. Gellir defnyddio hwn i ategu eu CV.

Yn ogystal â sgiliau proffesiynol, mae’r rhaglen yn datblygu’r priodweddau personol canlynol:

• Sgiliau ymchwil ac ymholi
• Sgiliau rheoli amser
• Sgiliau trefnu a chymhelliant personol
• Sgiliau cyfathrebu effeithiol
• Datrys problemau a dadansoddi
• Sgiliau negodi, gwaith tîm a’r gallu i addasu

Bydd athrawon dan hyfforddiant yn datblygu:

• Menter
• Arloesedd
• Sgiliau penderfynu
• Y gallu i feddwl a gweithredu’n feirniadol

Os nad yw athrawon dan hyfforddiant yn dymuno cael gyrfa addysgu, neu os nad ydynt yn cyflawni’r safon ddisgwyliedig yn ystod y rhaglen, cânt eu hannog i fanteisio ar y cymorth a ddarperir gan Academi Cyflogadwyedd Abertawe a’r Gwasanaeth Gyrfaoedd i’w cynorthwyo i gynllunio gyrfa arall a datblygu eu cyflogadwyedd y tu allan i’r proffesiwn addysgu.

Bydd cwblhau'r TAR Cynradd yn llwyddiannus yn arwain at argymhelliad i Gyngor y Gweithlu Addysg ar gyfer Statws Athro Cymwysedig (SAC) ac yn darparu cyfleoedd ar gyfer cyflogaeth fel Athro Newydd Gymhwyso (ANG) mewn ysgolion.

Yn ogystal â chymorth pwnc penodol gan staff addysgu'r coleg a'ch tiwtor personol, mae'r Ganolfan Llwyddiant Academaidd yn darparu cyrsiau, gweithdai a chymorth un-i-un mewn meysydd fel:

• Ysgrifennu academaidd
• Mathemateg ac ystadegau
• Meddwl critigol
• Rheoli amser
• Sgiliau digidol
• Sgiliau cyflwyno
• Cymryd nodiadau
• Technegau adolygu, dysgu ar gof ac arholiadau
• Sgiliau Saesneg (os nad Saesneg yw eich iaith gyntaf)

Yn ogystal, os oes gennych Anhawster Dysgu Penodol (ADP/SpLD), anabledd, cyflwr iechyd meddwl neu gyflwr meddygol, mae gan y Ganolfan Llwyddiant Academaidd Diwtoriaid Arbenigol i gefnogi'ch dysgu. Bydd y tiwtoriaid yn gweithio ochr yn ochr â'r Swyddfa Anabledd a'r Gwasanaeth Lles i gefnogi eich holl anghenion a gofynion tra byddwch yn astudio ym Mhrifysgol Abertawe.

Mae nifer o strategaethau yn y Gyfadran yn cefnogi datblygiad academaidd a dilyniant athrawon dan hyfforddiant – cyfeiriwch at yr adran ‘Cefnogaeth Academaidd yn ystod eich TAR' isod.

Mae’n rhaid cyflwyno pob cais am gwrs TAR Cynradd drwy UCAS – cliciwch ar y botwm Ymgeisio ar frig y dudalen hon i ddechrau eich cais.  

Argymhellwn eich bod chi'n cyflwyno eich cais am le ar ein cyrsiau mor fuan â phosibl cyn ein dyddiadau cau ar gyfer cyflwyno cais. Bydd cyrsiau'n cau yn gynharach na'r dyddiadau cau a restrir os caiff yr holl leoedd eu llenwi. Mae rhagor o wybodaeth ar gael ar ein tudalen we Dyddiadau cau ar gyfer cyflwyno cais.

Cyflwyno ymholiad Ôl-raddedig

Derbyn myfyrwyr rhyngwladol

Mae lleoliadau yn elfen orfodol o'r rhaglen TAR Cynradd a bydd athrawon dan hyfforddiant yn cael eu gosod mewn ysgolion Arweiniol a Rhwydwaith ledled De Cymru yr ydym wedi sefydlu cytundeb partneriaeth â nhw.

Bydd gofyn i fyfyrwyr ymgymryd â:

1. Lleoliad ysgol 1 – 57 diwrnod gwaith yn Semester 1 a 2 sy'n ymgorffori 10 diwrnod Ymarfer a Theori.

2. Lleoliad ysgol 2 – 64 diwrnod gwaith yn Semester 2 sy'n ymgorffori 1 diwrnod ymchwil, 1 diwrnod myfyrio rhwydwaith a lleoliad safle amgen 5 diwrnod i gynnwys ysgolion arbennig neu gyfleusterau AAA ar safle ysgol, unedau atgyfeirio disgyblion, cyfrwng Cymraeg a sefydliadau cyfnod oedran arall.

Mae nifer o strategaethau yn y Gyfadran yn cefnogi datblygiad academaidd a dilyniant athrawon dan hyfforddiant – cyfeiriwch at yr adran ‘Cefnogaeth Academaidd yn ystod eich TAR isod.

Neilltuir Mentor Academaidd Personol i athrawon dan hyfforddiant a fydd yn darparu cefnogaeth academaidd yn unol â System Mentora Academaidd Personol y Brifysgol. Bydd hyn yn cynnwys 4 cyfarfod rhwng myfyrwyr a mentor academaidd personol bob blwyddyn academaidd.

Bydd Tiwtoriaid Prifysgol AGA yn ymgymryd â rôl Mentor i fyfyrwyr ar y rhaglen.

Tra byddant ar leoliad, rhoddir Mentor Ysgol i athrawon dan hyfforddiant y byddant yn cael sesiwn adborth wythnosol gyda nhw.  Hefyd bydd ymarferydd Arweiniol AGA penodedig neu uwch fentor ym mhob ysgol a all drosglwyddo unrhyw bryderon i dîm y rhaglen os oes angen.

Pan fydd gan athrawon dan hyfforddiant ofynion penodol neu gyflyrau meddygol ac efallai bod ganddynt anghenion asesu penodol, bydd galw ar arbenigedd tiwtoriaid cyswllt anabledd yn ôl yr angen.

Bydd pob athro dan hyfforddiant yn cael cyfarfod mentor awr yr wythnos lle bydd yn trafod cynnydd ac yn gosod targedau yn erbyn y Safonau Proffesiynol. Bydd arsylwadau Mentor Ysgol a Thiwtor Prifysgol AGA yn rhoi adborth ar ymarfer addysgu. Bydd tri chyfarfod Mentor Academaidd Personol yn ystod y rhaglen yn darparu adborth pellach ar gynnydd athrawon dan hyfforddiant.

Gwneir athrawon dan hyfforddiant yn ymwybodol o Wasanaethau Cymorth Myfyrwyr y Brifysgol ac fe'u hanogir i gael mynediad atynt yn ôl yr angen. Fe'u hyrwyddir i athrawon dan hyfforddiant adeg sefydlu a thrwy gydol y rhaglen i sicrhau y gall athrawon dan hyfforddiant ofyn am gefnogaeth amserol ar gyfer unrhyw faterion personol neu academaidd y gallent ddod ar eu traws.

Bydd athrawon dan hyfforddiant sy'n cael trafferth gydag ysgrifennu academaidd yn cael eu cyfeirio at y Rhaglen Llwyddiant Academaidd (ASP). Mae gan ASP ddeunyddiau cymorth ysgrifennu ar-lein y gall myfyrwyr eu cyrchu trwy Canvas. Gall myfyrwyr hefyd gyfeirio eu hunain ar gyfer sesiynau cyngor un i un a allai fod yn fwy ymarferol i athrawon dan hyfforddiant ar leoliad. Mae apwyntiadau Skype/Teams/Zoom ar gael i fyfyrwyr ar leoliad ymhell o'r Brifysgol.

Bydd athrawon dan hyfforddiant sy'n cael trafferth gyda Mathemateg yn cael eu cyfeirio at raglen Llwyddiant Mathemateg ac Ystadegau (MASS).

Bydd llyfrgellwyr pwnc ar gael i gynnig cefnogaeth ac arweiniad gyda chyfeiriadau a chwiliadau llenyddiaeth. Bydd athrawon dan hyfforddiant yn cael sesiwn sefydlu llyfrgell yn ystod yr wythnos sefydlu.

Bydd athrawon dan hyfforddiant yn cael trafodaethau rheolaidd gyda mentoriaid yn yr ysgol a fydd yn gallu nodi anghenion sy'n codi a chyfeirio myfyrwyr at y gwasanaethau perthnasol. Bydd hyfforddiant mentor yn cynnwys gwybodaeth am wasanaethau cymorth i fyfyrwyr, er mwyn sicrhau y gallant gynghori yn briodol. Bydd manylion gwasanaethau cymorth y Brifysgol yn cael eu cyfeirio'n glir, trwy eu cynnwys yn llawlyfr y bartneriaeth a dolenni ar safle Canvas y Gyfadran.