Seiberdroseddu a Therfysgaeth, MA

Canolbwyntiwch ar natur gyfnewidiol troseddu ac ymddygiad troseddol ar-lein

A world map showing digital connections across the planet

Trosolwg o'r Cwrs

Mae seiberdrosedd a therfysgaeth ymhlith y bygythiadau mwyaf sy'n wynebu cymdeithas ac maent yn flaenoriaethau allweddol i'r llywodraeth ar bob lefel.

Bydd y cwrs MA hwn yn cynnig dealltwriaeth fanwl i chi o natur gyson gyfnewidiol troseddau, terfysgaeth ac ymddygiad troseddol ar-lein, gan roi cyfle i chi fanteisio ar amrywiaeth o gyfleoedd gyrfa cyffrous.

Gan ddysgu gan arbenigwyr o'r diwydiant, sy'n meddu ar brofiad academaidd ac ymarferol cyfoethog, byddwch yn meithrin gwybodaeth am y bygythiadau, y tueddiadau, y materion a'r ymatebion ym maes terfysgaeth a seiberddiogelwch, yn ogystal â'r cwestiynau moesegol hanfodol.

Pam Seiberdrosedd a Therfysgaeth ym Mhrifysgol Abertawe?

Fel myfyriwr ôl-raddedig yn Ysgol y Gwyddorau Cymdeithasol, byddwch yn rhan o Ysgol y Gyfraith a gydnabyddir ledled y byd, sy'n cynnig amgylchedd academaidd ffyniannus sy'n ymrwymedig i ragoriaeth mewn addysgu a gwaith ymchwil, ac sy'n cynnig profiad eithriadol i fyfyrwyr. Yn ogystal, byddwch yn elwa o gael eich addysgu gan gydweithwyr yng  Nghyfadran y Gwyddorau Cymdeithasol a'r Dyniaethau yn yr Adran Droseddeg. Mae'r radd MA hon yn unigryw gan ei bod yn rhoi'r cyfle i chi:

  • Ymgysylltu'n uniongyrchol â gwaith prosiect ac â rhanddeiliaid a all gynnig cipolwg o’r maes a gwybodaeth arloesol am seiberdroseddu a therfysgaeth
  • Meithrin perthnasoedd cadarn â phartneriaid cenedlaethol a rhyngwladol, gan gynnwys gwneuthurwyr polisi, y llywodraeth ac ymarferwyr diogelwch diwydiannol, sefydliadau milwrol a chymunedau

Mae 83.3% o'n gwaith ymchwil yn creu effaith sylweddol o ran cyrhaeddiad ac arwyddocâd (REF 2021)

Eich profiad MA mewn Seiberdrosedd a Therfysgaeth

Ar y radd ôl-raddedig arbenigol hon, byddwch yn elwa o arbenigedd yng nghanolfannau ymchwil ysgol y gyfraith, gan gynnwys Y Ganolfan Ymchwil i Seiberfygythiadau (CYTREC), Rhwydwaith VOX-Pol a Labordy Arloesi Cyfreithiol Cymru.

Byddwch hefyd yn dysgu drwy'r canlynol:

  • Darlithoedd gwadd fel rhan o'r trefniadau ar gyfer cyflwyno modiwlau ac fel cyfleoedd dysgu ychwanegol
  • Y cyfle i ymgymryd â lleoliadau gwaith a phrosiectau ymchwil cydweithredol

Cyfleoedd cyflogaeth MA mewn Seiberdrosedd a Therfysgaeth

Mae seiberdrosedd a therfysgaeth ar-lein yn feysydd blaenoriaeth pwysig i lywodraethau ac yn y sector preifat, ac mae'r wybodaeth y byddwch yn ei meithrin fel rhan o'r radd hon yn cynnig gyrfaoedd posibl yn y meysydd canlynol:

  • Y sector cyhoeddus – llywodraeth, gwasanaeth sifil, cyngor gwleidyddol a pholisi
  • Y sector preifat – busnes byd-eang, cenedlaethol neu leol
  • Y sector anllywodraethol
  • Ymchwil ac academia

Modiwlau

Gallwch ddewis o blith amrywiaeth eang o fodiwlau sydd ar gael yn Ysgol y Gwyddorau Cymdeithasol a'r Dyniaethau a chewch y cyfle i arbenigo mewn meysydd seiberdroseddu a/neu derfysgaeth ar-lein penodol drwy draethawd hir.