Dadansoddeg Ariannol, MSc

Datblygwch y sgiliau i ragori yn y diwydiant cyllid a buddsoddi

myfyrwyr sy'n gweithio

Trosolwg o'r Cwrs

Gallwch ddatblygu'r sgiliau technegol i archwilio a datgelu patrymau mewn data a mynd i'r afael â heriau busnes hanfodol sy'n effeithio ar y diwydiant cyllid heddiw.

Mae'r cwrs MSc mewn Dadansoddeg Ariannol ym Mhrifysgol Abertawe yn rhaglen arbenigol sy'n dechnegol ac yn ymarferol ei natur. Mae wedi'i ddylunio ar gyfer y rhai sydd am lansio gyrfa ddeinamig yn y diwydiant cyllid a buddsoddiadau, mewn rolau fel Arbenigwr Data, Ymgynghorydd neu Reolwr Portffolio, yn ogystal â'r rhai sydd am ymgymryd ag ymchwil bellach ym maes cyllid drwy PhD. Er y dylai ymgeiswyr feddu ar radd israddedig neu gyfwerth mewn maes meintiol, nid oes angen profiad o gyfrifiadureg na rhaglennu.

Byddwch yn archwilio pynciau allweddol, megis data mawr ym maes cyllid, rhaglennu ar gyfer cymwysiadau ariannol, econometreg, rhagfynegi risg ariannol a dadansoddeg data uwch. Hefyd, byddwch yn meithrin y sgiliau i ddefnyddio data mawr a dadansoddeg data, ieithoedd rhaglennu (e.e. Python, R) ac offer delweddu i'ch helpu i roi modelau dadansoddeg ariannol priodol ar waith ac i lywio penderfyniadau buddsoddi'n effeithiol.

Gallwch gael profiad o'n hymagwedd at addysgu sy'n seiliedig ar ymchwil ac elwa ar y gwaith arloesol a wneir gan ein canolfan ymchwil sef Canolfan Cyllid Empirig Hawkes, sy'n cynnal ymchwil arloesol i hybu dealltwriaeth, gwaith datblygu a gwaith cymhwyso ynghylch dulliau a thechnegau sy'n berthnasol i ddadansoddi data cyllid a macro-economeg.

Mae'r rhaglen uwch hon yn ddelfrydol ar gyfer myfyrwyr sydd â chefndir mewn economeg, gwyddoniaeth, mathemateg, cyfrifeg neu gyllid sydd am fynd ymhellach â'u hastudiaethau, yn ogystal â gweithwyr proffesiynol sydd am atgyfnerthu eu gwybodaeth neu wella eu sgiliau yn eu maes.

Pam Dadansoddeg Ariannol yn Abertawe?

  • Rhaglen arbenigol uwch y gellir ei chwblhau mewn un flwyddyn.
  • Nid oes angen gwybodaeth flaenorol am raglennu neu gyfrifiadureg
  • Addysgu sy'n seiliedig ar ymchwil, a modiwlau sy'n cael eu haddysgu gan ein hacademyddion o safon fyd-eang sydd â gwybodaeth academaidd a diwydiannol
  • Wedi'i ddylunio ar gyfer graddedigion sydd â chefndir mewn sgiliau meintiol neu weithwyr proffesiynol sydd am wella eu sgiliau yn eu maes
  • Byddwch yn meithrin sgiliau rhaglennu gan ddefnyddio offer megis R a Python
  • Ceir cysylltiadau â chanolfan ymchwil adnabyddus sef Canolfan Cyllid Empirig Hawkes
  • Addysgir ein rhaglenni myfyrwyr yn adeilad gwerth £22 miliwn yr Ysgol Reolaeth ar gampws y Bae
  • Mae'r Ysgol Reolaeth wedi'i hachredu gan AACSB International, cymdeithas addysg fusnes fwyaf y byd, sy'n cysylltu ysgolion busnes, busnesau a dysgwyr, i greu'r genhedlaeth nesaf o arweinwyr gwych.

Eich Profiad Dadansoddeg Ariannol

Nod y cwrs MSc mewn Dadansoddeg Ariannol yw bodloni'r galw sy'n cyflymu'n gyflym am weithwyr proffesiynol sydd ag arbenigedd ym maes dadansoddeg ariannol, drwy ddarparu sgiliau meintiol, ystadegol a thechnegol i chi sy'n hanfodol yn y diwydiant cyllid modern sy'n seiliedig ar ddata.

Hefyd, byddwch yn cael meithrin sgiliau dadansoddi data sy'n berthnasol i'r diwydiant drwy ein hadnodd masnachu, y Labordy Cyllid, sy'n darparu mynediad at Refintiv Eikon a Factset, sy'n blatfformau dadansoddeg data a ddefnyddir yn y diwydiannau buddsoddi a bancio.

O'r funud rydych yn cyrraedd yr Ysgol Reolaeth, byddwn yn gweithio gyda chi i’ch helpu i feithrin eich sgiliau a'ch profiad er mwyn cyfoethogi'ch cyfleoedd gyrfa.

Byddwch yn derbyn cyngor pwrpasol, un i un, diderfyn ar yrfaoedd gan ein tîm gyrfaoedd ymroddedig. Cewch gyfle i wneud lleoliad gwaith neu interniaeth drwy Rwydwaith Interniaeth â Thâl Abertawe (SPIN) neu'r fenter ‘Wythnos o Waith’.

Mae ein holl fyfyrwyr yn elwa o rannu'r safle arloesol ar Gampws y Bae â phartneriaid diwydiannol. Mae ein cyfleusterau'n cynnwys mannau wedi'u neilltuo i addysgu ac astudio, a chyfleusterau TG helaeth â'r galedwedd a'r feddalwedd arbenigol ddiweddaraf.

Cyfleoedd Cyflogaeth Dadansoddeg Ariannol

Mae gennym hanes ardderchog o leoli ein graddedigion gyda chwmnïau amlwladol mawr.

Bydd eich rhaglen MSc mewn Dadansoddeg Ariannol yn profi i gyflogwyr bod y sgiliau technegol gennych i lwyddo yn y byd ariannol cyfoes, eich bod yn meddwl yn strategol a bod gennych arbenigedd mewn dadansoddeg data.

Gallai eich cam nesaf fod yn unrhyw un o'r rolau canlynol:

  • Dadansoddwr Cyllid
  • Rheolwr Cronfa
  • Arbenigwr Data
  • Rheolwr Portffolio
  • Ymgynghorydd

Modiwlau

Byddwch yn astudio amrywiaeth o fodiwlau gorfodol a dewisol yn semestrau un a dau y cwrs hwn, cyn ymgymryd â phrosiect/traethawd hir annibynnol yn eich trydydd semester.

Ymwadiad: Gall dewis modiwlau newid