Addysgeg

ADDYSGEG

Yn ôl ymagwedd y Tîm TEL Dev, mae dysgwyr wrth wraidd y broses addysgol. Dylai pob amgylchedd dysgu a dull cymorth ac arweiniad myfyrwyr ddechrau ag addysgeg sy'n canolbwyntio ar y dysgwr. Dylai dylunio'r cwricwlwm adlewyrchu profiad y myfyrwyr fel defnyddwyr. Dim ond pan fydd cydbwysedd priodol rhwng addysgeg, gofod, a thechnoleg y gall addysgu effeithiol ddigwydd. Pan gaiff ei defnyddio heb ofal, gall technoleg weithiau dynnu oddi ar y profiad dysgu ac addysgu. Fodd bynnag, pan gaiff ei defnyddio'n ofalus i gefnogi addysgeg, gall technoleg wella dysgu ac addysgu. Mae hyn yn arbennig o wir pan fydd cwmpas ac arddull addysgeg yn newid wrth i dechnoleg newid, er enghraifft o ran arddulliau addysgegol cyfoes fel dysgu hybrid a hyblyg ('hyflex').

MAE RHAI O'R DULLIAU ADDYSGEGOL Y GALL Y TÎM TEL HELPU CYDWEITHWYR GYDA NHW YN CYNNWYS:

Dysgu Gweithredol

Mae dysgu gweithredol yn broses sy'n canolbwyntio ar fyfyrwyr, sy'n pwysleisio bod y ffordd mae myfyrwyr yn dysgu yn dylanwadu’n fawr ar effeithiolrwydd y dysgu. Anogir myfyrwyr i symud y tu hwnt i dderbyn gwybodaeth yn oddefol gan athro, i ymgysylltu â dysgu ar lefel wybyddol ddyfnach. Caiff myfyrwyr eu herio'n aml i ddod yn feddylwyr annibynnol, gan gymryd cyfrifoldeb am eu dysgu eu hunain. Datblygir gwybodaeth a dealltwriaeth mewn ymateb i'r cyfleoedd a'r arbenigedd a ddarperir gan eu hathrawon a'u cymuned ddysgu.

Dysgu Cyfunol

Mae ymagweddau cyfunol yn defnyddio sawl dull i ddarparu dysgu drwy gyfuno rhyngweithio wyneb yn wyneb â gweithgareddau ar-lein. Mae'r cydbwysedd rhwng cydrannau ar-lein ac wyneb yn wyneb, ac integreiddio dulliau eraill, yn dibynnu ar anghenion dysgwyr a chyd-destun gweithredu'r dysgu.

Dysgu Gwrthdro

Mae dysgu gwrthdroi'n ddull addysgegol lle mae'r syniad confensiynol o ddysgu yn yr ystafell ddosbarth yn cael ei wrthdroi er mwyn i fyfyrwyr gael eu cyflwyno i'r deunydd dysgu cyn y dosbarth, ac yna bydd amser yn yr ystafell ddosbarth yn cael ei ddefnyddio i ddyfnhau dealltwriaeth drwy drafod â chymheiriaid a gweithgareddau datrys problemau wedi'u hwyluso gan athrawon.

Dysgu Hyflex

Dysgu hyflex yw'r term a ddefnyddir i ddisgrifio'r ddarpariaeth ar yr un pryd o ddysgu wyneb yn wyneb ac ar-lein. Mae defnyddio'r dull hwn yn rhoi hyblygrwydd i'r myfyrwyr fod yn bresennol mewn sesiynau cydamserol wyneb yn wyneb neu o bell, neu i astudio'n anghydamserol ar-lein.

Dysgu ar-lein

Cynhelir dysgu ar-lein ar ffurf gweithgareddau dysgu cydamserol ac anghydamserol, drwy'r Rhyngrwyd heb gyswllt wyneb yn wyneb rhwng myfyrwyr ac athrawon.