Record Cyflymder ar Dir Bloodhound wedi'i gyhoeddi ym 'manyleb anialwch' cyn y treialon cyflymder uchel

Dyma'r tro cyntaf i'r car gael ei weld gydag olwynion alwminiwm solet wedi'u peiriannu'n fanwl, a wnaed yn arbennig i wrthsefyll straen deithio ar gyflymder uwchsonig. Am ei sesiwn brawf gyntaf, caiff yr olwynion eu profi ar 500+ mya (800 km/yr awr).

Bydd y profion cyflymder uchel yn gweld car LSR Bloodhound yn saethu ar hyd trac rasio anialwch Hakskeenpan am y tro cyntaf, gan arddangos peirianneg Prydeinig i gynulleidfa fyd-eang. Prif amcan tîm Bloodhound yw ymgysylltu ac ysbrydoli pobl o bob oedran drwy gymhwyso gwyddoniaeth, technoleg, peirianneg a mathemateg mwyaf eithafol.

Mae Prifysgol Abertawe wedi bod yn allweddol i lwyddiant y prosiect hyd yn hyn, diolch i gyfraniad ei harbenigedd ym maes ymchwil Deinameg Hylifau Gyfrifiadurol (CFD), a bu ymchwilwyr o'r Coleg Peirianneg yn gweithio fel rhan o dîm dylunio aerodynameg y car uwchsonig.

Un o amcanion allweddol y rhaglen profi cyflymder uchel, yw gwerthuso sut mae'r car yn ymddwyn wrth arafu a stopio o nifer o gyflymderau targed, gan gyflymu i 500 mya a thu hwnt (800km/yr awr)

Dim ond pan fydd y peirianwyr a'r gyrrwr, Andy Green, yn fodlon eu bod yn deall gallu llusgo a stopio'r car y byddant yn gwthio i'r proffil rhedeg nesaf, gan adeiladu cyflymder ym mhob ras fesul 50 mya (80km/yr awr).

Bydd tîm LSR Bloodhound yn archwilio faint o lusgo y mae'r car yn ei greu mewn nifer o sefyllfaoedd ac ar gyflymderau gwahanol, gan ddefnyddio breciau'r olwynion, un neu ddau o'r parasiwtiau llusgo, a chyda'r breciau awyr enfawr wedi'u cloi yn eu lle.

Bydd data o 192 o synwyryddion gwasgedd ar y car yn cael eu monitro a'u cymharu yn erbyn modelau CFD a ragfynegir i sicrhau eu bod yn cyd-daro. Bydd peirianwyr Bloodhound yn gweithio gyda Dr Ben Evans, Athro Cysylltiol mewn Peirianneg Awyrofod ym Mhrifysgol Abertawe, a'i fyfyriwr PhD, Jack Townsend, i wirio'r data a fydd yn nodi swm y llusgo a brofwyd gan y car bob tro. Mae'r data hwn yn hollbwysig er mwyn pennu maint y roced a fydd yn cael ei gosod ar y car er mwyn i'r ymgais nodi record cyflymder ar dir y byd newydd ymhen 12 i 18 mis.

Dywedodd Dr Ben Evans: “Ar ôl dros ddegawd o ymchwil a datblygu a dylunio dwys rydym o’r diwedd wedi cyrraedd y pwynt lle rydyn ni’n cael gwybod sut y bydd Bloodhound yn perfformio ar gyflymder uchel. Bydd y profion cyflym sy'n digwydd yn Hakskeenpan trwy gydol mis Hydref a mis Tachwedd yn darparu'r data hanfodol sy'n angenrheidiol i ddilysu'r modelau cyfrifiadurol aerodynamig yr ydym wedi bod yn eu rhedeg yn y Coleg Peirianneg. Os aiff popeth yn ôl y cynllun, yna bydd gennym yr hyder yn nyluniad y car y bydd angen i ni fynd am ymgais uwch nag erioed o fewn y 18 mis nesaf. Mae'n gyfnod cyffrous dros ben!”

Dilynwch Bloodhound LSR ar Twitter am ddiweddariadau cyson o'r treialon.