Gwybodaeth i ymgeiswyr

Eisiau help wrth ysgrifennu eich CV a llythyr eglurhaol ar gyfer un o'n swyddi gwag? Mae arweiniad ar gael yma:

CVs a Llythyrau Eglurhaol i Ymgeiswyr.

Os ydych yn gwneud cais am swydd academaidd, gall fod yn ddefnyddiol cyfeirio at yr wybodaeth yn ein Llwybr Gyrfa Academaidd. Mae ein proses recriwtio'n gwerthuso ceisiadau ar sail y llwybrau gyrfa academaidd a bydd meini prawf y fanyleb person yn y disgrifiad swydd (wedi'i atodi i'r hysbyseb) yn manylu ar y math o dystiolaeth dylech ei darparu yn eich cais.  

Os ydych chi'n gwneud cais am swydd wag broffesiynol neu gymorth, efallai y bydd yn ddefnyddiol i chi ddarllen ein tudalennau Gwerthoedd y Gwasanaethau Proffesiynol a Disgwyliadau Arweinyddiaeth.  Nod ein proses recriwtio yw gwerthuso ceisiadau yn unol â'r gwerthoedd a meini prawf eraill sy'n berthnasol i'r swydd ddisgrifiad.  Mae hyn wedi'i hatodi i'r hysbyseb swydd a bydd yn amlinellu'r math o dystiolaeth y dylech chi ei darparu yn eich cais.

Bydd y panel a fydd yn cyfweld â chi'n chwilio am dystiolaeth eich bod yn bodloni'r meini prawf ar bob pwynt o'r manylebau person/swydd ac fe'ch cynghorir yn gryf i ddefnyddio enghreifftiau penodol ar gyfer pob pwynt.

Efallai y bydd hefyd yn ddefnyddiol i chi strwythuro eich enghreifftiau gan ddefnyddio techneg STAR. Ffordd syml yw hon i'ch helpu i ateb y cwestiynau ar y ffurflen gais ac yn y cyfweliad, gan ddefnyddio tystiolaeth ac enghreifftiau go iawn i ddangos eich sgiliau inni.

Mae STAR yn fyrfodd Saesneg ar gyfer Sefyllfa (Situation), Tasg (Task), Gweithrediad (Action) a Chanlyniad (Result).

Sut gallaf ddefnyddio STAR?

S – Sefyllfa

Gallwch osod yr olygfa a rhoi'r cefndir a'r cyd-destun i'ch ateb inni. Ceisiwch fod yn benodol yn eich disgrifiad.

T – Tasg

Disgrifiwch y dasg yr oeddech chi'n gyfrifol am ei chyflawni yn y sefyllfa a'r hyn yr oedd angen ichi ei wneud neu ei gwblhau er mwyn ei chyflawni. Canolbwyntiwch ar y rhan yr oeddech chi'n gyfrifol amdani a byddwch yn gryno. Cofiwch gynnwys unrhyw heriau yr oeddech chi'n eu hwynebu.

A – Gweithrediad

Dyma’ch cyfle i ddweud wrthym yr hyn a wnaethoch chi i gael canlyniad da. Rydym yn chwilio am y rhan y gwnaethoch chi ei chwblhau. Gan ddefnyddio’ch enghraifft benodol, dangoswch inni’r sgiliau a ddefnyddioch chi ym mhob cam, e.e. cynllunio, cymhelliad, cyfathrebu, datrys problemau, arweinyddiaeth etc, ond sicrhewch ei bod yn berthnasol i’r cwestiwn a meini prawf y swydd ddisgrifiad.

R - Canlyniad

Dangoswch ganlyniad y sefyllfa, a’ch cyfraniad penodol chi. Gallwch hefyd ddweud wrthym yr hyn a ddysgoch chi neu os byddech chi’n gwneud pethau’n wahanol y tro nesaf.

Wrth greu rôl newydd ac wrth lenwi swydd wag, rhaid i'r Brifysgol gynnal a chofnodi asesiad sgiliau Cymraeg. Mae hyn yn cefnogi ymrwymiad y Brifysgol i normaleiddio defnyddio'r Gymraeg ac mae hefyd yn ofyniad cyfreithiol o dan Safonau’r Gymraeg.

Caiff un o'r lefelau canlynol ei bennu ar gyfer pob swydd:

Lefel 0 - Nid oes angen Cymraeg

Lefel 1 - ‘ychydig’ e.e. ynganu geiriau Cymraeg, enw lleoedd, enw adrannau. Gallu ateb y ffon yn Gymraeg (bore / prynhawn da). Gallu defnyddio neu ddysgu geiriau ac ymadroddion sylfaenol bob dydd (diolch, os gwelwch yn dda, esgusodwch fi). Gellir cyrraedd lefel 1 o gwblhau cwrs hyfforddi awr-o-hyd.

Lefel 2 - ‘eithaf da’ e.e. yn gallu deall ystod deg o ohebiaeth sy'n gysylltiedig â'r swydd, gan gynnwys pan y defnyddir iaith safonol. Yn gallu cynnal sgwrs syml ar bwnc sy'n gysylltiedig â gwaith, ond efallai y bydd angen dychwelyd i'r Saesneg i drafod gwybodaeth gymhleth neu dechnegol. Yn gallu ysgrifennu gohebiaeth adweithiol (nad yw'n arbenigol) gweddol gywir yn Gymraeg.

Lefel 3 - ‘rhugl’ e.e. yn gallu cynnal sgwrs rugl yn y Gymraeg ar fater sy'n gysylltiedig â gwaith. Yn gallu ysgrifennu deunydd Cymraeg gwreiddiol yn hyderus.

Amlinellwch yn eich cais am y swydd dan sylw sut yr ydych yn bodloni'r lefel Gymraeg a bennwyd.

Ar gyfer swyddi Lefel 1, gellir cyflawni'r lefel hon unwaith y byddwch yn dechrau eich swydd drwy gwblhau cwrs hyfforddi awr-o-hyd sy'n cwmpasu hanfodion Cymraeg ac ymwybyddiaeth gyffredinol o'r Gymraeg.

Bydd swyddi Lefel 2 a 3 fel arfer yn cael eu hasesu yn ystod y cyfweliad, gyda'r posibilrwydd o ychwanegu tasg ysgrifenedig fel y bo'n briodol. Mae cyrsiau mewnol ar gael yn rhad ac am ddim i siaradwyr Cymraeg rhugl a hoffai wella eu hyder wrth ddefnyddio'r Gymraeg yn y gwaith.

Sylwch, o dan Safonau'r Gymraeg, fod gennych hawl i gyfweliad drwy gyfrwng y Gymraeg. Gall elfennau o'r cyfweliad fod yn Saesneg os yw'n ofynnol i chi gyfathrebu'n ddwyieithog yn y rôl.

Mae’r broses llunio rhestr fer fel arfer yn dechrau’n fuan ar ôl y dyddiad cyflwyno. Os nad ydych chi’n llwyddiannus yn cyrraedd y rhestr fer, byddwn yn anfon e-bost atoch cyn gynted ag y bydd y broses llunio rhestr fer wedi’i chwblhau. Yn anffodus, oherwydd nifer fawr y ceisiadau a dderbyniwn, ar hyn o bryd nid ydym yn gallu rhoi adborth unigol.

Os ydych chi’n llwyddiannus ac yn cyrraedd y rhestr fer, byddwn yn cysylltu â chi gyda manylion y cyfweliad. A wnewch chi roi gwybod inni os oes angen unrhyw gymorth neu ofynion arbennig arall arnoch i ddod i’r cyfweliad a bydd aelod o’r tîm AD yn hapus i helpu.

Byddwn yn eich hysbysu chi am ganlyniad eich cyfweliad cyn gynted â phosib neu’n rhoi amserlen i chi o ran pryd y gallwch ddisgwyl ymateb. Mae croeso ichi ofyn am adborth gan y tîm AD ar ôl eich cyfweliad.

Os ydych chi wedi bod yn llwyddiannus, bydd aelod o’r panel cyfweld yn cysylltu â chi i drafod y cynnig. Os ydych yn dewis derbyn y swydd, bydd y tîm AD yn anfon cynnig cyflogaeth atoch ac yn eich cefnogi drwy’r broses cyn-ymuno.