Peirianneg Electronig a Thrydanol,
Mae Peirianneg Electronig a Thrydanol yn faes peirianneg cyffrous sy'n newid yn gyflym. Mae'n cynnwys technoleg lled-ddargludyddion, electroneg, cyfrifiaduron digidol, peirianneg meddalwedd, peirianneg pŵer, peirianneg ynni adnewyddadwy, telathrebu, peirianneg amledd radio, prosesu signalau, offeryniaeth, systemau rheoli a roboteg.
Yma yn Abertawe rydym yn cynnig graddau israddedig BEng a MEng gyda’r opsiwn i dreulio Blwyddyn Mewn Diwydiant a Blwyddyn Dramor yn ogystal â graddau MSc ôl-raddedig mewn Peirianneg Pŵer ac Ynni Cynaliadwy, a Pheirianneg Electronig a Thrydanol.
Mae ein holl gyrsiau wedi'u hachredu gan y Sefydliad Peirianneg a Thechnoleg (IET) ar ran y Cyngor Peirianneg ac fe'u datblygir trwy weithio'n agos gyda’r partneriaid a’r cynghorwyr o fyd diwydiant.
Caiff diddordebau ac arbenigedd ymchwil ein hadran eu grwpio i'r meysydd canlynol; Ynni a Phŵer, Lled-ddargludyddion a Nanodechnoleg a Chyfathrebu, Systemau a Meddalwedd.
Rhaglen 'Girls into Electronics' UKESF
Mae rhaglen 'Girls into Electronics' yr UKESF yn gyfle unigryw i fyfyrwyr benywaidd - sydd ym mlynyddoedd 10, 11 a 12 - i archwilio Electroneg. Mae cyfres o ddigwyddiadau undydd, a gynhelir yn ystod tymor yr haf gan brifysgolion partner yr UKESF, wrth wraidd y rhaglen. Yn ystod y dydd, bydd myfyrwyr sy'n cymryd rhan yn dysgu rhagor am Electroneg ac astudio'r pwnc yn y Brifysgol, yn clywed gan ferched sydd wedi graddio gyda gradd mewn peirianneg ac sydd bellach yn gweithio yn y sector, ac yn manteisio ar brofiad ymarferol gyda microreolwyr Arduino.
Ers 2022, mae'r rhaglen 'Girls into Electronics' wedi ysbrydoli dros 1,000 o fenywod ifanc. Mae Prifysgol Abertawe yn falch o gyhoeddi y bydd yn cynnal digwyddiad 'Girls into Electronics' ddydd Iau 26 Mehefin 2025.
Os ydych chi'n athro sydd â diddordeb mynd â grŵp o ddisgyblion i'r digwyddiad, neu os ydych chi'n fyfyriwr sydd eisiau cadw lle unigol, gallwch gadw lle nawr! Fel elusen, mae'r UKESF yn awyddus i'w chyrsiau fod yn hygyrch i bawb, felly os ydy'r ffi weinyddol yn eich rhwystro rhag mynychu, e-bostiwch nhw cyn cadw eich lle - info@ukesf.org.
I gadw eich lle
