Aelodau

Bu Anne yn ymgeisydd PhD ers mis Hydref 2023. Mae hi'n rhan o brosiect TRUE, sydd â'r nod o archwilio effaith ffugiadau dwfn ar ymddiriedaeth mewn tystiolaeth a gynhyrchir gan ddefnyddwyr mewn prosesau atebolrwydd ar gyfer troseddau yn erbyn hawliau dynol. Mae ei hymchwil yn canolbwyntio ar dystiolaeth a gynhyrchir gan ddefnyddwyr mewn achosion domestig o erlyn troseddau rhyngwladol craidd. Mae Anne yn archwilio'r strategaethau a ddefnyddir i herio dilysrwydd tystiolaeth a gynhyrchir gan ddefnyddwyr ac effaith ffugiadau dwfn ar ymddiriedaeth mewn tystiolaeth a gynhyrchir gan ddefnyddwyr.

Mae Anne wedi gweithio i gorff anllywodraethol Almaenaidd ym maes cyfathrebu gwyddonol, mewn cwmni cyfreithiol yn Berlin, ac mae hi wedi cwblhau sawl interniaeth mewn sefydliadau rhyngwladol.

Mae Kate yn fyfyrwraig PhD yn Ysgol y Gyfraith Prifysgol Abertawe, yn ymchwilio i'r fframwaith cyfreithiol a hawliau dynol yng Nghymru, yn benodol yr agweddau sy’n ymwneud â phlant a phobl ifanc ag anableddau dysgu ac awtistig.

Graddiodd Kate â gradd BA mewn Newyddiaduraeth, Ffilm a Darlledu o Brifysgol Caerdydd yn 2005 ac mae hefyd yn athrawes gymwysedig wedi iddi gwblhau'r cwrs TAR yn 2010.

Fodd bynnag, fel mam i fab ag anabledd dysgu difrifol ac awtistig, mae hi wedi cael profiad personol o ystod o anghydraddoldebau systemig a gwahaniaethu ac felly, wedi mabwysiadu llwybr gyrfa gwahanol, gyda dyheadau i newid y dirwedd anableddau er gwell.

Wedi hyn, cwblhaodd Kate y Diploma yn y Gyfraith i Raddedigion ym Mhrifysgol Abertawe yn 2017, cyn cwblhau'r LPC a'r LLM yn 2019.  Yn ystod ei hastudiaethau, gweithiodd ar nifer o rolau cyflogedig a pro-bono, yn cynnwys fel cynorthwy-ydd cyfreithiol ar gyfer yr 'Ymchwiliad i Waed Heintiedig', a darparu cefnogaeth i 'ymgyfreithwyr drostynt eu hunain' drwy ddesg gymorth 'ymgyfreithwyr' Prifysgol Abertawe, wedi'i lleoli yng Nghanolfan Llysoedd Sifil a Theuluoedd Abertawe.  Enillodd ysgoloriaeth academaidd (Ysgoloriaeth Ymchwil 3+1 y Bartneriaeth Hyfforddiant Doethurol) gan y Cyngor Ymchwil Economaidd a Chymdeithasol a chwblhaodd MSc mewn Dulliau Ymchwil Gymdeithasol yn 2022, cyn cychwyn ar PhD yn y Gyfraith.

Dechreuodd Kate ar ei thaith PhD ym Mhrifysgol Abertawe yn 2024, gan ganolbwyntio ar gymhwyso Dulliau Adferol yn y system garchardai. Mae ei hymchwil yn canolbwyntio ar unigolion a ddedfrydwyd i orchmynion Amddiffyn y Cyhoedd (IPP) Penagored - bellach wedi'u diddymu a'u condemnio gan y Cenhedloedd Unedig oherwydd torri hawliau dynol.

Cyn ymgymryd â'i hastudiaethau doethurol, dechreuodd Kate yrfa mewn Cyfiawnder Adferol yn syth ar ôl cwblhau ei gradd israddedig mewn Troseddeg a Chymdeithaseg. Yn y rôl hon, hwylusodd gyfathrebu rhwng y rhai hynny y mae troseddau wedi effeithio arnynt a'r unigolion a oedd yn gyfrifol, gan weithio ar achosion yn amrywio o anghydfodau yn y gymdogaeth i droseddau fel llofruddiaeth a dynladdiad. Wrth weithio yn y maes heriol hwn, enillodd Kate ei gradd Meistr mewn Troseddeg a Chyfiawnder Troseddol yn ystod pandemig COVID-19.

Yn ddiweddarach symudodd Kate yn fyrdymor i fyd addysgu, lle bu'n dysgu Troseddeg Safon Uwch, a chynorthwyodd ei goruchwyliwr ym Mhrifysgol Keele i gyflwyno seminarau Troseddeg i israddedigion. Yn 2023, symudodd i Gymru ar ôl cael cyfle anhygoel i gwblhau PhD mewn maes y mae hi mor angerddol amdano, ac mae hi wedi treulio'r rhan fwyaf o'i gyrfa yn gweithio ynddo. Cyn dechrau ar ei PhD, cwblhaodd Kate ail radd Meistr mewn Dulliau Ymchwil y Gwyddorau Cymdeithasol ym Mhrifysgol Abertawe, ac mae'n parhau â'i gwaith mewn Dulliau Adferol.

Mae Fariha wedi bod yn fyfyriwr PhD ym Mhrifysgol Abertawe ers mis Gorffennaf 2024. Mae ei hymchwil yn canolbwyntio ar gyfreitheg Llys Iawnderau Dynol Ewrop ynghylch y gorchudd Islamaidd. Yn benodol, ei nod yw ymchwilio i bortread menywod Mwslimaidd fel dioddefwyr mewn trafodaethau cyhoeddus mewn perthynas â gwahardd yr hijab a'r niqab, sydd, mewn effaith, yn gwadu eu galluogedd ac yn aml yn nawddoglyd ei natur. Nod ei hymchwil yw llenwi bylchau yn yr ymchwil empirig yn y maes hwn a chynnig atebion cyfreithiol-gymdeithasol y gellir eu defnyddio i ganiatáu i'r menywod hyn leisio eu barn yn y broses llunio penderfyniadau.

Graddiodd Fariha gyda gradd anrhydedd dosbarth cyntaf yn y Gyfraith o Brifysgol Caerdydd yn 2019 a graddiodd hi gyda gradd Meistr o Brifysgol Rhydychen yn 2021. Yn ystod ei hastudiaethau, cwblhaodd brosiectau pro bono amrywiol, megis gweithio ar y Rhaglen Cymorth a Hunangymorth Cyfraith Teulu, y Cynllun Cyfiawnder Byd-eang a'r Sefydliad Cyfraith Amgylcheddol ym Mhrifysgol Caerdydd. Mae hi hefyd wedi cwblhau interniaeth yn nghyfarwyddiaeth gwasanaethau cyfreithiol Senedd Cymru ac, yn ddiweddar, bu’n gweithio fel swyddog proffesiynol cynorthwyol yn Nghyngor Dinas Sheffield.

Mae Alun Thomas yn fyfyriwr PhD sy’n gweithio ar draethawd hir â’r teitl 'Developing Welsh Law to Protect the Liberty of the Mentally Ill'. Mae ei draethawd hir yn archwilio sut gallai deddfwriaeth sy’n neilltuol i Gymru roi hawliau ychwanegol i gleifion ac felly iawndal i’r sawl a allai gael eu rhwystro pan fydd gwasanaethau wedi methu cyflawni’n unol â disgwyliadau rhesymol.

Mae e’n gweithio ar y traethawd hir hwn ar sail ran-amser ochr yn ochr â’i swydd yn Brif Weithredwr Hafal, y brif elusen dros bobl â salwch meddwl difrifol a’u gofalwyr yng Nghymru. Sefydliad a arweinir gan aelodau yw Hafal, sy’n cefnogi dros 1,500 o bobl bob dydd ledled pob un o’r 22 o awdurdodau lleol yng Nghymru. Mae Alun yn Nyrs Cyffredinol Cofrestredig sydd wedi gweithio yn y GIG, wedi datblygu gwasanaeth adsefydlu niwrolegol yn y sector gofal iechyd preifat, a bellach gyda Hafal mae wedi arwain y sefydliad wrth ddatblygu cyfleuster i gleifion mewnol sydd wedi’i arwain gan ddefnyddwyr a’i gynnal gan yr elusen.

Ymunodd Mary â Phrifysgol Abertawe yn 2019 ac mae hi'n astudio ar gyfer PhD ar hyn o bryd, gan ymchwilio i fregusrwydd yn y Llys Troseddol Rhyngwladol. Cyn iddi ymgymryd â'r rhaglen PhD, astudiodd hi LLB yn y Gyfraith a Sbaeneg ac LLM mewn Hawliau Dynol. Yn ystod y cyfnod hwn, astudiodd hi amrywiaeth o bynciau sy'n gysylltiedig â hawliau dynol, megis hawliau plant, cyfraith ddyngarol a biofoeseg. Ym mis Medi 2024, cwblhaodd draethawd hir ei gradd Meistr â'r teitl, ‘A Socio-legal Review on the Adequacy of Healthcare in Wales for Disabled People under the UNCRPD Right to Health’. Ar ben hynny, mae hi hefyd wedi cynnal ymchwil ar y cyd â Phrifysgol Abertawe a Chanolfan Gyfreithiol y Plant Cymru fel rhan o interniaeth i ganfod sut mae lleisiau plant yn cael eu defnyddio mewn ysgolion. Mae hi hefyd yn gweithio gyda'r Prosiect Llythrennedd ar gyfer Siaradwyr Sbaeneg yn y Brifysgol, gan helpu'r gwaith o integreiddio ceiswyr lloches yn Abertawe. Fel menyw awtistig gwiar, mae Mary hefyd wedi profi bregusrwydd yn bersonol ac mae'n ymwybodol o'r bylchau gweithredu mewn polisi cyhoeddus a llywodraethu, oherwydd ei phrofiad personol, sy'n gadael pobl sy'n agored i newid heb amddiffyniad ac mewn perygl o gael eu trin yn wahaniaethol.

Mae Morgan yn fyfyriwr PhD ym Mhrifysgol Abertawe, yn ymchwilio i groestoriad democratiaeth a hawliau carcharorion, gyda ffocws ar gyfranogiad democrataidd y system cyfiawnder troseddol. Bwriad ymchwil Morgan yw nodi a yw fframweithiau cyfreithiol presennol yn cyd-fynd ag egwyddorion democrataidd a chanfod goblygiadau gwahardd rhai carcharorion rhag cyfranogiad gwleidyddol. Drwy wneud hynny, mae'n gobeithio mynd i'r afael â chwestiynau ehangach ynghylch cyfreithlondeb systemau democrataidd pan gânt eu cymhwyso i boblogaethau sydd wedi'u hymylu.

Gradd LLB ac LLM mewn Cyfraith Fasnachol Ryngwladol o Abertawe sydd gan Morgan, lle bu'n astudio ystod arbennig o amrywiol o bynciau cyfreithiol cymhleth yn fanwl. Roedd y gwaith Meistr yn cynnwys traethodau hir ar greu a gorfodi buddiannau diogelwch ac archwilio'r heriau cyfreithiol a pholisi a gyflwynwyd gan ymgynghoriad Llywodraeth y DU ar ddeallusrwydd artiffisial (AI) a hawliau eiddo deallusol, yn enwedig o ran gweithiau a dyfeisiadau a gynhyrchwyd gan AI.

Mae'r profiad proffesiynol yn rhyngddisgyblaethol, gyda rolau'n cwmpasu hyfforddiant ac addysg marchogaeth, telathrebu, iechyd meddwl a gwaith yn y Gwasanaeth Carchardai. Uchelgais Morgan yw gyrfa yn y byd academaidd, lle mae am gyfrannu at ymchwil effeithiol ac ysbrydoli cenedlaethau'r dyfodol trwy addysgu.

Rwy'n ymchwilydd ac yn eiriolwr angerddol sy'n ymroddedig i ddatblygu cyfraith hawliau dynol, ac rwy'n astudio PhD ar hyn o bryd sy'n canolbwyntio ar hawliau ffoaduriaid a cheiswyr lloches yn system fewnfudo'r DU. Mae gennyf gefndir academaidd cryf, gan gynnwys gradd Meistr mewn Hawliau Dynol Rhyngwladol o Brifysgol Abertawe, sydd wedi fy arfogi â'r wybodaeth a'r sgiliau angenrheidiol i arwain newid yn y maes hollbwysig hwn.

Yn ogystal â'm cyflawniadau academaidd, rwyf wedi ennill profiad ymarferol gwerthfawr fel swyddog gweinyddol mewn cwmni cyfraith fewnfudo.   Rwyf wedi bod yn rhan o amryw o fentrau sy'n amlygu fy ymrwymiad diwyro i ddiogelu a hyrwyddo hawliau dynol. Gydag ymroddiad dwfn i gyfiawnder a newid cymdeithasol, rwyf yn parhau i gyfrannu at ddisgwrs ddatblygol ynghylch mewnfudo a hawliau dynol.