PRENTISIAETHAU GRADD PEIRIANNEG AWYRENNEG A GWEITHGYNHYRCHU

Gwella'ch Gwybodaeth mewn Peirianneg Awyrenneg a Gweithgynhyrchu

OPSIYNAU PRENTISIAETH A THROSOLWG O’R CWRS

Manylion allweddol y cwrs
Dyddiad cychwyn	Mis Medi
Ffioedd dysgu	£9000 y flwyddyn (cyllid ar gael i fyfyrwyr cymwys, gweler Ffioedd Dysgu a Chyllid isod)
Lleoliad	Coleg Cambria yn bennaf, Glannau Dyfrdwy Cynhelir gweithgarwch y lleoliad ar Gampws y Bae, Prifysgol Abertawe
Cyfarwyddwr y Rhaglen

Opsiynau Prentisiaeth

Gradd Sylfaen - Rhaglen 2 flynedd yw hon. Y cymhwyster olaf fydd Gradd Sylfaen mewn Peirianneg Awyrenneg a Gweithgynhyrchu.

Prentisiaeth Gradd BEng - Dyma'r rhaglen 3 blynedd lawn. Y cymhwyster olaf fydd BEng mewn Peirianneg Awyrenneg a Gweithgynhyrchu.

Trosolwg o'r Cwrs

Cwricwlwm eang yw’r Brentisiaeth Gradd mewn Peirianneg Awyrenneg a Gweithgynhyrchu sy'n ymdrin ag agweddau ar beirianneg fecanyddol ac awyrenneg, dylunio peirianegol, deunyddiau, dulliau gweithgynhyrchu, aerodynameg, dadansoddi a modelu rhifiadol yn ogystal â hanfodion sylfaenol mathemateg, egwyddorion peirianneg a methodolegau dylunio.

Dyluniwyd y rhaglen ar gyfer dysgwyr a gyflogir yn y sector peirianegol, gan mai dymuniad cwmnïau fwyfwy yw cyflogi pobl â chymwysterau da sy’n gadael yr ysgol a'u cyfeirio trwy gynllun prentisiaeth gradd wedi’i sefydlu yn hytrach na chyflogi graddedigion. Mae Prentisiaeth Gradd BEng yn llwybr deniadol i gyflogeion presennol neu'r rheiny sydd wedi dilyn llwybr cymhwyster galwedigaethol yn y sector AB i ennill cymhwyster lefel gradd, gan y gellir ennill y cymhwyster ochr yn ochr â phrofiad ym myd diwydiant, a bydd llai o ddyled ar gyfer y myfyriwr.

Partneriaeth a gyflenwir ar y cyd rhwng Prifysgol Abertawe, Coleg Cambria a'r cwmnïau sy’n cyflogi yw’r radd BEng, a ddyfernir gan Brifysgol Abertawe. Prifysgol Abertawe sy’n dyfarnu’r graddau.

MANTEISION ALLWEDDOL YN SGÎL ASTUDIO YM MHRIFYSGOL ABERTAWE

Mae Prifysgol Abertawe wedi bod yn gweithio’n agos gyda byd diwydiant ers ei sefydlu mwy na 100 mlynedd yn ôl ac mae ganddi brofiad hir o ddarparu addysg o safon sy’n seiliedig ar ddiwydiant, yn enwedig ym maes Peirianneg. Gyda chefndir ymchwil rhagorol, mae’r holl bynciau Peirianneg ymysg 25 Gorau’r DU yn ôl The Times University Guide 2021.

Nodweddion allweddol y rhaglen Prentisiaeth Gradd BEng:

Tiwtoriaid Peirianneg hyfedr Coleg Cambria a Phrifysgol Abertawe sy’n meddu ar ystod o wybodaeth ddiwydiannol ac academaidd fydd yn addysgu’r modiwlau
Cyfleusterau ac adnoddau o safon fyd-eang
Cyfuniad o astudiaethau academaidd sy'n gysylltiedig â chymwysiadau galwedigaethol ymarferol ym mhob un o’r modiwlau pwnc
Cysylltiadau rhagorol â llawer o fusnesau ac arweinwyr busnes
Cefnogaeth ragorol i fyfyrwyr, ac mae gan bob myfyriwr diwtor personol
Darparwr profiadol o lwybrau prentisiaeth

Mae'r rhaglen Gradd-brentisiaeth wedi'i hachredu gan y Gymdeithas Awyrenneg Frenhinol (RAeS) a chan Sefydliad y Peirianwyr Mecanyddol (IMechE).

Gan ddefnyddio'r Fframwaith ar gyfer Graddau-brentisiaeth mewn Peirianneg a Gweithgynhyrchu Uwch, cynlluniwyd y rhaglen hon i fodloni'r holl elfennau craidd (adrannau 1 i 5) i sicrhau bod gan ein graddedigion wybodaeth gynhwysfawr ac amlddisgyblaethol yn barod ar gyfer dyfodol yn y sector peirianneg. Mae’r Radd-brentisiaeth wedi'i chyd-achredu gan y Gymdeithas Awyrenneg Frenhinol a Sefydliad y Peirianwyr Mecanyddol fel un sy'n bodloni gofynion academaidd IEng ac sy’n bodloni'n rhannol gofynion statws proffesiynol CEng.

EICH PROFIAD

Fel rhan o'ch cyflogaeth, byddwch chi’n cofrestru ar gyfer Prentisiaeth Gradd ac yn cael eich cofrestru fel myfyriwr gyda Phrifysgol Abertawe a Choleg Cambria. Byddwch chi’n cael eich rhyddhau o’ch gwaith am un diwrnod yr wythnos i astudio, a fydd yn cael ei gynnal fel arfer ar safle Coleg Glannau Dyfrdwy Coleg Cambria. Bydd hyn yn rhan o'ch cyflogaeth arferol ac ni ddylai fod yn ofynnol i chi wneud iawn am yr oriau ar wahân.

Bydd yr un diwrnod yr wythnos yn cynnwys dysgu ac addysgu eithaf dwys gan gynnwys cyfuniad o ddarlithoedd ystafell ddosbarth confensiynol, gwaith cyfrifiadurol a gweithgareddau ymarferol/prosiect. Bydd disgwyl ichi ymgymryd ag astudiaeth ychwanegol yn eich amser eich hun y tu allan i'r cyfnodau hyn a seilir tua 25% o'r cwrs o amgylch y prosiectau gwaith y byddwch chi’n eu cwblhau yn eich gwaith arferol. Byddwch chi’n derbyn mentor yn y gweithle a fydd yn eich arwain yn hyn o beth.

Caiff yr asesiadau eu lledaenu drwy gydol y flwyddyn a bydd cyfuniad o arholiadau ffurfiol, gwaith cwrs, adroddiadau dylunio a phrosiect yn ogystal ag aseiniadau cyfrifiadurol. Wrth ddewis y prosiect, yn enwedig yn y flwyddyn olaf, byddwch chi’n gallu nodi'r pynciau ar gyfer eich prif brosiect ymchwil a fydd yn cyd-fynd â'r rôl rydych chi'n ei chyflawni yn y gweithle.

Mae hwn yn gwrs ar gyfer ymgeiswyr sy'n gweithio mewn maes peirianneg perthnasol. Bydd gofyn i gyflogwyr gefnogi eu gweithwyr o ran rhoi’r amser iddynt fynd i’r cwrs ac i astudio, heb unrhyw ofyniad iddynt weithio’r oriau yn ôl na didyniadau mewn cyflog.Byddai'n ofynnol i gyflogwyr a myfyrwyr lofnodi Cytundeb Dysgu i fod yn gymwys i dderbyn cyllid Gradd-brentisiaeth.

Gofynion Mynediad

Blwyddyn 1

Graddau Safon Uwch BBB, gan gynnwys Mathemateg a Ffiseg. Does dim gofyniad ar gyfer y drydedd Safon Uwch ond mae un o blith Cemeg, Dylunio, TG/Cyfrifiadura, Mathemateg Bellach a/neu Fusnes/Economeg yn ddelfrydol neu gymhwyster BTEC perthnasol gyda graddau D*D*D* gyda Theilyngdod yn y Modiwl Mathemateg Bellach .

Cymhwyster NHC perthnasol (120 credydau, gweler y nodyn isod ar fynediad Blwyddyn 2)

Gall myfyrwyr gyda Chymhwyster BTEC Lefel 3 perthnasol gyda gradd gyffredinol o Deilyngdod, gan gynnwys Teilyngdod yn y modiwl Mathemateg Bellach, hefyd gyflwyno cais. Caiff ceisiadau eu hystyried fesul achos ac efallai y bydd yn rhaid i ymgeiswyr sefyll a llwyddo arholiad mynediad.

Blwyddyn 2

Efallai y bydd myfyrwyr â chymwysterau HNC perthnasol (120 o gredydau) sy'n meddu ar raddau digon uchel* ym modiwlau eu HNC yn cael ymuno â'r rhaglen Fd/BEng ym Mlwyddyn 2. Caiff ceisiadau eu hystyried fesul achos gan staff academaidd Prifysgol Abertawe a Choleg Cambria.

*Fel arfer, Rhagoriaeth gan gynnwys mathemateg.

Blwyddyn 3

Rhoddir ystyriaeth fanwl i Radd Sylfaen gyda modiwlau tebyg iawn fesul achos gan Staff Academaidd ym Mhrifysgol Abertawe a Choleg Cambria

Gradd FdEng berthnasol (240 o gredydau) neu Ddiploma Lefel 5.

Yn ogystal â hyn i gyd, rhaid bod gan ymgeiswyr TGAU Iaith Saesneg a TGAU Mathemateg neu Rifedd ar radd C neu'n uwch.

Caiff unrhyw asesiad o ddysgu blaenorol (megis dyfarniadau datblygiad proffesiynol neu ddyfarniadau sy'n seiliedig ar gyflogaeth) sy'n uwch na lefel Addysg Uwch ond nid yw'n derbyn credydau AU, ei ystyried fesul achos gan Staff Academaidd Prifysgol Abertawe a Choleg Cambria.

Meini Prawf Cymhwystra

Mae’n rhaid cyflogi dysgwyr am o leiaf 30 awr yr wythnos (mewn maes cysylltiedig).
Bydd yn rhaid i'r cyflogwr gytuno i'r dysgwr gofrestru ar y cwrs a chytuno ar iddo gael ei ryddhau unwaith yr wythnos.
Bydd yn rhaid i'r cyflogwr hefyd ddarparu cefnogaeth o ran mentora / goruchwylio yn y gweithle er mwyn gwella'r dysgu uniongyrchol.
Bydd yn rhaid i'r dysgwr weithio 51% o'r amser yng Nghymru i fod yn gymwys i gael cymorth cyllido'r rhaglen.

Sut Byddwch Chi’n Cael Eich Addysgu

Cyflenwir y cynnwys a addysgir ar sail un diwrnod yr wythnos yn y Ganolfan AU, campws Glannau Dyfrdwy Coleg Cambria. Rhennir y cyfleuster hwn sydd wedi’i gyfarparu’n dda rhwng Coleg Cambria a Phrifysgol Abertawe ac mae'n cynnwys ystafelloedd dysgu, ystafelloedd CP, labordai a rhywfaint o le cyffredin. Mae'r addysgu'n benodol i garfan y Prentisiaethau Gradd a bydd rhwng 25 a 35 o fyfyrwyr fel arfer yn y dosbarthiadau. Ymhlith y dulliau addysgu bydd darlithoedd confensiynol, gwaith ymarferol, enghreifftiau fesul cam, dosbarthiadau dylunio cyfrifiadurol a phrosiectau dylunio. Staff Coleg Cambria fydd yn addysgu blynyddoedd 1 a 2 yn bennaf a staff Prifysgol Abertawe fydd yn addysgu Blwyddyn 3 yn bennaf.

Mae prosiect sylweddol yn y gwaith yn cael ei gynnwys ym mhob blwyddyn, a bydd hwn yn cael ei oruchwylio gan aelod o’r staff addysgu a'i gefnogi gan fentor yn eich gweithle. Mae prosiect y flwyddyn olaf yn cyfuno agweddau technegol uwch yn rhan o broblem sy’n seiliedig ar y gwaith a chi a'ch goruchwyliwr fydd yn pennu hyn ar y cyd.

Er mwyn i ddysgwyr gael y profiad go iawn o fod yn fyfyriwr mewn prifysgol a arweinir gan ymchwil, cynhelir gweithgarwch lleoli dwys ym Mhrifysgol Abertawe yn ystod pob un o'r tair blynedd. Rhwng 3 diwrnod ac wythnos fydd hyd pob lleoliad a bydd yn gwneud y defnydd gorau o'r cyfleusterau lefel uchel sydd ar gael yn Abertawe i gefnogi gweddill y cynlluniau gradd.

Caiff yr asesiadau eu lledaenu drwy gydol y flwyddyn a bydd yn cynnwys ystod o ddulliau gan gynnwys profion ac arholiadau ffurfiol, gwaith cwrs ysgrifenedig a chyfrifiadurol, adroddiadau ymarferol a phrosiect, cyflwyniadau a rhywfaint o asesu cymwyseddau ymarferol. Yn ogystal â'r oriau a addysgir, bydd gofyn i’r myfyrwyr ymgymryd â chyfnodau o astudiaeth hunangyfeiriedig a chyfnod mewn lleoliad ym Mhrifysgol Abertawe.

Ffioedd Dysgu a Chyllid

Gradd Sylfaen - £7500 y flwyddyn am 2 flynedd o astudio. Darperir cymorth cyllid drwy raglen Prentisiaethau Uwch Llywodraeth Cymru (ar gyfer myfyrwyr cymwys o'r DU).

Prentisiaeth Gradd BEng - £9000 y flwyddyn am 3 blynedd. Cyngor Cyllido Addysg Uwch Cymru (CCAUC) fydd yn darparu’r cymorth cyllid (ar gyfer myfyrwyr cymwys yn y DU/UE).

Ariennir y Rhaglen Prentisiaethau Gradd yn llawn gan Gyngor Cyllido Addysg Uwch Cymru*. Ni fydd yn rhaid i fyfyrwyr cyflogedig cymwys dalu ffioedd cwrs. Byddai'n ofynnol i gyflogwyr a myfyrwyr lofnodi Cytundeb Dysgu i fod yn gymwys i dderbyn cyllid Gradd-brentisiaeth.

*Hwyrach y bydd y cyllid hwn yn ddarostyngedig i newid.

Sut i Gyflwyno Cais

Nid yw'r cwrs hwn yn recriwtio trwy UCAS.

Y cam cyntaf yn y broses hon yw cysylltu â chydlynydd y rhaglen a fydd yn gallu rhoi cyfarwyddyd ichi ynglŷn â’ch cais.

Cysylltwch ag eng-degree-apprenticeships@swansea.ac.uk, ac wedi hynny bydd angen i chi wneud Cais Uniongyrchol gyda Choleg Cambria.