Catalaneg, Eidaleg, Portiwgaleg ... mwy o opsiynau ar gyfer astudio ieithoedd yn Abertawe wrth i adran roi hwb i'r cysylltiadau ag ysgolion hefyd

Mae astudio ieithoedd modern yn Abertawe yn galluogi myfyrwyr i ddilyn graddau israddedig sy'n cynnwys Ffrangeg, Almaeneg a Sbaeneg, ynghyd â disgyblaethau cysylltiedig cyfieithu a chyfieithu ar y pryd, gyda chyfleoedd i astudio a gweithio dramor.

Gall myfyrwyr sy'n dilyn y brif raglen radd, BA Ieithoedd Modern, bellach hefyd gynnwys Catalaneg, Eidaleg a Phortiwgaleg fel opsiynau o lefel dechreuwyr os dymunant.  Mae llwybrau eraill y gallant eu dilyn yn cynnwys astudiaethau diwylliannol, addysgu ail iaith, a chyfieithu.

Daw hwb diweddar arall i ieithoedd yn Abertawe o bartneriaeth newydd ei sefydlu gyda'r Gymdeithas Dysgu Ieithoedd (ALL), y brif gymdeithas bwnc i'r rhai hynny sy'n ymwneud ag addysgu ieithoedd rhyngwladol ar bob lefel.

Mae Abertawe wedi dod yn aelod corfforaethol o'r Gymdeithas, gan ymuno ag amrywiaeth o gyrff uchel eu bri gan gynnwys y Cyngor Prydeinig, y cyhoeddwyr geiriaduron Collins, a'r Institut Français a'r Goethe Institut, sef y prif sefydliadau sy'n hyrwyddo Ffrangeg ac Almaeneg yn y drefn honno ledled y DU.

Prif fantais bod yn bartner ALL yw y bydd yn gwella cysylltiadau tîm Ieithoedd Modern Abertawe ag ysgolion ymhellach gan fod gan ALL rwydwaith sy'n cynnwys mwy na 4,000 o athrawon ledled y DU.   Eisoes, mae tîm Abertawe wedi bod yn cynnig sesiynau allgymorth rhithwir i ddisgyblion ysgol, er enghraifft ar destun penodol maen nhw'n ei astudio, gyda digwyddiad diweddar ar gyfer ysgolion lleol yn denu tua 250 o ddisgyblion.

Mae Abertawe yn dod yn bartner i ALL hefyd yn cyd-fynd â lansio cangen newydd ALL Cymru yng Nghymru.

Yn fwyaf diweddar, mae Prifysgol Abertawe hefyd wedi lansio rhaglen celfyddydau rhyddfrydol newydd, y BA Anrhydedd Cyfunol.  Yn ogystal â'r gyfres gyflawn o fodiwlau iaith Ffrangeg, Almaeneg a Sbaeneg, mae myfyrwyr hefyd yn gallu dewis modiwlau o'r holl feysydd pwnc eraill yn yr Ysgol Diwylliant a Chyfathrebu: hwb arall i egin ieithyddion yng Nghymru a thu hwnt.

Meddai Dr Greg Herman, uwch-ddarlithydd mewn Ieithoedd Modern:

"Mwy o ieithoedd ar gael i'n myfyrwyr a chysylltiadau cryfach â disgyblion ysgol drwy'r Gymdeithas Dysgu Ieithoedd; mae'r ddau ddatblygiad diweddar hyn, ynghyd â derbyn mwy o fyfyrwyr dros y pum mlynedd diwethaf, yn dangos sut mae ieithoedd yn ffynnu ym Mhrifysgol Abertawe.

Bydd cynnig Catalaneg, Eidaleg a Phortiwgaleg yn golygu mwy o ddewis i'n myfyrwyr.  Bydd partneriaeth ALL yn ein helpu i hyrwyddo ieithoedd mewn ysgolion ledled y DU.

Yn ogystal â rhoi dewis eang o opsiynau i chi eu dilyn, mae astudio ieithoedd yn Abertawe yn cynnig  mynediad at labordai iaith, gwasanaethau ffrydio, a thechnoleg cyfieithu a chyfieithu ar y pryd.  Hefyd, wrth gwrs, mae gennych yr opsiwn i dreulio eich trydedd flwyddyn dramor, gyda chymorth ein staff, yn rhai o leoedd mwyaf cyffrous Ewrop.

Rydym yn edrych ymlaen at glywed gan unrhyw un sydd eisiau darganfod mwy am astudio ieithoedd gyda ni yma yn Abertawe. Cysylltwch â ni!”

Sylwadau myfyrwyr:

Freddie Bercow:

"Roedd Eidaleg i Ddechreuwyr yn gyflwyniad gwych i'r iaith a'r diwylliant – yn ddiddorol, yn hwyl, ac yn sylfaen wych ar gyfer fy nhaith ieithoedd modern!"

Bryher Thornton-Brake:

"Rydw i wedi bod eisiau dysgu Eidaleg ers pan roeddwn i'n ifanc iawn, ac roedd yn hynod werthfawr caffael yr iaith a chael siarad mor gyflym, yn enwedig mewn awyrgylch mor hwyliog, heb ormod o bwysau. Rwy'n llawn cyffro wrth barhau i astudio Eidaleg eleni."

Gwnaeth Joe Nash, Hyrwyddwr Cymraeg a raddiodd yn ddiweddar,  grynhoi ei amser yn astudio Ieithoedd Modern yn Abertawe:

"Mae astudio Sbaeneg ym Mhrifysgol Abertawe wedi bod yn drawsnewidiol. O ddarlithwyr cefnogol i fodiwlau sy'n ysgogol yn ddeallusol, mae pob eiliad wedi dyfnhau fy nghariad at yr iaith. Roedd fy amser yma yn fythgofiadwy ac wedi cyfrannu at fy hyder fel cyfathrebwr byd-eang."