Technegydd Lled-ddargludyddion Moleciwlaidd a Dyddodi Anwedd Moleciwlaidd

Y Brifysgol

Mae Prifysgol Abertawe'n brifysgol a arweinir gan ymchwil sydd wedi bod yn gwneud gwahaniaeth ers 1920. Mae cymuned y Brifysgol yn ffynnu ar archwilio a darganfod ac mae'n cynnig y cydbwysedd cywir o addysgu ac ymchwil rhagorol i gyd-fynd ag ansawdd bywyd ardderchog.

Mae ein campysau glan môr a'n cymuned amlddiwylliannol yn gwneud y Brifysgol yn weithle dymunol i gydweithwyr o bedwar ban byd. Mae ein cydnabyddiaeth a'n buddion, a'n ffyrdd o weithio, yn galluogi i bobl sy'n ymuno â ni i gael gyrfaoedd gwobrwyol, ar y cyd â chydbwysedd gwaith-bywyd rhagorol.

Y rôl

Dyma gyfle rhagorol i unigolyn ag arbenigedd technegol i gael swydd sy'n cefnogi cyfleusterau lled-ddargludol o'r radd flaenaf yng Nghanolfan Deunyddiau Lled-ddargludol Integreiddiol (CISM) Prifysgol Abertawe. Bydd y swydd yn chwarae rôl allweddol wrth gynnal y cyfleuster a'r labordai nodweddu. Y prif waith fydd cynnal a chadw'r ystafelloedd glân a'r cyfarpar lled-ddargludol. Mae gan yr ystafell lân ystod drawiadol o gyfarpar gan alluogi ymchwil a datblygu ar lefel uwch i ystod eang o ddyfeisiau electronig.

Mae cyfarpar o'r fath yn cynnwys Offer Clwstwr Blwch Menig Sych sy'n Rhydd o Ocsigen i Brosesu Dyfeisiau Lled-ddargludol Moleciwlaidd, Dyddodi Anweddau (PECVD, PVD, MVD), Ysgythru Plasma (RIE, ICP, APS, DRIE), Cwtogi Thermol (Tube, RTA) yn ogystal ag ystafell Ffotolithograffeg lawn (Spin/Spray Coaters, Mask Aligners, Nanoimprint). Er bod profiad o ddefnyddio cyfarpar lled-ddargludol (yn benodol Blwch Menig a/neu dechnegau dyddodi) yn ddymunol, rydym hefyd yn croesawu ymgeiswyr â phrofiad technegol mewn lleoliad uwch-dechnoleg sy'n cynnwys peirianwaith ac offer mecanyddol, trydanol a phrosesu uwch gyda pharodrwydd i ddysgu.

Mae'r Ganolfan Deunyddiau Lled-ddargludol Integreiddiol (CISM) yn darparu cymorth ymchwil ac arloesi hollbwysig i'r Clwstwr CSConnected, rhwydwaith sy'n tyfu o bartneriaid yn y diwydiant lled-ddargludol rhanbarthol. Mae partneriaid y Clwstwr hefyd yn cynnwys Prifysgolion Abertawe a Chaerdydd; Llywodraeth Cymru a Bargen Ddinesig Prifddinas-Ranbarth Caerdydd mewn ymdrech a gydlynir i gyflwyno màs critigol a mantais gystadleuol ar gyfer gweithgynhyrchu lled-ddargludol yn y rhanbarth.

Cydraddoldeb, Amrywiaeth a Chynhwysiant

Mae'r Brifysgol yn ymrwymedig i gefnogi a hyrwyddo cydraddoldeb ac amrywiaeth yn ei holl arferion a gweithgareddau. Rydym yn ymdrechu i greu amgylchedd cynhwysol a chroesawn geisiadau gan ymgeiswyr amrywiol o'r grwpiau nodweddion gwarchodedig canlynol: oedran, anabledd, ailbennu rhywedd, priodas a phartneriaeth sifil, beichiogrwydd a mamolaeth, hil (gan gynnwys lliw croen, cenedligrwydd, tarddiad ethnig a chenedlaethol), crefydd a chred, rhyw, tueddfryd rhywiol.

Sgiliau Cymraeg

Lefel y sgiliau Cymraeg sydd ei hangen ar gyfer y rôl hon yw Lefel 1 - Ychydig. Bydd deiliad y swydd yn gallu ynganu geiriau Cymraeg, ateb y ffôn yn Gymraeg, a defnyddio geiriau ac ymadroddion sylfaenol bob dydd (diolch, os gwelwch yn dda). Gellir cyrraedd lefel 1 o gwblhau cwrs hyfforddi un awr.

Mae’r Brifysgol yn sefydliad dwyieithog balch, ac mae Strategaeth Gymraeg y Brifysgol yn amlinellu ein dyheadau i hyrwyddo’r iaith a galluogi ein staff i ddod i gyswllt â’r iaith fel sgil ychwanegol yn y gweithle ac fel porth i gyfleoedd diwylliannol a chymdeithasol newydd. Croesewir ceisiadau yn y Gymraeg ac ni chaiff cais a gyflwynir yn y Gymraeg ei drin yn llai ffafriol na chais a gyflwynir yn Saesneg. Mae gan siaradwyr Cymraeg yr hawl i gael cyfweliad yn Gymraeg. Disgwylir i ymgeiswyr ar gyfer rôl lle mae sgiliau Cymraeg yn hanfodol gyflwyno’u cais yn Gymraeg, a bydd y cyfweliad yn Gymraeg, os byddwch yn cyrraedd y rhestr fer.

Gwybodaeth Ychwanegol

Gallwch gyflwyno CV a llythyr eglurhaol ar gyfer y swydd hon.

Rhannu Lawrlwytho Disgrifiad swydd.docx Lawrlwytho FSE-Candidate-Brochure-(CY).pdf Argraffu'r dudalen hon Yn ôl at y rhestr