Sefydlwyd Koppert ym 1967 gan Jan Koppert a'i feibion Peter a Paul, i greu dewis cynaliadwy yn hytrach na defnyddio plaladdwyr cemegol. Gan weithio gyda thyfwyr, partneriaid, prifysgolion, gorsafoedd ymchwil, a chyrff llywodraethol ledled y byd, mae dewisiadau amgen Koppert yn cael eu defnyddio mewn mwy na chant o wledydd.
Allwch chi ddweud ychydig wrthym amdanoch chi eich hun?
Fi yw David Foster, Rheolwr Cyffredinol Koppert UK. Rydw i wedi gweithio gyda Koppert am 24 mlynedd ac fel y Rheolwr Cyffredinol ers 2014. Rwy'n gyfrifol am y busnes yn y DU ac Iwerddon.
Hanes Koppert...
Ein busnes craidd yw cyflenwi rheoli biolegol a peillwyr, sef pryfed buddiol, gwiddon a chacwn. O ran y farchnad, rydym yn diogelu llysiau gan gynnwys tomatos, ciwcymbrau, pupurau a wylysiau, fodd bynnag, rydym hefyd yn symud at gnydau ffrwythau meddal o ganlyniad i sawl ffactor gan gynnwys y farchnad yn colli plaladdwyr, problemau gyda gweddillion cemegol ac ymwrthedd i blaladdwyr mewn poblogaethau plâu. Rydym hefyd yn cyflenwi ar draws garddwriaeth, gan gynnwys planhigion addurnol. Rydym yn gweld cyfleoedd mewn amaethyddiaeth maes agored hefyd wrth i ni symud ymlaen gydag atebion biolegol, yn sgil ystod o ffactorau gan gynnwys llygredd, iechyd dynol a lefelau gweddillion.
Ni yw arweinwyr y farchnad yn y DU, ac ni yw arweinwyr y farchnad ryngwladol yn y maes hwn hefyd, gan weithredu mewn dros gant o wledydd ledled y byd. Ffatri gangen y DU yw is-gwmni'r brand Koppert rhyngwladol, ac ni yw'r is-gwmni hynaf, gyda gweithgarwch wedi dechrau ym 1981.
Pwysigrwydd cynaliadwyedd...
Beth sy'n fwy cynaliadwy na bod yn bartner â natur? Rydym yn astudio natur yn Koppert ac yn dod o hyd i atebion biolegol. Rydym yn credu bod natur yn darparu llawer o'r atebion sydd eu hangen ar gyfer cynhyrchu bwyd cynaliadwy. Mae hyn yn cysylltu'n ôl â hanes y busnes, lle roedd ein sylfaenydd yn profi alergedd difrifol gan blaladdwyr cemegol a ddefnyddiwyd i fynd i'r afael â gwiddon coch, gan ei arwain at greu ateb amgen a oedd yn fwy cynaliadwy. Ar ôl arbrofi â gwiddon ysglyfaethus o'r Swistir, sylwodd fod ei gnydau ciwcymber yn adfer ac o ganlyniad, aeth ati i sefydlu Koppert. Hyd yn oed nawr, mae gwerthiant Spidex (Phytoseiulus persimilis), yn tyfu'n sylweddol o gwmpas y byd bob blwyddyn. Mae llawer o opsiynau cemegol wedi'u defnyddio i drin yr un pla, fodd bynnag mae llawer wedi cael eu gwahardd neu mae’r plâu wedi meithrin ymwrthedd.
I osgoi trawsgludiad anghynaliadwy, rydym wedi rhoi'r gorau i roi arian mewn cyfleusterau o gwmpas y byd gan gynnwys Affrica, Gogledd America, ac Ewrop. Rydym yn chwilio am ffyrdd eraill i leihau ein hôl troed carbon ymhellach drwy fynd i'r afael â defnydd pecynnu plastig a chyflwyno cerbydau trydan ar draws y cwmni. Fel ffactor hanfodol yn ein busnes, mae gwaredu ar gemegolion o'r diwydiant amaethyddol yn gam cynaliadwy mawr. Rydym yn mesur lleihad mewn cemegolion yn flynyddol a rhan o'n cenhadaeth yw lleihau'r defnydd o blaladdwyr deg gwaith drosodd yn y deng mlynedd nesaf.
Nid yw hyn yn canolbwyntio ar y llwybrau cynaliadwy amlwg yn unig. Er ein bod ni i gyd yn ymwybodol o'r problemau sy'n ymwneud â phlastigion, nid ydym bob amser yn cofio am yr helynt y mae cemegolion yn eu creu i iechyd dynol. Os ydym yn mynd yn ôl ychydig o genedlaethau, roedd ein tadau cu a'n mamau cu a'n perthnasau gynt yn casglu bwyd mewn ffordd iachach a mwy cynaliadwy. Gadewch i ni ddychwelyd i'r modd hwn a rhoi mwy o ffocws ar y buddion a geir wrth weithio gyda natur.
Lle rydych chi'n gweld dyfodol Koppert a rheoli plâu?
Mae angen amaethyddiaeth gynaliadwy ar y byd ac mae Koppert eisiau helpu i wireddu'r nod hwn, lle bydd rheoli biolegol yn cael ei dderbyn fel mecanwaith effeithiol i reoli problemau plâu a chlefyd. Gadewch i ni ddefnyddio natur yn llawn drwy ddefnyddio pryfed a gwiddon buddiol, micro-organebau a bacteria. Er ein bod yn ymwybodol ei fod yn bwnc unigryw, rydym eisiau chwarae rôl yn y diwydiant lle'r ydym yn newid ymagwedd pobl ac asiantaethau llywodraethol at gynhyrchu bwyd ac amaethyddiaeth gynaliadwy er lles y blaned a'i phobl.
Sut roeddech chi wedi dewis noddi'r IPM newydd 2024 a sut gwnaethoch chi elwa?
Penderfynon ni noddi'r digwyddiad oherwydd roeddem yn gwybod ei fod yn cefnogi'r diwydiant. Mae fy nghydweithiwr newydd, Ian Baxter hefyd yn rhan fawr o'r IPM, felly roeddwn eisiau ei gefnogi ef a'r genhadaeth.
Roedd y digwyddiad yn gyfle i feddwl am opsiynau gwerthu posib megis yn yr adran goedwigaeth, sy'n chwilio am atebion i reoli gwiddon y pinwydd, ac roedd yn gyfle i gysylltu ag eraill o'r un sector. Efallai na fyddwn yn gweld yr holl fuddion ar unwaith, ond yr hyn sy'n glir yw bod yr agwedd rwydweithio’n hanfodol wrth helpu'r sector i drafod arloesedd a chanolbwyntio ar dwf meysydd penodol. Roeddem hefyd yn hoff o'r drafodaeth reoleiddiol oherwydd ei bod yn cynnig safbwynt realistig ar yr hyn mae'n ei gymryd i ddod â chynnyrch i'r farchnad. Roedd y cyfle i gwrdd â'n cystadleuwyr hefyd yn wych wrth i ni drafod y farchnad ac efallai cydweithio i wneud y diwydiant yn fwy cynaliadwy. Fel y dywedwn yn ein llinell glo, gadewch i ni fod yn bartner â natur ac adeiladu dyfodol gwell.