Credyd: Gweithredol Bionema.
Mae Grŵp Bionema Ltd, cwmni deillio o Brifysgol Abertawe sy'n arbenigo mewn gwarchod cnydau cynaliadwy ac amaethyddiaeth gynaliadwy wedi ennill Gwobr y Brenin am Fentergarwch: Datblygu Cynaliadwy 2026.
Dyma'r ail dro i'r cwmni ennill Gwobr y Brenin, ar ôl ennill Gwobr y Brenin am Arloesi yn 2024. Mae hyn yn amlygu cyfraniad Bionema at ddatblygu dewisiadau amgen sy'n amgylcheddol gynaliadwy yn hytrach na phlaladdwyr synthetig.
Mae Bionema, a sefydlwyd yn 2012 gan Dr Minshad Ansari ar ôl 15 mlynedd o ymchwil academaidd ym Mhrifysgol Abertawe, yn datblygu ffyrdd biolegol o reoli plâu, yn ogystal â thechnolegau biosymbylyddion a biowrteithiau. Nod y cwmni yw cefnogi tyfwyr i leihau mewnbynnau cemegol ar draws amaethyddiaeth, garddwriaeth a rheoli glaswellt a thir.
Mae Bionema wedi adeiladu ôl-troed rhyngwladol drwy hyfforddiant, partneriaethau a dosbarthu cynnyrch, gan ddangos sut gall arloesi a arweinir gan ymchwil gael effaith fyd-eang.
Mae technolegau cyflwyno'r cwmni - gan gynnwys Incapsulex, BiofilmTech a Soil-Jet - yn gwella sefydlogrwydd a pherfformiad cynnyrch biolegol yn y maes, gan helpu i fynd i'r afael â rhwystrau allweddol i ddefnyddio'r cynnyrch yn ehangach.
Yn 2021, defnyddiwyd tri o gynhyrchion Bionema gan Syngenta, gan sicrhau dilysrwydd masnachol cynnar o ran ei ymchwil.
Mae atebion biolegol y cwmni yn defnyddio nematodau, ffyngau a bacteria buddiol i dargedu plâu niweidiol gan amddiffyn peillwyr, pryfed buddiol ac iechyd y pridd. Mae'r ymagweddau hyn yn cefnogi dyfrffosydd glanach, gwelliant yn ansawdd pridd a lleihau effaith amgylcheddol.
Drwy Academi Bionema, mae'r cwmni'n darparu hyfforddiant i dyfwyr, agronomegwyr a rheolwyr tir, gan gefnogi'r trawsnewidiad o ddefnyddio plaladdwyr confensiynol i ymagweddau biolegol integredig. Mae hefyd yn cydweithio â phrifysgolion, tyfwyr a phartneriaid ym myd diwydiant i wella gwarchod cnydau biolegol a chefnogi'r gwaith o fabwysiadu ymagweddau biolegol integredig ar raddfa fawr.
Dywedodd Dr Minshad Ansari, Sefydlydd a Phrif Swyddog Gweithredol Bionema: "Mae ennill Gwobr y Brenin am yr ail dro yn anrhydedd enfawr i Bionema a'n tîm. Roedd y wobr gyntaf yn cydnabod ein harloesi; mae'r un hon yn cydnabod ein hymrwymiad hirdymor i amaethyddiaeth gynaliadwy. Gwnaethon ni sefydlu Bionema er mwyn troi gwyddor fiolegol yn atebion ymarferol sy'n gweithio yn y maes, sy'n amddiffyn yr amgylchedd ac sy'n rhoi offer dibynadwy i dyfwyr.
"Mae'r wobr hon yn cryfhau ein cenhadaeth i ddod â thechnolegau biolegol i brif ffrwd amaethyddiaeth ac mae'n dangos y gall cwmnïau Prydeinig bach a arweinir gan wyddoniaeth, gan gynnwys cwmnïau deillio prifysgolion, wneud gwahaniaeth go iawn i gynaliadwyedd amgylcheddol, diogeledd bwyd a gwarchod cnydau yn fyd-eang."
Meddai'r Athro Siwan Davies, Dirprwy Is-ganghellor ar gyfer Ymchwil, Arloesi a Mentergarwch ym Mhrifysgol Abertawe: "Mae Bionema yn enghraifft wych o sut gall ymchwil ac entrepreneuriaeth yn y brifysgol arwain at effaith yn y byd go iawn. Rydym wrth ein boddau i weld cwmni deillio o Brifysgol Abertawe'n ennill Gwobr y Brenin am Fentergarwch am yr ail dro, gan gydnabod ei gyfraniad at ddatblygiad cynaliadwy ac arloesi biolegol."
Dysgwch fwy am sut mae Prifysgol Abertawe yn cefnogi dyfodol cynaliadwy, ynni a'r amgylchedd.